بابەت: هەڵبەست
نووسین: #سەیدی هۆرامی#
ئەم هۆنراوەیە، دەچێتە خانەی ڕېبازی ئەدەبی کلاسیکی کوردییەوە.
لە ڕووی ڕووخسارەوە ئەم تایبەتمەندییانەی هەیە:
1- بەکېشی عەرووزی عەرەبی نووسراوە.
2- هەموو هونەرەکانی ڕەوانبێژی بە پێی پێویستیی هۆنراوەکە، تێدا بەکارهاتوە. (بەکارهێنانی وشەیەک، بۊ زیاد لەواتایەک).
3- سەروای یەکگرتوە پەیڕەوکراوە، واتە (یەکێتی سەروای پاراستییەوە)
4- یەکێتی بەیت و بابەتی پاراستوە. واتە هەموو هۆنراوەکە وایەکی هەیە و هەر دێڕەش واتای تایبەتی خۆی هەیە.
5- وشەی بێگانەی تێدا بەکارهاتوە، بە تایبەت وشەی (عەرەبی، فارسی و تورکی).
6- دووبارەکردنەوەی نازناوی شاعیر لە دوا دێڕدا، یا پېش دوا دێڕی هۆنراوەکە.
$دڵەی شەیدای مەست$
دڵەی شەیدای مەست، دڵەی شەیدای مەست
ئەر تۊ عاشقنی، شێتی شەیدای مەست
شەرتی بەقاو بەین «قەیس»ی «لەیل» پەرەست
هەرتا زیندەنی تۊ مازەش جە دەست
ئەر تۊ گەرەکتەن یار دیدەن کەری
هۆر گېرە شێوەی قەیسی «عامر»ی
شێوەت ئیحسان بۊ چەنی ڕەقیبت
تا دیدەن دڵدار بۊ وە نەسیبت
«مەجنوون» چەندێ بێ پەی «لەیلۍ» وێڵ بێ
دېوانە و سەر سام، بېیابان گېڵ بێ
مەگرەواوسەیلاو نە دیدەش مەوەشت
ڕوێ و پەی تەقدیر کەردش عەزمی گەشت
خاتر پوڕ جە داخ، دەروون جە خەم کەیل
هۆردارا بېشەرم، فەریاد پەرێ لەیل
لەیلش بە ئاواز بەو تەور مەلاونا
سەدای زاری ئەو، سەنگ مەتاونا
بەو دەشت و دەردا سێر گېڵا خەیلێ
ئاخر شی وەلای هەوارگەی لەیلۍ
دیش خێڵی لەیلۍ نەو جا هۊر کەندەن
مەنزڵ وېرانەن کەس تێش نەمەندەن
مەجنوون خۊ وێڵ بێ، بەتەر بی هەردە
هەڕ داش بە سەردا، چوون ئازیز مەردە
دیوارێ و دەس چن لەیلی نازار بێ
سایەش شیفای دەرد قەیسی بیمار بێ
شی نە پای دیوار مەجنوونی دڵ ڕېش
تاسای ئەو کەرۊ، زامانش ساڕېش
دیش سەگێ زەعیف، ڕېشی کوهەن ساڵ
ها نەپای دیوار، کەفتەن وە بێ حاڵ
سەر تاکو پای تەنش چەنی زامان ڕېش
زوان کەردەن تێغ پەی زامانی وېش
مەماڵۆ نە زام، زوان چوون نەشتەر
وە ڕووی زامی سەخت، مەشانۆ وەشتەر
ئێندە مەشوو مۆر ها نە ڕووی زامش
بېیەن چوون دەوار، سیا ئەندامش
چەن وەختەن کەسێ نانێ نەدان پېش
سازان چەنی زۆخ ئیستخوانی وېش
غەیر جە قورسی «بەدر»، مانگی دوو هەفتە
هەرگیز چەم بە شکڵ نانێ نەکەفتە
شی بە نزیکش قەیس سارا گەرد
کېشا پەی حاڵش، ئاخی سیا سەرد
وات ئەی پاسەبان، سیای خەیمەی یار
ئێشکچی شەوگار نە دەوری دیوار
چەرخەچی شەوان، ڕۊ نە دەرو دەشت
«بەبر»ی «شېر» شکار، پەرێ «ئاهوو» چەشت
پوڵنگان ئۊسا فکری تۆشان کەرد
حەساری کۊشان، پەرێ وېشان کەرد
نەعرەتەی دەنگت هەرکۆ مەیاوا
مەنزڵانی چۆڵ مەکەردش ئاوا
ئینە چە حاڵەن تۊ پەنەت یاوان
چمان ئەندامت بە تێغ شکاوان
جە کۆچی لەیلۍ، شای بەینەت داران
تۆنی جێ مەندەی کۆنە هەواران
خەیلێ پی دەستوور پەشێو بی پەرێش
ئەحواڵی لەیلۍ خەبەر پەرسا لێش
ناگا تەماشای دەشت و سارا کەرد
دیش کە «صەیاد»ی پەیدا بی جە هەرد
یەک ئاهووش کوشتەن، وستەن نە شاندا
مەویەرۆ بە جەخت، نەو بېیاباندا
شی وەلای «صەیاد» قەیسی جەفا کېش
تا چوون سائی لان، گۊشت بوازۆ لێش
واتش ئەی «صەیاد» تۊ عەشقی پیرت
ببەخشە پێمان، ئارۆ نەچیرت
«صەیاد» چوون مەردان، مەردانەگی کەرد
لاشەی نەچیرش بە مەجنوون سوپەرد
مەجنوون هۊر گېراو ئاما بە شیتاب
گنا نە خەیاڵ کارسازی کەباب
ئاهووی «صەیاد»ش قیمە کەرد بە تێغ
لاشە و جەرگ و دڵ، پێکا وە ڕووی سێخ
بە دڵەی پوڕ سۆز هیجران وەردەوە
بە ئاهی دەروون، ئایېر کەردۆ!
کەبابێ کەردش بە سەد سۆزو خەم
نمەکاوش کەرد بە ئەسرینی چەم
ئاورد وەلای سەگ، بە تەعجیل و دەو
واتش ئەی زەعیف، بێ خۆراک و خەو
یە تەعمەی کەباب قەیسی چۆڵ گەردەن
تۆ زامدارەنی، پەی تۆم ئاوەردەن
دەسا مەیل کەرە، شیفای جەستەت بۊ
مەرهەم پەی زامان جەستەی خەستەت بۊ
چەندێ پی دەستوور کەباب کەرد پەرێش
تا کە زامانش یەک یەک بی ساڕېش
قوەتش جە قووت، کەباب بی تازە
تەی بی نە سارا، کەردش جانبازە
دیسان جە نۆوە شی وەلای لەیلۍ
وېش وست نە دامان خاک پای لەیلۍ
شەو پاسەبانی یانەی لەیل مەکەرد
ڕۆ چەنی «شوان» مەگېڵا نە هەرد
جەو دما هەر وەخت قەیس بېش ئارەزوو
تا دیدەن کەرۊ لەیلی عەنبەر بۊ
سەگ پېش مەزانا، چوون ساحێب فامان
مەشی وە پېشواز، مەگرتش دامان
بەو تەور کە ئەغیار پەنەش نەزانا
مەجنوونش وەلای لەیل مەرە سانا
مەجنوون بە دیدار لەیلۍ مەبی شاد
کۆگای خەرمانان، خەم مەداش وە باد
ئەر پېش مەزانا ڕەقیبی ڕا چەفت
ئاخر وەلای لەیل، کەی ڕاگەش مەکەفت
سەیدی داد جە دەس بەدخوویی ڕەقیب
نمازۆ دیدار یارش بۊ نەسیب
ئەر سەد ساڵ چەنیش بکەری خاسی
خاسیش هیچ نېیەن، غەیر جە ناڕاسی
سەگ پېشەش مەدەی وەفاش پی تەورەن
ڕەقیب گەنجش دەی، پیشەش هەر جەورەن
[1]