نویسەر (عەلی حسێن فەیلی) جە نامیلۍ (هۆرامان دەربازەو مېژووی) نە ماچۊ:
جە باسو زوانەوانینە گەر گۆرە شاعېرەکېما بە زاراوەو هۆرامی ئا شاکارېشا نەخولقنێنۍ، ئەی مەشوم هاناشا پەی چ زاراوێ تەرو کوردی بەردێ؟.
دیسان ماچۊ: (زاراوەو هۆرامی تەنها زاراوێن کە دلۍ کوردینە پېناسێوە مەزهەبی پېسە زاراوەکاتەری هورنمەگېرۊ و سنوورش فراوانەن. پېسە مەزانمۍ ناوچەو سورانی و سورانی زوانەکۍ موسوڵمانۍ شافیعی مەزهەبېنۍ، هەرچی لەک و لوڕ و فەیلی و کەلهوڕیۍ هەنۍ موسوڵمانۍ شېعە مەزهەبۍ و گوران و قەڵخانیۍ ئەهلو هەقینۍ، بەڵام زوانی هۆرامی زوانو ئەدەبیاتو گردیشان بېیەن، تەنانەت زوانو شېعرۍ و هوربەسو ئاوازو ئایینە کونەکا بېیەن کە ڕیشەشا مەگېڵۊوە پەی وەڵۍ ئیسلامی و هەڵای بەشێشا پارېزیێنۍ، ئەرۍ مەتاومۍ واچمۍ هۆرامان زایېنگاو زوانی شېعری و کوردایەتین؟ شونە هەوارو تارېخەکەیمانەو بە مانێوە ژیوگاو فرە هەستیارو ۋیریارا گەلەکەیمانە؟
هۆرامان یانەو ئا واچانە کە بە جوانتەرین شېوە ئاوازو یەکتاپەرەسی و پەسەڼیی سرووشتیش پەنە وچیان.. زوانی هۆرامی زوانێن کە بەختەو مەنەیۆش هەنە جە گەشەکەردەی و دەسەڵات بەخشای بە خاوەنەکەیش، بە بۍ مدرای، تاکو وەختێ زوانو ئېمە پېسە زوانو سیاسەتی و زوانو فەلسەفەی و زوانو بازرگانی پی تەرزەو ئیسەیە تەماشەنەکریۍ، زوانی هۆرامی تەنیا زوانو شېعرۍ و ئەدەبی بۍ، بەڵکم زوانو ژیوایێ ڕیشەداری بۍ کە هەڵای زیڼەن.
هەر جە هەمەدانۆ گېرەشتاکو مەیاوۊ کرماشان، لوڕستان، ئیلام، سنە، تاکو دەڤەرو موکریانی، چیلایچۆ جە هەڵەبجۆتاکو مەیاوۊ سلېمانی و کەرکووک، تاکو چن دەیۍ وەڵۍ ئیسەی هەرچی شېعرۍ واچیێنۍگرد بە زوانی هۆرامی بیېنۍ، ئا مەڵبەندە پان و بەرینە کە حەشیمەتێ فرەش دلۍ وېشەنە گلېرکەردەبێ، جە ڕاسینە زوانو ئەدەبی و واچەییشا هۆرامی بېیەن، کەچی وېشا هۆرامی زوانۍ نەبیېنۍ.[1]