ئێزدییەکانی چوار پارچەی کوردستان و دەرەوەی وڵات، لە داوا دەکەن، کە هێرشکەرەکانی سەر #خانەسۆر# لە شەنگال بکرێنە دەروە و بانگەوازی لە کۆمەڵگای نێودەوڵەتی-ش دەکەن، کە ڕۆڵیان هەبێ لە کۆتاییهینان بە ئاڵۆزییەکانی شەنگال.
ئەمڕۆ، #کۆردیناسیۆنی کۆمەڵگای دیموکراتی ئێزدیان# کە پێکهاتووە، لە 16 حزب، ڕێکخراو و ناوەند لە شەنگال، باکور و ڕۆژئاوای کوردستان، ئەوروپا، ڕوسیا و ئەرمنستان، ڕاگەیەندراوێکیان بڵاوکردەوە و داواکارییەکانیان لە هەشت خاڵدا خستەروو.
لە ڕاگەیەندراوەکەدا هاتووە، کە ڕۆژی 3ی مانگ لەلایەن چەکدارەکانی سەربە پارتییەوە هێرش کرایە سەر خانەسۆر و هەوڵی کۆمەڵکوژکردنێکی دیکە درا، لەبەرامبەر ئەو هێرشەدا هێزەکانی یەبەشە و یەژەشە و هاوڵاتییانی ئێزدی بەرخۆدانێکی گەورەیان کرد، لە ئەنجامی ئەو بەرخۆدانەدا حەوت شەڕڤانی ئێزدیخان شەهیدبوون، ئەم بەرخۆدانە گەورەیە بەرز دەنرخێنین و سەری ڕێز لە بەرامبەر ئەو شەهیدانەدا دادەنەوێنین.
لەدرێژەی ڕاگەیەندراوەکەدا ئاماژەدراوە، کە لەم سەردەمەدا کە چارەنووسی ڕۆژهەڵاتی ناوەڕاست تێیدا دیاری دەکرێت، هێرشی لەم جۆرە زۆر واتای هەیە، هێزە دەسەڵاتدار و دیکتاتۆرەکانی بەم پیلانانە دەیانەوێت تەمەنیان درێژبکەنەوە، ئێمە هێرشی ئەم دواییانەی سەر خانەسۆر لەم چوارچێوەیە دەبینین و پێمانوایە بەشێکی لە پیلانی ئەو هێزە دەسەڵاتدارانەیە، سەرنجراکێشە، کە ئەم هێرشە ڕێک پاش چاوپێکەوتن و دانیشتنەکانی ئەنقەرە و میونیخ پێکهاتن و ئاشکراشکرا کە لە ناو هێرشکەرەکاندا ئەندامانی میت و هێرشکەرانی فەرمانی 73 هەبوون.
هەروەها هاتووە: هێرشکەرەکان بانگەشەی ئەوە دەکەن، کە بۆ بەرگری لە سنووری شەنگال و ڕۆژئاوا هاتوونەتە خانەسۆر، بەڵام لەو ناوچەیەدا دەیانەوێت لەبەرامبەر کام هێزانەدا و بەرگری لە کێ بکەن؟ ئەی ئەو کاتەی چەتەکانی داعش بە هەموو دڕندەییەوە هێرشیان کردە سەر شەنگال و هاوڵاتییانی ئێزدییان کۆمەڵکوژکرد ئەم هێزانە لە کوێ بوون؟ لە فەرمانەکەی 3ی ئابی ساڵی 2014دا هەزاران منداڵ، کچ، کوڕ و پیری ئێزدی کوژران، هەزاران کەس ڕفێندران، سەدان هەزار لە هاوڵاتییانی ئێزدی ئاوارەبوون و هەندێکیان لە ئاوارەییدا گیانیان لەدەستدا، ئەی ئەو هێزانە ئەوکات لەکوێ بوون؟.
ڕاگەیەندراوەکە ئاماژەشی داوە، کە ئەو هێزانەی لە ساڵی 2014ەوە بۆ ئێستا بەرگرییان لە هاوڵاتییانی ئێزدی کردووە و بە هانایانەوە هاتن شەڕڤانانی یەپەگە/یەپەژە و گەریلاکانی هەپەگە بوون، ئەوان بوون کە ڕێڕەوی مرۆڤییان کردەوە و هاوڵاتییانی ئێزدیان ڕزگارکرد، پاشان شەڕڤانانی یەبەشە و یەژەشە هاوڵاتیانیان گواستەوە بۆ شوێنێ پارێزراوەکان، خانەسۆر یەک لەو شوێنانەیە کە ساڵی 2014 لەلایەن شەڕڤانانی یەبەشە و یەژەشە لە چەتەکان پاککرایەوە.
لە درێژەی ڕاگەیەندراوەکەدا هاتووە: خەڵکی ئێزدی لە فەرمان، ئاوارەیی ئەزمونی زۆر گەورەیان وەرگرتووە، کۆمەڵگای ئێزدی لە بەرامبەر ئەو سیاسەتانەی سەبارەت بە شەنگال بەڕێوەدەبرێن گومانی هەیە، خەڵکی ئێمە چیتر باوەڕیان بەمە نەماوە کە هێزی دەرەکی بەرگرییان لێبکات، مافی ڕەوای خەڵکەکەمانە کە خۆبەڕێوەبەری دامەزرێنن و بەرگری لە خۆیان بکەن.
پاشان لە ڕاگەیەندراوەکەدا داوا لە هەموو خەڵکی ئێزدی لە ئێزدیخان، چوار پارچەی کوردستان و دەرەوەی وڵات کراوە، کە ئیرادەی ئازادی خۆیان بناسن و هەوڵبدەن بۆ بونیاتنانی یەکێتی و ئاماژەدراوە، کە تا ئەو کاتەی هێزە هێرشکەرەکان لەوێ مابنەوە و ئاڵۆزییەکان بەردەوام دەبن و مەترسی لەسەر خەڵکی ئێزدی دەبێت، ئەو هێرشە هاوکات مەترسییە بۆسەر پێکهاتەکانی دیکەی موسڵ، بەوپێیە داوا لە ئاسورییەکان، سوریانییەکان، تورکمانەکان، کاکەییەکان، شەبەک، شیعە و عەرەبەکان دەکەین، کە لەبەرامبەر سیاسەتی کۆمەڵکوژی و تواندنەوەی گەلاندا تێکۆشانی هاوبەش ئەنجامبدەن.
لە بەشی کۆتایی ڕاگەیەندراوەکەدا هەشت خاڵ وەکو داواکاری لە ڕێکخراوە نێودەوڵەتییەکان خراوەتە ڕوو، داواکارییەکان بەم شێوەیەیەن:
1 – بۆ ئەوەی ئاڵۆزییەکان قوڵتر نەبنەوە، پێویستە هێزی هێرشکەر بە زوترین کات لە خانەسۆر پاشەکشە بکات.
2 – ئەو چەکانەی هێزەکانی هاوپەیمانان ڕادەستی پارتییان کردووە بۆ شەڕی دژی داعش پێویستە کۆنتڕۆڵ بکرێن، چونکە پارتی ئەو چەکانە دژی خەڵکی ئێزدی بەکار دێنێت.
3 – داوا لە هێزە نێودەوڵەتییەکان دەکەین، کە بە دەستێوەردانی دۆخەکە کۆتایی بەم دۆخە ئاڵۆزە بێنن.
4 – کۆمەڵگای ئێزدی بەهۆی باوەڕیی بە کەلتوری لەمێژینەی، لەلایەن هێزە دەسەڵاتدارەکانەوە گەمارۆدراوە، بۆ بەرگری لەو کەلتورە پێویستە بازنەیەکی بەرگری نێودەوڵەتی لە ئێزدخان پێکبێت.
5 – ئەو هەڕەشانەی سەر خەڵکی ئێزدی، هاوکات لەسەر پێکهاتەکانی دیکەی نەینەواش هەیە، بۆیە پێویستە هەموو پێکهاتەکانی ئەو ناوچەیە یەکبگرن و تێکۆشانی هاوبەش بەڕێوەبرن.
6 – پێویستە فەرمانی 73یەم وەکو جینۆساید ناوزەدبکرێت.
7 – ئێمە وەکو کۆمەڵگای ئێزدی بەپێی ئەزموون و مێژوومان خۆبەڕێوەبەری و بەرگری لە خۆمان بەپێویست دەزانین، داوا دەکەین کۆمەڵگای نێودەوڵەتی ئیرادەی ئێمە بناسن و قبوڵی بکەن.
8 – خەڵکی ئێزدی لە مێژوویاندا 73 جار فەرمانیان بەسەرهاتووە، ئەو ڕەوتە تاوەکو ئەمڕۆش بەردەوامە، ئێمە پێویستیمان بە برگری هەیە و بۆ ئەمەش داوادەکەین، هێزەکانی یەبەشە و یەژەشە وەکو هێزەکانی بەرگریکردن لە خەڵکەکەمان بناسرێن و قبوڵ بکرێن.
پێکهاتەکانی کۆردیناسیۆنەکە ئەمانەن:
ئەوروپا: (ناوەندی یەکێتی کۆمەڵەکانی ئێزدی، ئەنجومەنی ژنانی ئێزدی ئەوروپا، ئەنجومەنی گەنجانی ئێزدی ئەوروپا، ئێزدیانی ڕۆژئاوایی ئەوروپا)
ڕۆژئاوا: (یەکێتی ئێزدیانی کانتۆنی عەفرین، یەکێتی ژنانی ئێزدی کانتۆنی عەفرین، ئەنجومەنی ئێزدیانی کانتۆنی جزیرە)
باکور: (پلاتفۆرمی پشتگیری ژنانی ئێزدی، ئەنجومەنی ئێزدیانی باکور)
ڕوسیا و ئەرمەنستان: (ئەنجومەنی ئێزدیانی ڕوسیا، ئەنجومەنی ئێزدیانی ئەرمەنستان)
شەنگال: (ئەنجومەنی ئاوەدانکردنەوەی شەنگال، تەڤگەری ئازادی ژنانی ئێزدی، پارتی ئازادی و دیموکراتی ئێزدیان، ئەنجومەنی گەنجانی ئێزدی)
11-03-2017