عەدێ و مەدێ 39
شەش حەفت ڕۆژەک بەسەر ئەو هەرایەی تێپەڕی، سبەینەکی عەدێ هات، گۆتی: مەدێ تەلەفۆنی کردیە و دەرێ: ئەوڕۆ لە خەستەخانەی دەردەچم، بابچین بیهینینەوە! گۆتم: پێویست دەکا ئەمن بێم؟ گۆتی: ئا ئا، ئەو ئیشە بێی توو نابی، گۆتم: دەباشە ئەوە جلکم دەگۆڕم و دێم! چوومەوە ژۆرێ جلکم گۆڕی و خشیم لۆ دەرێ، دیتم کۆستەرەک ڕاوەستایە و شیش کووت کرایە لە نەفەران، بەدە تەنگەستوور لە پێشەوە دانیشتیە و ئەسمەر و حەیات و مندارەکانیش بە سافی لەناو کۆستەرینە، ئەسکەندەریش بەخۆ و بە جێبەوە هاتیە و دوو عەلەمی کوردستانیشی لە پشتەوە لەولاو لەولای جێبی هێخستیە! هەر لەخۆمەوە کەتمە شک بچینە خەستەخانەی، گۆتم: سەتاسەت ئەمن دەبەن بچین ئەو عەلەمانە لەسەر چیای حەمرینی بچەقێنین!
گەیشتمە کن کۆستەری و گۆتم: ئەرێ ئەسکەندەر ئەمە کێوە دەچین؟ گۆتی: قابیلە کێوە بچین، غێر دەچینە خەستەخانەی مەدێی بینینەوە! گۆتم: ئەوجە ئەو هەرایەی دەوێ، دوایێ هەر لە دەرکەی نایێلن ئەو هەموو نەفەرە بچتە ژۆرێ، کاکە ئەو ژنانە بیننە خوارێ و هەر بەو جێبەی ئەمن و ئەتوو و عەدێ دەچین! بەدە تەنگەستوور نازانم کوو گێی لە قسەی من بوو، جامی کۆستەری کردەوە و گۆتی: ئەتوو مادام ئەو تەگبیرە جوانانە دەزانی، لۆ ناچی ببیە مووشتەشار(موستەشار) لە پەرلەمانی، ئی وەکی توو زەرورە لەوێبی! گۆتم: بابە خۆ ئەمە ناچینە ژن گواستنەوە و هەرپەڕینێ، تێم ناگەینن ئەنگۆ کێوە دێن، هەمووی ئیشی نیو سعاتیە، دەچین دەیهینینەوە و دێینەوە! عەدێ گۆتی: دەی ئەوەیە مەسەلەکە، ئاخر وەکی ئەمن دەرێم ئەتوو تێناگەی خۆ تووڕە دەکەی، کاکە وەڵلا تێناگەی بیللا تێناگەی تەڵلا تێناگەی! ئەسکەندەر گۆتی: ئێستا ئەتوو ئەو تەگبیرە قۆڕانە چیە دەیکەی، وەرە لەگەمن سواری جێبی بەو تەواو، ئەتوو وەتێدەگەی لەگە ژنان دەردەچی، سوار بە با بڕۆین!
زانیم لەگەرەوانە بەلاشە، لۆیێ سواری جێبی بووم، دیتم دوو زەلامی ڕەشتارەش لە پشتەوە دانیشتینە، عەدێش چووە پشتەوە، گۆتمە ئەسکەندەری: ئەو دوو زەلامە کێنە؟ گۆتی: لە پێش دەرکەی خەستەخانەی تێدەگەی ئەوانە کێنە، وەلەو ئەتوو قەت تێناگەی! گۆتم: تڕومبێلەکەی بە ئیش بێخە با بڕۆین! ئەسکەندەر خاولەکەی لە ملی کردەوە و هاویشتیە سەر دەشبولی و کراوە گورگوریەکەی بەلای ڕاستی سەری بڕەک خوار کردەوە و سوویچی هاویشتە سەرێ و گۆتی: ئەڵلا بە ناوت! سویچی بادا و جێب گۆتی: جغ، غغغغغغغ! نەیگێڕا، گۆتی: دووبارە! دیسان بایدا، ئەوجارە جێب بە عەستەم گۆتی: جغغغ! ئەسکەندەر بڕەک ڕەنگی تێکچوو، هەناسەکی قۆری دەردا و گۆتی: یاڵلا سێ جار شەرتە، بەشکوو ئەوجارە ئیش بکا، سلفی بادا و جێب هەر ئەوەتە نووزەی لێوەهات و گۆتی: جق! گۆتم: ئەوە چیە دەرێی سلفی ناگێڕی؟ گۆتی: دابەزن! گۆتم: لۆ؟ گۆتی: پاردەن! کورد هەتا قیامەتێ دەبی بە پاردان بڕوا!
مایتی.[1]