واتەو گۊشگېرتەی مېیانو ئاسمانی و زەمینی
بەشۊ یەرەمۍ
ئاسمان ئاماوە جواب، واتش ئەی زەمینی سەخت، من یاگەی زیکرو فریشتەکانا، خوڎای گۆرە جە قورئانەنە یەکەمجار نامۍ منش ئاوەردېنه، ئینجا نامۍ تۊ، من خاوەنو هەور و ۋارانینا، تۊ چەمەڕایی من کەرین پەی قەترێ ئاوۍ، تۊ باسو بەرهەمئاوەردەی میوەجاتی کەرین ۋەراۋەر بە من، ئەی تۊ نمەزانی گەر من ئاوۍ نەۋارنۊ، تۊ ئا ڕەنگە جوانۍ و ئا سۆزایی و میوەجاتەیە چکۊ مارین؟
ئاسمان هەم دیسان ئاماوە، وە دەنگ
واتش هەی زەمین، وەنەت وارۊ سەنگ
تۊ زەمین سەخت من ئاسمانم
جای زیکر و تەوحید مەلایەکانم
خوڎا جە کەلام قەڎیم وە چن تەرز
ئەوەڵ وات (سەما) دوەم واتش (ئەرز)
من ۋېنەی خواجەم، تۊ ۋېنەی بەندە
جەلای وەسف من هەر سەر ئەفکەندە
دایېم پەی هەورم ئومېڎەواری
پەی تاو ۋاران هەر ئینتزاری
ئەر من نەڕېزنوو سەیلاو ۋاران
تەرزە تاو و تۊف، وەفر کۊساران
تۊ چ تەور مەبۊت ئه و ڕەنگ و شېوە
جە کۊ ماوەری مەزرەعە و میوە؟
نەباتات مەبۊ تەمام سەرگەردان
گرد مەبۊ وە پووش سفتەی سەر هەردان
ئەر ساڵێ سەیلات نەوارۊ جە سەر
مەبۊ وە قاتی ڕۊی (یەومەلمەحشەر)
ئەر ڕۊزی مەخلووق مەخفی و هوەیدا
یەکسەر جە زەمین گرد مەبۊ پەیدا
جە سەیل ڕەحمەت چەرخ ئەفلاکەن
جە سەر مەوارۊ بەهانەش خاکەن
مەر نەپەرسانت جە لای ئەهل شەرع
من (فەرقم) ، تۊ (پا) ، من ئەسڵم، تۊ فەرع
زەمین من پەی تۊ، سەڎ دەلیل ماروون
ستارەی شەریف ماه و خور داروون
ڕاسەن چە پېواز چەرخ چەپگەردم
شەشدەر گرد چېو، ها نە تاس نەردم
حەرفم جە لای حەق خەیلێ پەسەڼڎەن
دنیا وە گەردش چەرخ من بەڼڎەن
ماوای (موفەڕیح) جەبەرووت دارون
چن ئیقلیم نوور مەلەکووت دارون
زەمین سا تۊ چن ئەزەڵ مارەنی
زەمین تۊ بۍ شەرم، ڕوو نەهارەنی
سا تۊ چېشت هەن ئەی زەمین شیت؟
بوانە تۊمار نائومېڎی ۋېت.[1]