وەڵۍ ئانەی نامونیشانت فاڕی، ۋیرت فاڕە
مەگېڵناوە، فرەو وەختی سوقرات وەردەمو دەربازەو شارو ئەسیناینە نیشېرە و خېرئامای لاییدەکا (بېگانە) کەرۍ، ڕوێشا لاییڎێوە ئاما و لوا پەی لاو سوقراتی و پەنەش ماچۊ: من گەرەکمەن شارو شمەنە نیشتەجا بوو، پەنەم واچی ئی شارەو شمە خەڵکەکەش چەنینەن؟
سوقرات پەرساش: زېدو وېتەنە خەڵکەکۍ چەنینېنۍ؟
پیای بېگانە ماچۊ: خەڵکێ فرە خاسۍ نېیەنۍ، درۊزنۍ، فېڵبازۍ، دزۍ، وەرو ئانەیەن ماواو وېم جیائاستەن.
سوقراتی ژیر ماچۊ: خەڵکو ئېگەیچ هەر پاسېنۍ، گەر یاگۍ تۊنە بیێنا، گەشتەکېمەنە بەردەوام بېنا.
کەمێ دماتەر، بېگانێوە تەر ئاما، ئاڎییچ عەینو پەرسېش کەردە سوقراتی جە بارەو خەڵکو ئەسینای، سوقراتیچ دیسان پەرساش: مروڤەکۍ شارەکەو وېت چەنینېنۍ؟
کابرا ماچۊ: بۍ کەموکوڕېۍ، یارمەتی یۊترینی مڎا، ڕاسواچۍ و زەحمەتکېشېنۍ، من گەرەکمبۍ یاگەکا تەرو دنیێ بوینو، پەوکەی شارەکەو وېم جیائاستەن.
سوقراتیچ ماچۆ: ئېگەیچ هەر پا شېوە، دڵنیابە پېسە شارەکەو وېت خەڵکەکەش عالو خاسەن.
وېما چەنینۍ بیمۍ، دنیاچ هەر چامنېنە، گەر خاوەنو ۋیرو ئەندېشێ خاسی بیمۍ، خەڵکیچ هەرپاسە وینمۍ، بە عەکسیچۆ هەرپاسەن.[1]