باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتاهەمە
ئا شەوە حەزرەت وېش یاونا یانەو ئەبوبوکری، دەقلبابش کەرد، دەربازەش پەی وازکریا، ئەبوبەکر پەرساش: یا خەیرەلبەشەر خەبەر دە پېم، خێرەن پی شەوۍ تەشریفت ئاوەردەن، حەزرەت فەرماواش: فەرمانم پەنەکریان مەشۊم ئېشەو ماواو مەسکەنمان (مەککە) جیابازمېن.
عەرەز هەر ئەو سات شای خەیرەلئەنام
وە لوتفی بېچوون بەرشیی جە توڕدام
دڵ وە زیکری زات حەیی دادگەر
یاوا وە قاپی سیدیقی ئەکبەر
دەقلبابش کەرد نەرمی دا ئاواز
تا ساحیب ئاما قاپی کەردش واز
بەرد وە ئەندەروون دەردەم ئەحواڵش
تا سیدیق ئاما وە ئیستیقباڵش
عەرز کەرد فیدات بام یا خەیرەلبەشەر
چە خەیرەن وەیشەو پېم بدەر خەبەر
حەزرەت واقیعەی موشریکان یەکسەر
بەیان کەرد پەرێ سیدیقی ئەکبەر
جوبرەئیل ئامان ڕوخسەت ئاوەردەن
ئېمەش پەی هیجرەت مورەخەس کەردەن
ئەر نامەحرەمی هەن جە ئەندەروون
مەبۊ جەی خەڵوەت بشوو وە بەیروون
ئەبوبەکر وات: نامەحرەم نېیەن
ئەهلی من بە تۊ هەر مەحرەم بېیەن
غەیر جە عائیشە سیدیقی ئەعلا
چەنی هامشیرەش، یانی ئاسما
باقی نە جە خوېش، نە جە بېگانە
دیاری نېیەن جە بەندەخانە.[1]