شنۊی سەحەر خېز
بەشۍ دوەمە
میرزا ئۆلقاڎر، دمای تاریفدای شنۊی سەحەر خېزی، داواش وەنەکەرۊن بگنۊ ڕا، یاگ بە یاگ، مەنزڵ بە مەنزڵ، کەش پەی کۊی، دەگا پەی دەگای، زانیاریش مڎۊ پەنە سەرشارە گوزەر کەرۊن، چن یاگێچشانە لابڎۊن.
سادەی وېت‌ئاسا هۊرزە ئاخېزکەر
مدارا مەکەر وە یاڎی دڵبەر
زلان بەدحاڵەن، هیچ خۊفت نەبۊ
ڕوو بنیە نەڕای هەرد شاهۊ کۊ
چوون بەرق پەڕجۊش سەنگ دەر وە ڕووی سەنگ
(تەنگیبەر) تەی کەر هیچ مەبەر وە تەنگ
دمای (تەنگیبەر) رووکەر وە شاوە
جە دووی هەناسەم وە ناڵە ماوە
سەراوکۊی ستەم تەیکەر وە هەر حاڵ
چاگە ۋیەردی (هانیەن) شەماڵ
بە ئاهوو ناڵەی بېسامانەوە
هەردان وەر زەردان دەنگ بڎانەوە
ماباقی کۊوان باوەر نە لەرزە
تا شۊ وە سەر تەخت (هەوارە بەرزە)
ساتێ ساکن بە بڎیە سەرکاوان
بشنەوە وە گۊش ناڵەی شەتاوان
ساراکەی (مەیگا) تەیکەر وە دەوان
تا مەشی وە سەیر گۆمی (سیلکەوان)
مدران چوون عەممان مەوج مەڎۊ وە هەم
وېنەی چەمە چەم بۍ زیاڎ و کەم
ڕاهی بەر نە ڕا چەویچ گوزەر کەر
مدارا مەکەر وە یاد دوڵبەر
ئەو ڕای ناهەموار سەخناخان چۊڵ
یولغار دەر وە جەخت تا وە (پیازدۊڵ)
ئانە هەوارگەی مینگەی جافانەن
مەنزڵگای قەدیم زوڵف کەڵافانەن
یاگەی نەزاکەت مەە جەمینانەن
تەسکین وەباڵای دڵ‌خەمینانەن
یاوای (زاوڵی) لاڎێ بناڵە
تووخوڎا تەنخودای من پەی کۊی (قەزاڵە)
سەرمیل (کرند) دیارگەی (ڕوان)
(ڕیزە) و (سارابەن) (کویڵە) و (ماکوان)
سەوزان (لەیلاخ) دیارەن جە دوور
(کەلی عاشقان) (زەڵم) و (شارەزوور)
گۆل (زریوار) سارای (ڕازیان)
کۊی (قەڵاقازی) ملەی (بازیان)
(زویری) پارچەی (وەیس یەمەن‌ماڵ)
قوڵەی (پیرڕۆستەم) (هەیبەتوو ساراڵ)
نەحیەی (جوانڕۆ) تا دەشتی (زەهاو)
بەند (قەرەداخ) (سەرکوڕەی کاژاو).[1]