داستانۊ گوڵ و بولبولی
بەشۍ هشتەمە
بولبول، بە حاڵو وەزعو بەچەکەیش، فرە خەمبارەن، ئاڎ دمای موچیاریەکاش پەی بەچەکەیش، ئینجا گۊش مەدارۊ پەی واچەکاو فەرزەندەکەیش(بەچەکەیش)، باس جە عەشقی کەرۊن کە چڼەها کەسېش، یانە وېران کەردېنۍ، باس چانەیە کەرۊن، کە ڕاسەن عەشق خەفەتەن، میحنەتەن، یانەوېرانېیەن، بەڵام شیرینەن، زەروورەن.
چوون بەچە بولبول، بېچارەی سەرسام
گفتوگۊی مادەر، شنەفتش تەمام
جە گوفتەی مادەر، کېشا ئاهی سەرد
ئاهش جە ئاسمان حەفتەمین وېیەرد
واتش: ئەی مادەر حەقت بە دەستەن
هەرگیز نېشی عەشق، جەرگت نەگەستەن.
نە چەشتەنی جام، جورعەی عەشقی مەی
بە شیرینی عەشق، نەبەردەنت پەی
عیشق تانە پەردە، جلووس کەرد ئاغاز
سوڵتان مەحموود کەرد، پەتیارەی بۍ ڕاز
کەسێ جورعەی جام عەشق نەوەردە بۊ
مەستی عیشق تاسیر، لېش نەکەردەبۊ
چېش مەزانۊ، عیشق چە تاسیر دارۊ
عومرش پڕوپووچ، زاییع مەویارۊ
دنیاو مافیها، ئاسمان و زەمین
پەی عیشق ئیجاڎ کەرد، ڕەبولعالەمین
تۊ چېش مەزانیی، عیشق چن دوڵبەرەن
شیرینتەر، جە شەهد، شیر و شەکەرەن
هەرسەرێ خاڵی، جە سەودای یارەن
ئەو سەرە لایېق، زنجیر ئەفسارەن
هەر سینە بۍ عیشق، بۍ ئەندېشە بۊ
ئەنبانێ مانۊ، پەڕ نە پېشە بۊ
سینە عیشقی دۊس، تېش نەبۊ جاگیر
واجیبەن کەردەیش، وە نیشانەی تیر.[1]