زات ئیسم ئەڵڵاهەن، زات ئیسم ئەڵڵاهەن
«ئەلف» ئیبتیدای ئیسم ئەڵڵاهەن
ئەزەل و ئەبەد ئوولا و ئوخراهەن
ئەحیەد و وەحید عالەم پەناهەن
«بێ» باقی، بەدیع ئەرز و سەماوات
بە یەک نوقتە سونع سازان مەوجوودات
«تێ» تەختش کەونەین تاج لامەکان
کەس نە کونﮪ زات نەدارۆ نیشان
«ثێ» ثەمەرەی زات ثەبت سیفاتەن
عاڵەم جە ثەنای سیفاتش ماتەن
«جیم» جەبباریش جیلوەی دوو جیهان
میزان و سیرات جەحیم و جینان
«حێ» حەمدەن حوقووق حەمید سیفاتەن
حەیی حەیات بەخش هەر زی حەیاتەن
«خێ» خالیق مەوسووم خیلقەت نومای زات
«دال» داوەریت جە دوڕ کەرد ئیسبات
«ذال» زاتت دیم هەر «ذوالجلال» ەن
موبەڕڕا جە شیرک هەم بێ زەوالەن
«ڕێ» ڕەززاق عام یەعنی ڕەحمانی
ڕەحیم بەر موئمین موعتیی جینانی
«زێ» زاکیر زات هەر زی حەیاتەن
موعیزز و موزیلل ئەوساف زاتەن
«سین» سەتتاریش «ستر العيوب» ەن
«شين» شافی، شەهید «کشف الکروب» ەن
«صاد» محصی و صمد و صەبووری هەردەم
«ضاد» ضارۆ نافیع عالەم و ئادەم
«طێ» موعطی، موقسیط باسیت و شەکوور
«ظێ» هەردەم ئیظهار صیفات نە ظوهوور
«عەین» «عليم السر» ، «علي العظيم»
«غەین» «غفار الذنب» ، حەکیم و حەلیم
«فێ» فەتتاح کلید جەمع ئەبوابەن
واریس و مومیت موحیی و وەههابەن
«قاف» نە قودرەتەن قەییووم و قەدیم
قادیر و قەههار قوددووس و عەلیم
«کاف» کەریمیت شەئن کیبریان
بێ تەڵەب نیعمەت عاممەی تۆ عەتان
«لام» لەتیفیت قەڵەم دا ئەسەر
جە لەوح قەزا مەحفووزەن قەدەر
«میم» جە مەعبوودەن، مەتین و موعید
موغنیی و ڕەشید، موجیب و مەجید
«ن. و القلم» نوقتەی نەفخ سوور
«واو» وەدوود، وەعدەی زەلزەلەی نوشوور
«هاء» «هو الحق» ەن، کە بەر جە «الست»
هەرکەس نە جەواب ئەو ڕۆژەن سەرمەست
«لا» ی لامەلفەلا پڕ مەعانییەن
لاعەیب و لاشیرک و لامەکانییەن
«یێ» یەزدان «والی» «واسع» و «رافع»
«رب» و «متعال» «حکيم» و «جامع»
مەنبەع قورئان بیست و نۆ حەرفەن
هەریەک بە سەد تار موسەممای وەسفەن
بە عیززەت وێت مونعیم وەههاب
هەرچەند گوناهم نەدارۆ حیساب
جای ئومێد تۆنی حەیی ڕەببانی
عەفووم کەر بەو لوتف دەریای غوفرانی
ها «فەقێ» قەلبش قەید زنجیرەن
جە قەزای قانوون تورکان ئەسیرەن
هەم غوفران زەنب هەم نەجات نە بەن
هەم تەفریحدۆست هەم حوزن دوشمەن
بە حورمەت نوور حامیلان عەرش
هەر چوار عەتاکەر حەیی حەیات بەخش!
هەم بدەر تەوفیق زات لایەنام
واقیعەی سوڵتان میسری کەم تەمام
پەی تەسدیق قەلب عەقیدەی یاران
تازە کەم ئەخبار جە ڕۆزگاران
#فەقێ قادری هەمەوەند# [1]