تەپەدووی دووکەڵ...
دووکەڵو داخا، جۊشیای دەروونیش، کزەو دەمەو هەناساش، ساراو دەروونو میرزا ئۆلقاڎریشان پۊژنان، پېسە دەماوەندی، پېسە تەپو دووکەڵو سۊتەی ساراو کەشی، چانەی زەحمەتتەر دڵشەن، کە گومەن. ناهەقش نېیەن، دڵێ دووکەڵی و دەمەو هەناسەی پۊژنابۊرە، چکۊ دیارەن. میرزا بە بەرۋستێ ناسکی شاعېرانە داوا جە وەشەویسەکېش کەرۊن: پەی نەجات بییەی دڵیش دلۍ ئا جەنگەڵو دووکەڵینە، مەر ئاڎە یاڎش بکەرۊ، ماچۊ: یاڎەکېت پېسە باڵداری جە شەققەو باڵا بڎان و پەروازکەران، بەیان پېسە شەماڵی یان نەسیمی، ڕوو بنیان وە ڕووی سیای پەڕ جەنگەڵ، بەڵ وېرانکەری دووخانەی دووکەڵ، بەشەققەو باڵاش تەپوودووکەڵ دوورۋزاوە، ئا وەختە شاڎ مەبۊوە بە دڵیم.
تەپەدووی دووکەڵ دووخانەی دەردم
کزەی دەمەی وشک هەناسەی سەردم
پۊشان دەشت و دەر هەوارگەی دەروون
هەم نادیارەن دڵەی پەڕ جە هوون
مەر هەر یاد تۊ، هەی ئاوات وەستەم
بزانۊ جە کۊن، دڵەی دەربەستەم
بەیۊ چوون شەماڵ ڕۊح ئەفزای کاوان
یا وېنەی نەسیم، سوب نە شەتاوان
سەڵح هەر ئیڎەن وە یادم باری
یادت یادم بۊ، پەی یادگاری
ڕوو بنیەی وە ڕووی سیای پەڕ جەنگەڵ
وېران کەر وە باڵ دووخانەی دووکەڵ
دیسان یانەی دڵ جە تۊز و تەم‌دا
جاڕو دەر نەجای دووخانەی خەم‌‌دا
وەرنە تا مەحشەر دڵ زامش وەردەن
نادیار دەم، دووخانەی دەروەن
فڎای یادت بام سا کۊن کەی تا کەی
دڵ بی وە کوورە، با یاد تۊ بەی
یادم کەر وە یاد ویەردەی جاران
وەسۆز سەودای شەرت و شۊن داران
ئەر سەد کە وە یاڎ قەڎیمت شادم
توو خوڎا با نەشۊ، یادت جە یادم
شەوان تا وە ڕۊ، یادم جە لاتەن
دەک بە ڕەحمەت بۊ مەعدوومی واتەن
(چ حاجەتەن دەس پەی قەڵەم بەروون)
(یادم نمەشی چەنیت یاد کەروون)
بەڵام جەلای دڵ کۊی مەوبەت شادت
زەحمەت مەندە بۊ، یادم جە یادت
یادت بۊ وەخەیر شای شیرین ڕازان
ئەی دەرمان دەرد گرد ماران‌گازان
چەوساوە باڵات جە لام پېوارەن
ڕۊشنی دیڎەم تەمامی تارەن
فیراقت فەرقم مەڕدەن وە هەم‌دا
دووریت دڵ‌کېشان وەلیتەی خەم‌‌دا
ئەرپەرسی ئازیز چوون جاران جاری
یانی های دووریت نەکەردەن کاری
زینده و سڵامەت نەی دنیای بېپۊ
مەگېڵان وە شۊن عەشق باڵای تۊ
تەنیان ڕشتەی تار تای نائومیدی
حازەر کەر پەرێم کاڵای سفیدی
هەر کاتی زانای خاڵ فل فل دانە
نەفەس پەرواز کەرد نە قەفەس‌خانە
پەژاران شه و، خەیاڵان ڕۊ
دەردی بۍ دەرمان ئېش دووری تۊ
جەور و جەفا و خەم، باری نەدامەت
گرد کەوت ئه و دیوان سارای قیامەت
دەخیل تا ئەروام کەمی باقیەن
تا دەور چەپ‌گەرد بادە و ساقیەن
یەک تار جه و کەڵاف سیای ئەشەد بۊ
پاسەبان دەور شەمامە و لیمۊ
بکیانە ئامان پەی زام کاریم
پەی وەیویر گەرم زایەڵە و زاریم
بەو شەرتە ڕەقیب نەدەروت بازی
بەڵکەم بمانۊ پەی تیرئەندازی.[1]