بەرویری تازە
نویستەی: #سابیر عەزیزی#
ڕەنگە حیچ مەرزێوە ئڼەو خزمەت بە کۊمەڵگای و ئینسانی وتېکەڵی چەنی هەرمانەی فەرهەنگی و ئەدەبیۍ وەشتەر و کامڕەوا و شیرینتەرە نەبۊن، ئاسایین وینگاکۍ چی بارەوە جیاوازۍ بان، بەڵام چانەی هاندەرتەر و فەخراویتەر نېیا تاوی بە یاگۍ و زەیدوو ئەڎا بېیەیت خزمەت بکەری، بەرزایی ئاواتەکات جە شاهۊوە شنەشا بێ و تۊیچ دەسماڵە سوورەو سەماو هەرمانېت چی ڕاسەوە ئەشکاوەبۊ. پەی وېم ئینە ششەمین بەرویرما چاپبۊ و مەینە دلۍ کتېبیانەو هۆرامانی، بەڵام ئی دمایین بەرویرە (فەرهەنگوو نامۍ یاگەکاو دەگاو هانەگەرمڵەی) بەڕاسی شەوق و وەشیێ تایبەت و سەرکەش و ئایېراویش بۍ. فەرهەنگوو نامۍ یاگەکاو دەگاو هانەگەرمڵەی دماو چوار ساڵا زەحمەت و شەکەتی و شۊنگېرتەی و پەیجۊرکاری، بە هەمکاری و هەمڕایی تاقمێ جە ئازیزا و خەموەراو دەگاکېما چاپ و تېکەڵ بە کاروانوو کتېبیانەو هۆرامانی بی. ئومېڎ هەن گرڎ پېوەرە بتاومۍ جە چاپی دماینەنە کەم و کوڕیەکاش لا بەرمۍ و خاڵە ئەرینەکاش پەرە پەنە دەیمۍ.
پەی هاگاداری دۊسا، تاودۍ جە دوکانوو موبلمانوو فەرهەنگینە شاروو مەریوانی- خیابانو کومیتەو ئیمدای، وەرانوەروو مەرکەز بێهداشتی وزدېش دەسو وېتا.
پەنەوازا جە زەحمەتوو ئازیزا کاک ڕەحمان ڕەحمانزادەی، کاک شەهریار شەریفزادەی و فرەیەتەر جە ئازیزا نامەکېشا دمایین لاپەلەو کتېبەکەینە ئامێنە، حەر پاسە جە ئینتیشاراتوو زایەڵەی کە بەڕاسی پاڵپشت و یاریدەرێ هېقما پەی چاپوو کتېبی هۆرامی سپاس و پەنەزانای وېم پېشکەش کەروو.[1]