وەهار ئاخېز کەرد، و ەهار ئاخېز کەرد
سپای نەو وەهار وەخەیر ئاخېز کەرد
وەفراوان شەتاو، هەردان لەبڕێز کەرد
سەوزەی دەشت و دەر قەناوێزبېز کەرد
قەتاران، جۊق جۊق، باخانان بارکەرد
تەشریف و پایەی ئێڵاخان ئاوەرد
فەرش خەزرایی وست نەرووی بێسات
نشت و بانۍ تەخت دەست کەرد وە حوکمات
فەرما جاڕچیان چوون هەردە ساڵان
خەبەردار کەردەن سپای گۆڵاڵان
بەتەعجیل و دەو حاکم فەرمان دا
ڕوو کەردەن وەکۊ، جاڕدان وە سەحرا
واتەن مزگانی، دیسان شای وەهار
خەیمە وخیاوان هۆردان نەکۊسار
تیپ ئارایی بەزم عەزم جەزمشەن
چەنی سپای تەم دەعواو ڕەزمشەن
گوڵان ئیدئەژنین نەتۊی پەردەی خار
جۊق جۊق و تیپ تیپ چوون تیپ خونکار
خەیمە وخیاوان هۆردان نەسارا
بەسەد هەزار ڕەنگ چۊن سپای دارا
شای وەهار چۊن دیش سپاش بی زیاد
بەنای ڕەزم جەنگ ئاوردەش و یاد
دانە تیپ کۊس چوون سپای یەمەن
ئاخېز کەرد وەجەنگ پەی دەفع دۊشمەن
پەنا بەرد وەزات بارگەی شای نەجەف
بناڵە نەفیر «اضرب لا تخف»
دانە تیپ تەم بارخانەی شاهی
زەمین جۊش ئاوەرد تاکو گاو ماهی
سپای تیپ تەم شکەست ئاوردن
جەدەستۍ دۊشمەن نیم گیانۍ بەردەن
بەفەتح فەتتاح فەتح نامەش وەند
فەرما سەرداران ڕووکەن وەئەڵوەند
کڵێڵان نەرووی کوان بەردەوە
بۊی عەتر و عەبیر هەرزان کەردەوە
جەودەم شای وەهار بەوێنەی شاهان
تەڵەب کەرد یەکسەر سان سپاهان
خەڵات پەخشان کەرد سەد هەزار وێنە
کۊل پارچەی قەدیم کار خەزێنە
کاڵای ئەخزەری بەخشاوەئەشجار
بی وە زینەت بەخش پەی سپای وەهار
جەودەم گوڵاڵان تەڵەب کەرد یەکسەر
سان دا سپاشان چوون سپای قەیسەر
ئەحمەری و بەنەفش، زیرەتی وقیلی
چێرەیی و زەرد ،عەننابی و نیلی
گوڵ گەزی و گوڵ نار ڕەنگێ نەباتی
توول توول وڕاڕا، تەرح گۆجەراتی
سفیدی و سفید ئەبیەزی و زەنگی
ئەسوەدی و زیری کارفەرەنگی
عەرووسان دەستوور جە سەد هەزار ڕەنگ
خەڵات پەخشان کەرد جەدیبای فەرەنگ
هەریەک ولێباس کارخانەی شایی
پۊشان وەبەدەن پەی خودنەمایی
تیپ تیپ پی دەستوور جەلانساران
چوون تەواف چ یان وەیس نازاران
گاهێ نەقیام گا نە سجوودەن
گا نە شوکرانەی فەردی وەدوودەن
فەسڵ کەسێوەن جە خەم بۊ بېزار
بێدار بۊجە شەوق کارخانەی وەهار
کەمەر بوینۊ هەر سۊب تاوەشام
بێ خەوف بگێڵۆ مەقام بە مەقام
بێ دەستوور چەنی هامسەران وېش
بکەرۆ سەیران بێ خەوف و ئەندێش
گا کەرۆ وەزەید سایەی وەرکاوان
گۊش دەرۆ وەدەنگ ناڵەی شەتاوان
گا مەست مەدهۆش، عاشقانە وار
بکەرۆ سەیران دیارو وەدیار
پەی کەسێ وەشەن ئەی وەهارێ نۊ
خەمی کۊنەو نۊ وەباد بدەرۆ
یە «ئەحمەد» واتەن هېجرانی بارەن
بېزار جە سەیران گەشتی وەهارەن
#ئەحمەد بەگی کۊماسی# [1]