لاچەمېوی گولانە سەرو کتېبوو (ژیان لە بازنەی ڕووداوەکاندا)
بەشۊ: ششەمۍ
چەنی گۆرە بېیەی جووتیاری، وەزعەکێچ فاریۆ و ڕۊ بە ڕۊ گرفتکێچ فرێ با و گنانە دلێ قۆناخێوەی تازەی.
هەرچی چەنی جووتیاری ملمێ وەرۆ، ئاندە هۆرس و نیشتێ و داب و نەریدێ باس کریا، کە بە ڕاسی یاگێ سەرنجیەنێ. دیارا من چېگەنە ئەر گەرەکمبۊ باسوو گردی کەروو، مشیۊ ئێندەو کتېبەکەی وەختش پەی بنییەوەرە و چانەیچەنە ئیتر وانەروو ئی نویسەو منە بی تاقەتبۊ و سەرشەنە نەلۆ.
بەڵام هۆڵ مدەو تاکو ئا یاگێ بتاڤوو فرە بە کوڵی ئیشارۍوشا پەنە کەروو. ڕاسەکێچش وێچم حەز نمەکەروو سەرو ئا بابەتە سەرنج کېشانە واز باروو ویەروو.
چەنی ئامای هەر فەسڵێوی جە ساڵێ، چیرۆکێ و ڕازێ وەشێ دەس پەنە کەرا. ئی چیرۆکێ بڕېوشا پەی زارۆڵانێ و جە شەوە درێژەکا پاییزی و زمسانېیەنە گېڵیاوە و شادی و زۆقوو زارۆڵا چەنی وېشا ورووژنا.
یۆ چا ڕازە وەشا کە ئاخر شەوەو زمسانی پەی زارۆڵا گېڵیانۆ، ڕازەو (شەوی بزنەلەڕ) یەنە، کە فرە سەرنج کېش و وەش هەنە. ئی ڕازێ هۆرامانیچەنە هەنە بە کوچېو فاڕیایۆ.
جە وەهارەنە و وەختوو بۍ وارانېیەنە، کناچۍ و کوڕێ، گنا دۆعا کەردەی و ئەوەڵایای ئۆ پیرا پەی وارای وارانی.
هەیاران و مەیاران
یاخوا بوارێ ۋاران؛ واران
بۆ فەقیر و هەژاران.
ئینەیچە هەر هۆرامانەنە باو بېیەن و شێعرەکێچشا ماناشا یۆنە.
وەیوڵە باڵێ سەرو پیرا
یاخوا وارۆ پەی فەقیرا.
مەسەلێوەتەرە کە جووتیار وێچش دیەنش و چی کتېبەنە فرە سەرش ملۆ دیاردەو دزی کەردەی بېیەن چا مەنتێقەنە.
چی بەشەنە نویسەر ئاندە بە وردی باسوو جۊروو دزیەکا کەرۊ و حەکایەتێ و نموونېش پەی مارۆوە، کە بە ڕاسی قەڵەموو من عاجزا چەنەش و تەنیا مشیۊ وەردەنگ وېش ئی کتېبیە بوانۆوە و هۆرسەنگنایش پەی کەرۊ.
چا مەنتێقەنە، پەی سەردەمېوی دزی نۆعێو ئازایی و قارەمانی دریان قەڵەم و بېیەن بە بەشێو جە فەرهەنگ و کولتووروو خەڵکی. تەنانەت ئانە کە دزیش نەکەردەبیێ، کناچۍ و ژەنی شووشا پەنە نەکەردەن.
پېچەوانەکەیچش، ئەر کەسېو دزێوی خاس و ئازا بیێ، کناچۍ سەفەشا پەی بینان و جە لاو خەڵکوو دەگایچۆ قەدرش چەنە گیریان و کێخواو دەگایچ شانازیش پۆوە کەردەن.
دیارا جووتیار دیسان وېش بە ویروو ئیسەیشە، ئی هەرمانێ بە قیزەون مزانۆ و باسش کەرۊ و فرە وەشحاڵا کە ئی کارە قەڵبە، ماوەش سەرەنە لوان و نەمەنە.
وەختێو خەڵک فرەتەر چەمۍش کریاوە و مېیاوا پانەیە کە دزی کەردەی عەیبێوی گۆرە و خەتێوە زلەنە، هەر وېشا جەریمەش پەی منیارە و تاکو ئا ڕادە دزەکا (داخێ) کەرا و دەسشا سۆچنا. جە بڕېو یاگێچەنە دزەکێ وېشا تۆبە کەرا و داخێشا کەرا. ئی دیاردەشا نامۍ نیان (پیفکداخ) لاپەڕەو (180) .
نویسەر هەر بە باسوو دزی کەردەی ئەمان نمەگېرۆ، بەڵکوو باسوو داب و نەریدە قەڵبەکایچ کەرۊ. هەر چا بەشەنە باسوو جۊروو دژماندای و قەسەم واردەی و کفر کەردەی، کەرۊ و پەی هەرکامی نموونێوی وەش مارۆوە کە وانەری وزۆ قاقاو خوەی.
جە درێژەو ئی بەشیەنە نویسەر ملۆنە دلێ باسوو پەرسەی و جۊروو شیوەنوو خەڵکی پەی مەرگو کەسېوتەری.
کۆتەڵ وئاڵایی، چەمەرانە، قۆڕپێوان، حەیواشېرە، کە ئی شێوە گرەوای و شیوەنە، تەنیا شیوەنوو ژەنا بېیەن کە باسش کەرۊ.
فرە سەرو زەماوندێ و ژەن ئاردەی و مارە بڕیەی و تەنانەت مەیوە سەرو مارەوجاشی کە چاگە و فرەو بەشەکا کوردسانېیەنە باو بېیەن.
ڕەزا بەهمەنی.[1]