داستانۊ شېخی سەنعانی
بەشۍ پەنجەمە
(تەرسا)ی گاۋرە پەیتواچو شېخی سەنعانیش داوە و واتش: تۊ شېخێ گۆرە و قەدر گرانەنی، خاوەنو چڼڎەها موریدانی، ماوات کابەی موبارەکەن، پەوکەی خەیاڵۍ خامۍ نمەکەرە، ئیسە عاشقی بە تۊ چېش، من کناچێ تازە نۊهاڵە، چەنی وېم گېرۊڎەو پیێوە پیری کەروون، نەمام کەی بیەن گرۊی داری پیر؟
تەرسا، ئېد ئەژنی، زەردەش بەردەوە
بەو لەعلی لەبان، (ماء الورد) ەوە
واتش: ئەی سەنعا، پیری ئەندوبار
ئازارت کېشان، پەرێ دیەن، یار
بەڵام قەبیحەت پەی شەخسێ چوون تۊ
خەیاڵانی خام، نە دڵ، باوەرۊ
تۊ شېخی سەنعان موسڵمانانی
ئەکابر زادە، عەزیمولشانی
ئیسە عاشقی بە تۊ یانی چېش
بشۊ ماوای وېت، پیری دەروون ڕېش
مەکېشە پەی من هەناسانی سەرد
چە خەیرەن، وادەی جوانیت ویەرد
تۊ پەی من تازە وە شەیدا مەبی
نەی سەر وەختەدا، زوو ڕیسوا مەبی
مەکېشە ئازار، سوود مەدارۊ پېت
چەنی موریدان، شۊ بە یانەی وېت
تۊ شېخی کەبیر، دینی هەقپەرست
من گەبری تەرسا، مەستی مەی پەرست
حەرفێ مەواچوون تۊ مەبە دڵگیر
نەمام کەی بېیەن، گرۊی داری پیر!
من بازی شەشدانگ، تەواری سەرمەست
مەر بېیەن، پەی تۊ، وېم کەروون پابەست
با، ئینسافت بۊ، ئەی شېخی کابر
من نۊ نەمامێ، تۊ داری بېبەر
هەنی بەی تەورە، مەکەر گفتوگۊ
موسڵمان چەنی تەرسا، کەی مەبۊ
ئەم جار تۊم بەخشا، بە دینی عیسا
بە ناڵەی ناقووس، بانگی کلیسا
وەرنە مەواتم، من بە ڕاهبانان
کەرات بە عیبرەت، گرد موسڵمانان.
[1]