ڕۆژی سێشەممە #23-05-2023#، کەمال محەمەد ساڵح، وەزیری کارەبا پێشوازیی لە د.تۆرکیلد بیوگ، نێردەی یەکێتی ئەوروپا لە ئێراق و بەرپرسی نووسینگەی پەیوەندییەکانی یەکێتییەکە لە #هەولێر# کرد.
لە دیدارێکدا باسیان لە هەنگاوەکانی پشتبەستن بە بەرهەمهێنانی کارەبا بە وزەی خاوێن و وزە نوێبووەکان و دانانی وێستگەی بارگاویکردنی ئۆتۆمبێلی کارەبای لە هەرێم کرد.
وەزیری کارەبا ڕایگەیاند، لە کابینەی نۆیەمدا، هەزار و 928 مێگاوات کارەبا بە شێوازی ژینگەپارێزی بەرهەم دەهێنرێت کە دەکاتە لە 79%ی سەرجەم بەرهەمهێنانی کارەبا لە هەرێمی کوردستان.
کەمال محەمەد ئامادەیی وەزارەتی کارەباشی بۆ پێدانی مۆڵەت و کارئاسانی بۆ ئەو کەسانە پیشاندا کە دەیانەوێت وێستگەی بارگراویکردنی ئۆتۆمبێلی کارەبایی لە شارەکانی کوردستان دابمەزرێنن.
نێردەی یەکێتیی ئەوروپا هەوڵەکانی وەزارەتی کارەبای بۆ پاراستنی ژینگە و ڕێگرتن لە گۆڕانکاری کەشوهەوا بەرز نرخاند و داوای کرد لە ڕێگەی وێستگەکانی ژینگەپارێزییەوە زیاتر گرنگی بە پاراستنی ژینگە بدرێت و کارئاسانیش بۆ زیادکردنی وێستگەکانی تایبەت بە بارگاویکردنی کارەبا بۆ ئۆتۆمبێل بدرێت. [1]