ناونیشان: کوردیش لەگەڵی ڕادێ
نووسەر: #هێمن عەبدوڵڵا#
ڕۆژی دەرچوون: #25-08-2019#
جاران لەنێو کورددا وشەی دەمڕووت جوێن بوو. بەو کەسەیان دەوت کە هێشتا سمێڵی نەهاتبێ و منداڵ بێ و ئەزموونی نەبێت. کەچی ئەم هەفتەیە ڕۆژنامەی (ئێن ئێر سێی هاندڵسبڵاد) ی هۆڵەندی بە بایەخەوە لێکۆڵینەوەیەکی بڵاوکردبووەوە و ئەنجامگیرییەکەی ئەوەبوو کە لە هەموو جیهاندا سەردەم سەردەمی سەرکردە دەمڕووتەکانە. ئەمە بۆ کوردستانیش ڕاستە، بەڵام بە دیوێکی تایبەتدا.
سەرکردە نوێیە دڵخوازەکان کۆمەڵێک تایبەتمەندیی هاوبەشیان هەیە: زۆر گەنجن و زۆرتر کچن و ئینگلیزیش دەزانن. بیر لە نادیە موراد بکەنەوە. لەوە گەڕێ کە خۆی پێ کورد نییە، بەڵام جیهان لەجیاتی هەموو ژن و پیاو و منداڵێکی قوربانیی دەستی توندئاژۆیی ئیسلامی، نادیە دەناسێت و وەک سەرکردەیەکی ڕێزلێنراو لە کۆڕ و کۆمەڵی نێودەوڵەتی ڕێگەی دەدرێ قسە بکات. یان بیر لە مەلالە یوسف بکەنەوە، ئەویش دیسان کچە و گەنجە و ئینگلیزی دەزانێ و لەدنیادا بووەتە نوێنەری ئەوانەی لەپێناوی چوونە قوتابخانەدا زوڵمیان لێکراوە و داوای مافی خۆیان دەکەن.
یەکێک لەو نموونانەی دیکە کە دنیای بەخۆیەوە سەرقاڵ کردووە و بە ملیۆنان کەس پێی کاریگەرن، گرێتا تونبێرگی سویدییە. ئەو کچێکە تەمەنی حەڤدە ساڵە و لە سویدەوە ڕێبەرایەتی تەڤگەرێکی جیهانی دەکات بۆ پاراستنی ژینگە. هەر لەژێر کاریگەریی ئەودا ڕۆژانی هەینی قوتابییان لە زۆر شوێنی جیهان ناڕۆنە قوتابخانە و چالاکیی ژینگەدۆستانە دەکەن.
ڕاستییەکەی ئەوەی لە دنیادا هەیە بە ڕێکەوت ڕووینەداوە و بەرهەمی دەستپێکردنی سەردەمێکی نوێیە کە بەقەولی جاران سەرکردە دەمڕووتەکان نوێنەرایەتی دەکەن. ئەو سەردەمە وادەکات کە چیدیکە بۆ دڵدانەوە و هاندان گەنج نەیەنە پێشەوە، بەڵکوو واقیعەکە ئەو هاتنەپێشەوەیەیان بچەسپێنێ. بۆیەش ئەوەی کە سەرکردەیەکی سەرسپی بڕوای بە توانای گەنج هەبێ و پشتیان بگرێ، چیدیکە لە جوامێری و باشیی سەرکردەکە نییە، بەڵکوو لە ناچاری و خۆگونجاندنە لەگەڵ دۆخێک کە وردەوردە جێگەی ئەوی تێدا نامێنێتەوە.
نەوەی نوێ بە تەمەن هەڵناسەنگێنرێ. چونکە چیدیکە دایک و باوک تەنانەت لە پەنجا لەسەتی پەروەردەکردنیشیاندا ڕۆڵ و دەسەڵاتی نییە و نازانێ ئەوەی لە دنیای دیجیتاڵییەوە فێری دەبێ چییە و چۆن فێری بووە. من کوڕە سێ ساڵییەکەم هەندێک دەستەواژە و دەربڕینی ئینگلیزی بەکاردەهێنێ لەگەڵمان کە هەرگیز چاوەڕوان ناکەم بیزانێ. ئەو لەئێستاشەوە ڕای هەیە لەسەر هەموو شتێک و زۆرجار تەواو پێچەوانەی ئەوەیە کە ئێمە پێیدەڵێین و لێی چاوەڕوان دەکەین. بەڵام ڕاستییەکە ئەوەیە کە ئەو سەر بە نەوەیەکە خۆی زۆرتر لە دایکوباوکی خەریکی پەروەردەی خۆیەتی و کە گەورەش بوو، مەرج نییە بڕوای بە هیچ بەهایەک هەبێ لەوانەی بۆ نەوەی ئێمە پیرۆز و نەگۆڕن.
لە کوردستان لەبەرئەوەی ئەهلی خوێندنەوە کەمن و سۆشیالمیدیاش حیزبەکان مۆنۆپۆلیان کردووە، سەرکردەی گەنجی دیجیتاڵی بە کەمی دەردەکەون. بەڵام لەبەرئەوەی گۆرانی و میوزیک مۆنۆپۆل و بەحیزبیکردنیان سەختە، بۆیە دەبینیت سەرکردە گەنجەکان لەو بوارەدا دەردەکەون. ئەوەی نەڤید زەردی لە نوێترین گۆرانییدا باسیدەکات و دەڵێ کوردیش لەگەڵی ڕادێ و شەڕە دۆڕاوەکەی مەلاکەش لە دژی ماریا هەورامی نیشانەی ئەوەن کە فیگەری گەنج و یاخی و دەمڕووت لە کوردستان دێنە پێشەوە و کوردیش لەگەڵیان ڕادێ. [1]