$ڕووداویش هەڵە دەکات$
#هێمن عەبدوڵڵا 2#
#26-05-2014#
ڕادیۆ و تەلەڤزیۆنی ڕووداو خەریکە تەمەنی دەبێتە ساڵێک. ساڵێک کە مانایەکی نوێی بە وشەی میدیا بەخشیوە لە کوردستان و زۆر شتی گۆڕیوە. بەڵام ساڵێکیش کە تێیدا ڕووداو هەڵەشی کرد و پێویستە بەخۆیدا بچێتەوە.
بەخۆداهەڵگوتن خراپە، بەڵام خۆهەڵسەنگاندن تەنیا بە لەبەرچاوگرتنی لایەنە خراپەکان ناکرێت. بۆ نموونە ڕووداو وای لە بینەری کورد کرد کە چیدیکە بە هەواڵی کۆنی بۆ ئێوارە ئامادەکراو ڕازی نەبێت و لەوە تێبگات کە هەواڵ وەکوو نانی ناو تەنوور وایە، کە ساردبووەوە چیدی نوێ نییە.
جاران لە کوردستان ڕووماڵی زیندووی هەواڵ بۆ بۆنە تایبەتەکان بوو، بەڵام ڕووداو ئەوەی نەهێشت. بۆیە ئێستا بینەر و بیسەری ڕووداو کە تەلەفۆن دەکەن و نامەمان بۆ دەنێرن، گلەیی ئەوە دەکەن کە بۆچی فڵان هەواڵ لایڤی لەگەڵ نییە و بۆچی فیسار ڕووداو ماشێنی گواستنەوەی پەخشی ڕاستەوخۆی بۆ نەنێردراوە. بۆ یەکەمجار لە مێژووی میدیای کوردیدا، لەژێر کاریگەریی ڕووماڵی ڕووداودا بۆ خۆپیشاندانێکی شارۆچکەی سەیدسادق، بەرپرسانی ئیداریی ئەو ناوچەیە دەستیان لەکارکێشایەوە.
جاران کە لە کوردستان هەڵبژاردن دەکرا، هاونیشتمانی کەمترین زانیاریی چرکە بە چرکەی لەسەر وەردەگرت و تەزویرکاری ئاسانتر بوو. ڕووداو ئەوەی لەقاو دا و بینەر و بیسەری دڵنیاکردەوە کە چاو و گوێی ئەوان دەبێت بۆ چاودێریکردنی هەڵبژاردن. شانازیی ئەوەشی پێبڕا کە ئێستا تەلەڤزیۆنە لۆکاڵییەکانی هەرێمی کوردستان هەر لە ستایلی گرافیکی هەڵبژاردنەوە تاوەکوو دەگاتە ڕووماڵی ڕاستەوخۆ و دیبەیت و پرۆمۆی تەلەڤزیۆنییان لە ڕووداوەوە فێر بن.
نوکتەیەک هەیە دەڵێت: “کۆمیسیۆنی هەڵبژاردن ئەنجامەکان لە ڕووداو وەردەگرێت”. هەندێک میدیاکاریش ڕەخنەی ئەوەیان لە ڕووداو گرت کە ئەو ماستە موویەکی تێدایە و چۆن بەر لە کەناڵەکانی دیکە زانیارییەکانی دەستدەکەوێت. ئەم ڕەخنەیە وەکوو ئەوە وایە دوو کاسبکار هەبن، یەکێک بزانێت چۆن کاسبییەکی باش بکات و یەکێکی دیکە تەمبەڵی بکات. دوایی تەمبەڵەکە گلەیی لەوی دیکە بکات کە بۆچی هێندە دەوڵەمەند بووە. چونکە یەکێک لە نهێنییەکانی سەرکەوتنی ڕووداو لەو فراوانیی سەرچاوە تایبەتانەدایە کە هەیەتی. بۆیە ڕاست وایە میدیاکانی دیکەی کوردستان، وەکچۆن لەتەکنیک و نێوەڕۆکدا زۆر شت لە ڕووداو فێربوون و ئێستا بەکاریدەهێنن، ئاواش لە دۆزینەوەی سەرچاوەی ورد و گەیاندنی زانیاریی خێرادا شتێکی لێوە فێربن.
ڕووداو هەڵەشی هەن. یەکێک لەوانە ئەوەیە کە لە ماوەی ساڵێکدا نەیتوانیوە هەموولا وەکوو یەک قایل بکات بەوەی بڕوا بە پەیامە نیشتمانییەکەی بهێنن. بڕیاروایە ڕووداو دەنگ و ڕەنگی کوردی هەر چوار پارچەی کوردستان بێت و لەگەڵ هەموو لایەنەکاندا یەک مەودای هەبێت، بەڵام ئێستا لایەن هەیە نەک ئامادەنییە هاریکاریی ڕووداو بکات، بەڵکوو پەیامنێرەکانیشی دەگرێت و لە ناوچەکانی ژێر دەسەڵاتی خۆیدا دەریاندەکات. ئەمەش ڕاستە زیان بەو لایەنە دەگەیەنێت، واش لە ڕووداو ناکات بچێتە بەرەی دژایەتیکردنی ئەو لایەنەوە، بەڵام دەکرا ئەو ڕەوشە درووستنەبێت و زووتر ڕێگەی لێبگیرێت.
هەڵەیەکی دیکەی ڕووداو ئەوەیە کە هەندێکجار پرەنسیپی دووجار دڵنیابوونەوە لە ڕاستی و درووستیی هەواڵ دەکاتە قوربانی زووتر لە هەمووان بڵاوکردنەوەی. بۆ نموونە لە ماوەی ڕابردوودا ڕاپۆرتێک لەسەر تەندرووستیی بەڕێز #مام جەلال# بڵاوبووەوە کە ڕەنگە خێزانی تاڵەبانیشی نیگەران کردبێت، بۆیە شەرم ناکەین داوای لێبووردنیان لێبکەین.
ڕووداو بڕیاریداوە لە هەر وەرزێکی نوێیدا نوێکاری بهێنێتە نێو میدیای کوردییەوە. ئەمە بڕیارێکی قوورسە و بەڵێنێکی ئاسانیش نییە بە بینەران و بیسەرانی بدەیت، بەڵام ڕووداو ئەمە دەکات و دڵنیاشە دەتوانێت تێیدا سەرکەوێت. بۆیە لە دووەمین ساڵی تەمەنیشیدا دیسان “چاوێکتان لەسەر شاشەی ڕووداو و گوێیەکتان بە ڕادیۆی ڕووداوەوە بێت”!
[1]