چەمەڕاو کاسە هامسای بی، ئاورایېنە مری
کاسە هامسا باوێ کۊنی دلۍ کۊمەڵو کوردەواریەن، جاران چوونکوم پېوەڼییە کۊمەڵییەکۍ پتەوۍ و مەحکەمۍ بېنۍ، چوونکوم هامکاری کەردەی مېیانو خەڵکینە باو بۍ، ئیتر خانەوادەکۍ فرە هۊگرۍ یۊترینی بېنۍ، ڕوانە پېوەرە خەریکۍ هەرمانەو دلۍ باخەکا، یان خەریکۍ پیشە دەسییەکا بېنۍ، شەوېچەنە دمای نان واردەی بە شۆنشینی لوېنۍ سەردای یۊترینی، ئیتر شەوېنە بە دەمە تەقۍ و کڵاش چنیەی شەوە ویەرنېنۍ، گەر هەر واردەمەنیێ تاسۊخ، یان بۊندار پېسە گۊشتیشا بیێ نەتاوېنۍ بەبۍ یۊترینی بوەراش، وېرەگا چەنی بانگو مەغریبی ئانەی کە بېشا کەرېنېش دلۍ کاسێوەو کېیانېنېش پەی یانە هامساکەیشا، ئاڎییچۍ کاسەکەی گل دېنێ تاکو واردېوە خاسشا بیێ و پەیشان پەڕ کەرېنێ و پەیشان کێیانېنێ. ڕاسەن کاسە هامسا لەزەتیەن، گەر عەینو واردەی حازر بیێ، بەڵام زارۊڵەکۍ هەر حەزشان جە چاشتەو هامساکەیشان بۍ.
کاسە هامسا بەشەری تېر نمەکەرۊ، چوونکوم کەمەن، فرەو جاری پەی ئانەیەن کە نۆسو هامسایەکا نەلۊ سەرشان.
وەڵینا واتەن گەر بەتەماو کاسە هامسای بی، ئاورایۍ مەمری، فرە ڕاسەن، مەشۊم ئینسان پەشتی بە وېش ببەسۊن، تەماڎارو خەڵکی نەبۊن پەی ژیوای وېش و ژەن و زارۊڵاش.[1]