هەی دڵ گیروەردەی حەڵقەی دامەنی
هەر کام مەوینی، هەر ناکامەنی
هەر کار مەکەری، هەر بەدنامەنی
من هەر دەوا کەم، تۊ هەر زامەنی
تو تاکەی نە فکر سەودای خامەنی؟
هەرگز خیاڵت ساتۍ جەم نییەن
پای غوسە و خیاڵ لەلات کەم نییەن
چو دنیا دەست وە یەکدەم نییەن
سوراحیت نە سەوت زیر و بەم نییەن
هەر کار مەکەری، هەر بەدنامەنی
تو تاکەی نە فکر سەودای خامەنی؟
گا پەروانەی دەور شەم جەماڵانی
گا هەمڕاز ڕاز کەمەر لاڵانی
گەهێ سکووتی گەهێ ناڵانی
گا چوون ئەوداڵان وێڵ ماڵانی
من هەر دەوا کەم، تۊ هەر زامەنی
تو تاکەی نە فکر سەودای خامەنی؟
شیرین مەوینی حەسرەتباریتەن
تەڵخی مەوینی شین و زاریتەن
زشت و زیبایی بیقەراریتەن
پەس تو چە دەرمان دەرد کاریتەن؟
من هەر دەوا کەم، تۊ هەر زامەنی
تو تاکەی نە فکر سەودای خامەنی؟
ئەی دڵ پەی جیفەی حەسرەت مەوازی
جیفە پەیدا کەی، پەی چێش مەبازی
چوون هەر ساعەتۍ وە یەک مەجازی
دنیا پیت بیەن نمەوی ڕازی
هەر کار مەکەری، هەر بەدنامەنی
تو تاکەی نە فکر سەودای خامەنی؟
دڵە لەت لەت بای چو نیل سەرخوم
وەس تەمەننا کەر وە یانەی مەردوم
هەرچی هاواران وە ڕات ئاوەردم
چەنی گوناهان ساڵان سەر کەردم
جە ڕاسی وەحشی، پەی بەد ڕامەنی
تو تاکو کەی نە فکر سەودای خامەنی؟
ئاﮪ لە خیاڵان مەویەرۆ نە دڵ
چو نووفڵ نووشام زەهر هەڵاهڵ
چەن تەی مەکەری ڕاگەی بی حاسڵ؟
نە خاسان شەرع تاکو کەی مەکەی سڵ؟
هەوا خوای لەزەت چەن بێ تامەنی!
تو تاکو کەی نە فکر سەودای خامەنی؟
دڵە کوت کوت بای، چەن خیاڵ پێتەن؟
دیدە هەی کۊر بای کول گونای وێتەن
تۊشەی بەدنامی، ڕای نەهات ڕېتەن
مەر نمەزانی سای ئەڵحەد جێتەن؟
بووم بەد عەمەڵ تەختەبامەنی
تو تاکو کەی نە فکر سەودای خامەنی؟
ئەر تۊ نەکەری سەیر زوڵف و خاڵ
دڵ وەو سپوردەی چو مەکەی خیاڵ
ورک نەکەی پەرێ لیمۊ چوون مناڵ
ئەر ڕۊژ بوو وە سی، هەزار بوو وە ساڵ
وێنەی عارفان دوور وە کامەنی
تو تاکو کەی نە فکر سەودای خامەنی؟
هەی دڵە ئەر گەنج زەمانەی فانی
تەخت سڵەیمان تاج کیانی
مەحبووب چو شیرین زڵەیخای سانی
پەرێت باوەروون پەی شادمانی
ئاخر عاقبەت بێ ئەنجامەنی
تو تاکەی نە فکر سەودای خامەنی؟
ئەر فکرت ڕاحەت ماڵ و عەیاڵەن
ڕاحەت پەی ئۆ لاد ئادەم مەحاڵەن
هەرکەس بواچۊ ڕای دڵ بەتاڵەن
واچان سەی یاقۆ ئەبڵەﮪ خەیاڵەن
هەر کام مەوینی هەر ناکامەنی
تو تاکەی نە فکر سەودای خامەنی؟
#سەید یاقۆی ماییدەشت# [1]