داستانۊ شېخی سەنعانی
بەشۊ نۊزڎەهەمۍ
کەشیشەکۍ پەی تەرسای گاۋرۍ خەبەرشان بەرد، پەنەشان واتە، هەکە شېخی سەنعان گېڵانۆ و جە عەشقو ئاڎۍ وازش ئاردەن، جە بتپەرەسی وازش ئاردەن. تەرسا بە دڵێ مەڕیاوە لوا پەی لاو ئەڎێش، ئاڎە هیجرەت و دوورکۆتەیۆ شېخی سەنعانیش پەی ئەڎێش باس کەرد، ماچۊ پاسە دیارەن شېخی سەنعان جە من دڵش ڕېشان، ئڼا چەنی من جیامازۊ، جە وەختێنە پەی من وازش جە دینو وېش ئاوەرد.
کەشیشان خەبەر پەی تەرسا بەردەن
واتەن: شېخ سەنعان ڕوو بە ڕا کەردەن
گڕیا، جە هەیبەت، سۊزیا وېنەی نوور
جە شەوقی لەقای پادشای غەفوور
جە گۊمڕایی وېش، لەرزا، ستېزا
ئەسرین چوون دانەی مرواری ڕېزا
جامی بادەی ناب، جە دەس شەندەوە
کورپەی حەیتاران، یەک یەک کەندەوە
ڕېحان کەردەبۍ وە پەرچینی گوڵ
پەیا پەی مەکەند، وە بۍ تەحەممول
واتش بە دایە، ماهی بۍ ئەندېش
چېش کەروون چەنی سەنعانی دڵڕېش
ماچان هەم لووان، بە دینی وېشان
مەعلوومەن جە من دەروونش ڕېشان
پەی من بېزارەن، جە دینی ڕەسوول
من بەخواجەی وېش، چن ساڵ کەرد قبووڵ
پەی من ئەو سوجدەش وە بت بەردەوە
پەی من تەرکی ماڵ، کەعبە کەردەوە
پەی من بېزار بی، جە قەوم و خوېشان
پەی من چن عەزاب، سیاسەت کېشان
پەی من چەنی خووگ کەردش شوانی
پەرێ من پۊشاش، خەرقەی ڕەهبانی
پەرێ من جە گېیان شیرین ویەردەن
پەی من چن جەفای بېسوودش بەردەن.
[1]