پېسەو پەنابەری
کتېبە شێعروو (پېسەو پەنابەری) تازەتەرین بەرهەموو فەرشید ڕۊستەمی وەڵا کریاوە.
کتېبە شێعروو (پېسەو پەنابەری) ، تازەتەرین بەرهەمی شێعریو فەرشید ڕۆستەمین کە جە چاپەمەنیو گوتارینە وەڵا کریۊوە. ئی کتېبە کە (56) لاپەلێن، یەک شێعرەی درێژە گېرۆ وێ کە هەوڵ مڎۆ ئەزموون و دۊخەو پەنابەری و کۆچ‌کەردەی گېڵنۆوە. هەرپاسە ئینە یەکەم جارا کە ڕۊتوو شێعرێ تازێ هۆرامیێ ئەزموونێوە پېسەو شێعرێ درێژێ، پی شێوازە گېرۆ وێ. کریۆ وچیۆ ئی شێعرێ دوێ تابلۆوێنە: تابلۆو یەکەمینە هەوڵ دریان سەرنجە سەرو لایەنە شاریاوەکاو چەمکوو کۆچی دریۆ و ئی بابەتا نیشانە بڎۆ. تابلۆو دوەمی تێمێوە کۊمەڵایەتی_سیاسیەش هەنە و بەحسوو بڕێ کارەسات و ڕووداواش کەردەن کە سووژەو پەنابەری درێژەو ئی سەفەریشنە تاکو یاوای بە کەونارای تووششا مێ. پەنەوازا وچیۆ کە شاعێر چی شێعرێنە، پېچەوانەو شێعرە وەڵینەکاش، جە زوانێوە ئاساییتەری بەهرەش گېرتەن. بڕیار پاسەن چی ماوەنە کۆڕێوە پەردەلادای و ڕەخنە و هورسەنگنای گیریۆ پەی ئی کتېبی. هەرپاسە فایلی دەنگیو گردو شێعرەکێ بە دەنگو شاعێری، هەر چېگە، یانەو کتېبخانەو کوردینە وەڵا بۊوە.
وەڵتەر فەرشید ڕۆستەمی دوێ کتېبە شێعرێ هۆرامیێش چاپ و وەڵا کەردێنێوە: (شپرز یانی من دنیا ئەفغانستان) ساڵەو (97) ی چاپەمەنیو گوتارینە و « مەرد٘ەی جارێ، نویستەی هەمیشەی » ساڵوو (1401) ی جە وەڵاوگەو (49) کتېبی جە وەڵاتوو سوێدینە. هەرپاسە کتېبوو (وطنی برای زخم و تنی برای عشق) کە ئانتۆلۆژیێ جە شاعێرە تازەنویسەکاو هۆرامانین، بە هورچنیەی و تەرجومەو ڕۊستەمی، ساڵوو (99) ی تاراننە وەڵا بېیەنەو.
پاژێوە جە شێعرەکێ:
حەز کەرۍنێ جیا ساکی و سەد دۆڵارا
جیاتی پاور بانکی و هەرسەکاو داموو خواحافێزی
حەز کەرۍنێ یاگێو گۊرانیاو دلێ مۆبایلەکەیم
قسێو تۆم پەنە بیێ
حەرفێ، حەسرەتێ
سەرئېشێت گېرتێم گەرد٘ەن
سەرو مەرزەکانە
تەرسوو سەروازە خوانەژناسەکانە شارتێمەو
جیاتی دەسام، دەسێت
جیاتی کولیێم با وەیلانیت
جیاتی باڵێم پەپوولەییت
دەسێم مەڕیا
با جیاتی ئی شێعرێچە
ئاخێت کېشتێم بە کۊڵ و زۊر شۆنوو وېمرە
هۆ شێوە وەش
خاڵخەنەین گېیان!
هەرچی عوسمانەی واتەبۆ و
ئانە ئەد٘ات بېشکێنە پەیت
یا ئا وەختە یەکەمجار بیمارەساننە تاتەیت دیێنی
من وەشیەکات، تازیەکات
کۆیسان و گەرمیانت وېم
خەنە هێندیێ پەی زەماوننێت
نەژیوانمبۊ ئەر دروێ دەو
من گرد٘وو ئا وەختا و شێعرا
گرد٘وو ئا بەشەر و گیواوا
یاگێ وەیوڵەکات و سوخمە کۆنەکات
ئا گۊرانی واچا گۊششا گېری
بە هۆرامی
بە گرد٘وو ئا زوانا نەمەنێنێ
ئانێ یۆنسکۆی واتەن فۆتیا
بە زوانو کەڕا، لاڵا
جیاتی گردو تەلەفزیۆنا، مۆبایلەکا
بە زوانی گرد٘وو فاڵۆوېرەکاتەو ماچوو:
بێتاقەتتنا و
کۆچ ئیسە، ئی نیمەشەوە؛
هەرچێ هەن، ئی حاڵە نیا.
فەرشید ڕۆستەمی.[1]