بنەچەو بەگزاڎەکا هۆرامانی
بەشۊ چوارەمۍ
میر سەعید(میر جیاشا):
بە پاو سەرچەمە تاریخیەکا، میر سەعید چا ساڵېنە کە تاتەش کۊچی دمایینش کەردەن تەمەنش(18) هەژدە ساڵۍ بییەن، ساڵەو(698ک/ 1298ز) دەسەڵاتش جە دەس گېرتەن، ئی میرە پیێوە ئایین ئەشناس و ئیماندارێ کەم وېنە بییەن، دەسێ باڵاش بییەن جە ئاوەڎانکەردەیۆ هۆرامانی و بنیاڎنیای چڼین قەڵێ و قولا، جە دامانو شارو هۆرامانینە مزگیێش وەشکەردەن بە نامۍ مزگی(میر جیاشا)ی، سەردەمو حوکومداری(میر سەعید)ینە هۆرامان فرە هېمن بییەن و ئاسایېش باڵش کېشتەن ملشەرە، دیسان ژمارێ جە پیرەکا هۊرامانی چا سەردەمەنە ژیوێنۍ و بە ئازادانە پەیلوا و ۋینگا عیرفانی و فەلسەفییەکۍ وېشا بەرۋستېنۍ.
تەنیا قومیێوە گۆرە کە جە سەردەمو حوکومڕانی ئی میرەینە ئاسایېشو هۆرامانیش تېکدابۊ، لەشکەرکېشیە گۆرەکەو(مەئموون بەگو ئەردەڵانی) بییەن کە هۆرامییەکۍ بە(بەگە مامونە) نامېشان بەردەن، بەڵام ئا لەشکەرکېشییە هیچ ئەنجامێش نەبییەن، دمای یەرۍ ساڵا جە تۆقدای مەڵبەنو حوکومڕانی(میر سەعید)ی، بە مەڵامەتو وەرگیری ئازایانەو خەڵکو هۊرامانی و کۆتەرەی نەۋەشی و گرانی دلۍ سوپاکېشەنە، مەئمون بەگ مەڕیاو فرەو سوپاکېش دلېنە شییە.
خەڵکو هۆرامانی ۋەراوەر پا سەرکەوتەیە ملوو لەشکەرو مەئمون بەگیرە، دوۍ دېڕۍ شېعرەشا واتېنە، هەرچن نامۍ واچەرەکەیش گومەنە، بەڵام تا ئیسەیچ ئا شېعرۍ سەرو زوانو خەڵکو هۆرامانیۆ واچیۊن:
نە بەگە مەئمون نە تەیموری لەنگ
هیچ کەس هۆرامان نەگېرتەن بە جەنگ
غێر جە خان ئەحمەد بەگلەری خانان
ئاڎییچ بە دهۆ(حیلە) گېرتەن هۆرامان.
دمای حوکمڕانیێ دوور و درېژی (100) سەڎ ساڵا، ساڵەو(799ک/ 1396ز) کۊچی دمایینش کەردەن.[1]