باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و چل و هەشتەمە
سەرەتاو کوچ و پېخامئاوەری و یاوەرەکاش پەی حەبەشەی.
میرزا ئۆلقاڎرو پاوەی، باس جە سەردەمو ساڵەو پەنجەمو پېغەمەرایەتی کەرۊن.
جەو دما حەزرەت تاج بەخشی شاهان
حەبیبی داوەر، شای ئەنبیاهان
پەردەی خەوفی شەرم جە مابەین وېیەرد
حوکمی نبوەت وە عام ئیزهار کەرد
لەعنەت کەرد وە بت، وە بت پەرستان
وە گرووی موشریک، ئەهلی سەرمەستان
قوڕەیش دېویان چوون ئاتەشپارە
پەی موسڵمانان جە هەر کەنارە
غەرەز وە هەرکەس فرسەت ماوەردەن
جە ئەهلی ئیسلام زەجر مەکەردەن
تا ئاخر حەزرەت شای خەیرەلئەنام
مەلوول بی جە داخ کەمدەسیی ئیسلام
فەرما: ئېوە کەم، کافر بۍ حیساب
مەبۊ خەلاسکەین، وېتان جەی عەزاب
گوریز دەن جە قەوم قوڕەیشی سەر کەش
ئېشەو هیجرەت کەین، بشین وە حەبەش
بەعزێ موهاجیر ئەوەڵ یاڼزە مەرد
چەنی چوار ژەن، ئەو شەو هیجرەت کەرد
نیشتن جە کەشتیی، بەرشین جە ئاوان
غەرەز تا بە موڵک حەبەشە یاوان
تا سوورەی(والنجم اذا هوی) هەم
وە لای پېخامبەر نازڵ بیی جەودەم
حەزرەت سوجدە بەرد شوکری خوڎا کەرد
موشریکان یەکیەک چەنیش سوجدە بەرد
پەی موهاجیران ئەی خەبەر بەردەن
واتەن موشریکان ئیمان ئاوەردەن
دیسان جە حەبەش هەم هیجرەت کەردەن
تەشریف پەی مەککەی شەریف ئاوەردەن
پەرساشان خەبەر جە ڕاهو یاران
جە حەزرەت جە قەوم، ئەهلی بەڎکاران
واتشان، بەل قەوم بە ئیتتیفاق
سوجدە بەردشان یەکسەر بە نیفاق
محەمەد چوون یاد خوڎای ئېمە کەرد
جەو بونە ئېمە هەم سوجدەمان بەرد
ئیسە قوڕەیشی عەداوەت داران
ئەر بگنۊ وە دەس یەکێ جە یاران
مەکەراش وە زەبح پەرێ بتخانە
پەی واتەی مەخلووق دەوری زەمانە
ئاخر ناعیلاج خایف و زەعیف
عەودەت کەردشان وە مەککەی شەریف
هەر یەکێ وېش وست وە یانەی کەسێ
هەر یەک پەنا بەرد وە سایەی شەخسێ
ئیللا عەبدوڵڵا بن مەسعوود نەبۊ
پەی موڵکی حەبەش گېڵاوە جە نۊ
دیسان هەم قوڕەیش هجووم ئاوەردەن
بینای عەداوەت هەم تازە کەردەن
دووبارە حەزرەت فەرماوا یاران
وە ئەهلی هیجرەت میحنەت گوزاران
مەزانوم هەر ئېد بەد بەتەر مەبۊ
موراجەعەت کەن، پەی حەبەش جە نۊ
بەرنەشین جە قەول فەرموودەی حەزرەت
موهاجیر دیسان کەردشان هیجرەت
بغەیر جە سیغار هەشتاد و دوو مەرد
چەنی یاڼزە زەوج شای مینای بۍ گەرد
کۊچ کەردەن یەکسەر جەو زەید و ماوا
تاکە ئەو کەلە حەبەش هەم یاوا
گوریز= لوای، ڕەمای.[1]