باخچێوە بېگەرد
نویستەی: میرزا ئۆلقاڎر و پاوەی
بەشۍ: شەسس و دوەمە

عەبدوڵڵا دمای گفتوگویش چەنی تاتەیش (عەبدولموتەلیب)، پەی لاو خەیمۍ شازادۍ شامی (فاتیمە) گېڵاوە، لوا چوەر، نیشتەرەو پەنەش واتە: تاتەم بە هامسەرگیری ئېمە ڕازین، بەڵام ئاڎە ماچۊ تازە ئاواتەکەو من لوا چېرو خوڵۍ، من پەی عەیش و نوشی هامسەرگیری چەنی تۊ نەکەرېنا، بەڵکوم پەی ئانەی نوورو تۊ بلۊنە دلێ دڵ و ڕوخسارو زاروڵەکەیمان. دیارەن شازادۍ شامی زانانش کە (ئامین)ۍ، ژەنەی گۆرېش لەمەش جە عەبدوڵڵای پەڕە بیېنە، ئیتر نوورەکەش لوانەنە دلۍ دڵ و ڕوخسارو زاروڵەکەیشان. وەختێ عەبدوڵڵا هەواڵەکەش یاونا تاتەیش، ئاڎ ڕازی بی، ئیتر گېڵاوە پەی لاو شازادۍ شامۍ، بەڵام ئاڎە کە عەبدوڵڵاش دی نوورەکەو دلۍ چەماش نەمەنەبۍ، زاناش لوانەنە دلۍ لەمەو ئامینۍ ژەنېش، پەوکەی بە ناچاری گېڵاوە پەی شامی.
عەبدوڵڵا هۊرزا، دەرلا، وە زوودی
لوا، وەسەر وەقت، وەعدەی مەوعوودی
داخڵ بیی نە تۊی، خەیمەی لاجیېوەرد
چەنی فاتیمە، سەواخێرش کەرد
واتش: مەتڵەبم، عەرزی پدەر کەرد
فەرما، بە ڕەزای تاکی تەنیای فەرد
عەبدولموتەلیب، سەلاح دان، جە نۊ
من هەم مەیلم هەن، بە نیکاحی تۊ
هەرچی، جە لای حەق، موقەددەر، بېیەن
مەبۊ، هەر ببۊ، تەدبیرش نېیەن
جەو دەم مەلیکە، تەماشای ئەو کەرد
دوو جار، پەیا پەی، کېشا ئاهی سەرد
زانا، نەمەندەن، نوور، جە پیشانیش
مولتەفیت، نەبی، بە مېهرەبانیش
واتش: من عاشق شەوقی ئەو نوور بیم
نە وە عەیش و نۊش، شووهەر، مەسروور بیم
بە خوڎا، مەیلی من، نە نەفسانی، بۍ
نە هەوا و هەوەس، نە شەیتانی، بۍ
حەقق نەڎا، بە من، چوون، مەیلی وېشەن
ڕەزاش، بەو تەورەن، فایدەش، چېشەن
فەوریی، خەرامان، خواحافېزی کەرد
بارخانەی، ڕەنگین، هەم بارکەرد، وە بەرد
تا یاوا، بە شام، هەر بەو دڵەی ڕېش
نا ئومېڎ، پاڵدا، وە بتخانەی وېش
هەر شەو، تا بە ڕۊ، هەر سوبح، تا ئېوار
لاڎێ، وە بۍ یەک، نەگېرتەن، قەرار
تاکە، ئامینە، عېسمەت پەناهە
چوون، حەمڵش یاوا، بە چوار ماهە
عەبدولموتەلیب، دایېم، جە هەرحاڵ
مەکەردش، خەلعەت، مەپەرسا، ئەحواڵ
تا شش مانگ، وېیەرد، ئەو سەوڵی ساوا
نېدایێ جە غەیب، وە گۊشش یاوا
واتش: ئامینە، موژدە، بۊ جە تۊ
حەمڵی شەریفت، فەرزەندێ، مەبۊ
گرۊی مەلەکووت، جە نامەی نامش
مەکەران، نە گۊش، حەڵقەی غوڵامش
فېشتەر، جە مەخلووق، دنیا سەرانسەر
مەبان، ئوممەتش، تا وە ڕووی مەحشەر
مایەی حەمل وېت، زەریف، بزانە
نامی شەریفش، محەمەد، وانە
[1]