پاشی وان حرز و کتابان؛ ئەلخەنناس پیرێ خەرابان
چوو د خەونا دێی و بابان؛ لێ دکت ڤێ نەسیحەتێ
دخەوین دبینە باب و دێ؛ وە دڤێ کچێ خوەش کت خودێ
(باندێ) بەنە بال زاهدێ؛ ڕۆژەک بدەن لێ موهلەتێ
کارا کچێ کن ب ئاواکێ؛ سەری بشون ب ئاڤەکێ
دا شەیخ ببینە گاڤەکێ؛ قەنجە ل بو مەسلەحەتێ
لازمە شێڤەک بمینێ؛ حال و ترسا وێ ببینێ
ئسمێ (یشمخ) لێ نەخوینێ؛ ما ڕەواکن حاجەتێ
سێ شەڤان دخەونێ دبینن؛ باب دبێ مالخوێ بخوینن
رابکن پیرۆز هلینن؛ ساحبێ فراسەتێ
خەونا کو وان دینە ب جۆت؛ باخوێ ژ مالخوێڕە د گۆت
دائو بران دل پێ دسۆت؛ نادت وەزیر ئیجازەتێ
وەزیر ژ باخوێ پرسییە؛ خەونا کو وە ئیشەڤ دییە
باوەر مەکن ڕەحمانییە؛ من دل نەچوو ڤێ وەقعەتێ
جار جار دکن بێ حوکمیان؛ زاهر دکن بێ شەرعیان
خەونا حەراما عامیان؛ باوەر مەکن ڤێ ڕوئیەتێ
خەونێ دوان سادق دبن؛ ئەر خزمەتا خالق ڕە بن
دوور ژ کەسێ (فاسق؟) دبن؛ ل دۆشەکا عەدالەتێ
خەونا وە دی بێ شرعەتە؛ دیتنا مەحرەم عەورەتە
بابێ قەبول ئەو دەعوەتە؛ ژنا شەرعی و کورهەتێ
ئەڤ ڕەنگ دبێ مالخوێ کوهن؛ ئەر هوون دکن پرسێ ژ من
بسپێرنە شاهێ مەزن؛ شافی دکی ژ عللەتێ
تەدبیرەکی مەعقول دکر؛ سەد حەیف کو میر قەبول نەکر
نەفسێ جەلەو تەحمول نەکر؛ تەحلە حەقی ل کەس خۆش نەتێ
حەقناسی گوهدار موئمنن؛ گومرەه قەوی دل هێسنن
شیرەت د گوه نا سەکنن؛ نارنج ل بابێ گونبەتێ
کیمیا ل با من عاقلە؛ ئنسان ل علمی کاملە
رەئیا نە ئەهلان موشکلە؛ خەلقێ مودام د غەفلەتێ
قەنج کر وەزیر ئەمینی کر؛ بابێ کەنزکێ ڕەبەنی کر
(خور کردن و خود بینی کر)؛ ژ کێم فەهم و جەهالەتێ
کێم فەهمی و جاهل دکن؛ ڕەئیێ دبێ عاقل دکن
گش ب هەوایێ دل دکن؛ خەملا کچێ و زینەتێ
رابوونە خەملا وێ بکن؛ کارێ کو باب و دێ بکن
لازم قەوی دێ چێبکن؛ ژ زیڤ و زێڕێ سبیەتێ
یک جار د زێڕی وەر دکن؛ کاشانیا دبەر دکن
تێکدە جلا ماوەر دکن؛ ژ بێهن و بخوورا حوسنەتێ
عود و زوباد و عەنبەرە؛ مسک و گولاب و ماوەرە
جوانا پرنجک چەنبەرە؛ شوبهێ عەروسا داوەتێ
دێما گولی سۆراڤ دکن؛ زولفان ل سەر داڤ داڤ دکن
ب حننە ئو زەرباڤ دکن؛ ب جەوهەرێ د قیمەتێ
تێک جەوهەر و ئەلماس دکن؛ کوفی ژ نافتێ خاس دکن
ل فەرقێ تاجان ڕاس دکن؛ ئەڤ ڕەنگ دبن زیارەتێ
ب عەجەبی (مداه) دبەن؛ ب تەختێ کو شالگەه دبەن
بال عابدێ ئەللاه دبەن؛ هیڤی دکن فەزیلەتێ
ئەو عابدێ ب نامووس و نام؛ بێهن عەنبەرا ب لەعل و جام
ب ڕێز و ئەدەب برنە سەلام؛ نێزیکی دەستێ حەزرەتێ
دێم قەمەرا ئەبرۆ هلال؛ ڕەنگ کەوکەبا خورشید مسال
کچ بێ ڕەفیق هشتی ل بال؛ ئێمن ژ ترسا توهمەتێ
ئەو نازکا خەلق موشتەری؛ بەرسیس د وێ نا فەکری
شەیتان دەمەک چوو لێ گری؛ خێلی ڤەکر ژ جەبهەتێ
خێلی ژ بەر دێمی ڤەکر؛ ترسا کچێ لێ زێدە کر
یا شەیخ تە چار پەروە نەکر؛ بێ شەفقەت و بێ ڕەحمەتێ
تایێ غەریبان بەر مەدە؛ ئەجرێ د گەل وان بێ حەدە
خێرێ مەریزان یەک سەدە؛ ژ بێ حساب فەزیلەتێ
ئەو عابدێ قائم ل ڕێ؛ جارەک نەزەر دا دێم دوڕێ
تەیرێ دلێ شەیخ هلفڕێ؛ بێ ئختیار کر قامەتێ
بێ ئختیار بو ڕاهبە؛ فکری د خەتتی کاتبە
حەرفا ئەڤین کر غالبە؛ دین بوو ژ نەقشێ قودرەتێ
دین بو ژ خال و ئەبروان؛ ژ بێهنا ڕحان و نیموان
ئەو بلبلێ وان بشکوان؛ وەربوو د توورا ئولفەتێ
شەیتان لەعینێ فاسدە؛ سۆرگول نەما بو عابدە
وی موبتەلا کر زاهدە؛ دل گرت ب داڤا ڕەغبەتێ
موحبەت قولوبان گەرم دکت؛ سەد بەرقێ پوولاد نەرم دکت
ئاگر ژ پووشێ شەرم دکت؛ نارێ مەجازێ حرقەتێ
ئەو عابدێ حەیران و مەست؛ بەند بوو ب تەقدیرا (الست)
شەیخ ئختیار چوو بوو ژ دەست؛ شەرم نەبوو د خەلوەتێ
شەیتان دبێ قەت شەرم مەکە؛ یەک ئادەمەک نین بێ لەکە
باندێ ژ عەیبان توبەکە؛ مووسا دکت شەفاعەتێ
قەت غەم مەکە دونیا وەیە؛ بەنگ و زنا قەتل و مەیە
ل وان حەمیان تەوبە هەیە؛ پاقژ دبن ب تەوبەتێ
ب تەوبێ دچن بێ ئەدەبی؛ ترسم کچێ حەملەک هەبی
باندێ تو ژی شەرمەندە بی؛ کوبکن گەلۆ ژ ڤێ قسەتێ
شەیتین ژ بەرسیس لەومە کر؛ تە فتنەکە هەڤڕوو خوە کر
چاخو ژ میر شەرمەندە کر؛ داخل بووی د خەتیئەتێ
پاش کو بەلا بوو سادرە؛ قەتلا کچێ ئەولا ترە
دا سەح نەکن باب و برە؛ ترسم ژ تە سیاسەتێ
هەیا خودێ لێ ئازری؛ وە دبێ حەتا کچ نا مری
ئەڤ عەیب ل تە نا ڤەشری؛ قەت یا خودێ ڤە بیر نەتێ
بابێ قەوی ئەو کچ دڤێت؛ باندێ قسێ ژێڕە دبێت
ئەمرێ عەزیم ب سەر تە تێت؛ نابی خلاس، بێ عبرەتێ
#فەقێ تەیران# [1]