ڕۆژنیوز - بەرهەم لەتیف
بەبەراورد بە جەژنی ڕەمەزان، ڕێژەی هاتنی گەشتیار لە ڕۆژانی جەژنی قورباندا بۆ دەڤەری گەرمیان لە 50% زیادی کردووە. بەرپرسی ڕاگەیاندنی گەشتوگوزاریش هۆکارەکەی بۆ کردنەوەی ڕێگاوبانەکانی نێوان گەرمیان و باشور و ناوەڕاستی عێرق دەگێڕێتەوە.
ئەنوەر عەبدولقادر، بەرپرسی ڕاگەیاندنی بەرێوەبەرایەتی گشتی گەشتوگوزاری گەرمیان، بە ڕۆژنیوزی ڕاگەیاند: لەماوەی ڕۆژانی جەژنی قورباندا، نزیکەی 10 هەزار گەشتیار سەردانی ناوچە گەشتیاریەکانی سنوری ئیدارەی گەرمیانیان کردوە، بەمپێیەش بە بەراورد بە جەژنی ڕەمەزانی ئەمساڵ لە (50%)ی ڕێژە هاتنی گەشتیار بۆ ناوچە گەشتیارییەکانی دەڤەری گەرمیان زیادی کردوە.
ناوبراو وتیشی: ئەوەش بۆ کردنەوەی ڕێگاوبانەکانی نێوان گەرمیان و ناوچەکانی ژێر دەسەڵاتی حکومەتی ناوەند دەگەڕێتەوە.
بەرپرسی ڕاگەیاندنی بەرێوەبەرایەتی گشتی گەشتوگوزاری گەرمیان، زیاتر ڕوونکردنەوەی دا و وتی: پێشتر بەشێکی زۆر لە ڕێگاوبانەکان لەدەستی تیرۆریستانی داعش دا بوون و گەشتیاران لەبەر مەترسی ئەمنی نەیانتوانیوە بەئاسانی لە باشور و ناوەڕاستی عێراقەوە بێنە ناوچە گەشتیارییەکانی دەڤەری گەرمیان، تەنانە ئەو گەشتیارانەشی کە لە مەرزی نێودەوڵتی پەروێزخانەوە ئاودیوی هەرێمی کوردستان دەبوون،
ترسیان لە ڕێگاوبانەکان هەبوو و ئەمەش بوو بە هۆکاری کەمبوونەوەی ڕێژی هاتنی گەشتیاران.[1]
#29-09-2015#