قۊناغەو هەرزەکاریم
بەشۍ: هەشتەمە
ژیواو گوزەرانم جە سویدەنە
من و مامۊ نوشیروان حەفتێو چا مېمانخانەنە مەنیمێ، پرسیاروجوابی بیدایشا چەنە گېرتیمۍ، کە زانایچشا کیسەما هاڵیا، هەر یۊ زەرفېوشا دایېمۍ پەنە، کە زەڕ بەشو حەفتېوی واردەی و جگەراش چەنەبۍ. مېمانخانەکە دەگێوەی دوورە دەسەنە بۍ کە نزیکتەرین دوکان دۆرو یەک کیلۆمەتریوی بۍ. ئانە واردە بۊ نانی قاژ قاژی چوارگوشە دلۍ پاکەتینە بۍ، کە حەر تامو نانی نەڎۍ، چەنی هېڵا و سېفا و ماکەرۊنی. میوەیچ ساوێ و مرۋێ و مووزی بېنۍ، باقیچش شیرینی و ڕۊژنامۍو کۆڤاری حەفتانەی و مانگانەی و کتېبۍ گولانۍ سەفەریۍ بېنۍ. هەوایچ تاکو واچی تەڕ و توش و تەم و تۋاڵی بۍ، وېما ماچمېش پەنە قێسو پاییزی. ڕوجیار ئەر سائیقە بیێ دېر بەر ئەییو زوویچ لوۍ کەلەرە. یەواش یەواش تەڕو تووشیەکەش کەرد بە پووشڵۍو دماتەر وەرۋە زەمینش گېرتو کوچېو دنیاش ڕۊشنە کەردە. حەر ئا وەرۋۍ حەتا ئاخرو مانگەو پەنجو (1985) سەرشۆ واراوەو گرلێوش گېرتەرە، من فکرم بۍ جارېوتەر وەرۋەی چامنۍ وارێنە. دماو حەفتەکەی سوارو قەتاریشا کەردیمۍ پەی شارېوی کە (300) کم سەرنیشتو وەرکۆتو سویدیۆ بۍ، چاگەیچۆ بە پاس پەی ئاخر سووچو جەزیرەو ئیۆلاندی (Öland) ی، جەزیرێوی باریکو درېژا. ئېمەشا ئوتیلێوەی سیاحیەی هامنیەی قەراخو بەحریەنە نیارە، کە نزیکەبۍ جە دەگێویی بەنامی (لۆتتۆرپ) ی. ئوتیلەکۍ بېجگە ئېمەی کوردی، لوبنانیی و فەلەستینیی و کەمتەریچ ئێرانیېش چەنە بېنۍ. ئیتر چېگە مرەتەبیشا کەردیمۍ، پوشاکی زمسانە چەنی پەنەۋازی ڕوانەیشا پەی ئەسایمۍ. سەرگەرمیما پیاسەو سەرو بەحرەکەی کە یەخش کەردە بۍ، گېڵای دلۍ دارسانی و دلۍ کېڵە هامنیاو خەڵکیەنە، جارجار بەرېنېما پەی مەلەکەردەی.
سوید بە گردین وڵاتېوی پاک و پۊختەن ، توزو هەڕو چڵپاوش نېیا وە ئڼەیچ گەرم نېیا تاکو بۊیاخو پاڵەیا کاڵ بۊوە یان خرابییو. ۋەرو ئانەیە فرە کەم خەڵک بۊیاخو پاڵەیا کەرۊ، جار جار ئەر سپرێیوی دژە وارانیشا شانا پۊرە. ۋەرو ئانەیەەە پاڵا عمرش تەمامیو بۊیاخ مەوینۊ، هەرپاسە سەرێچشا ملو چېرو خاکی بۊیاخ نمەکریو. سویدەنە پاڵو جگەرانە تەماکوی تشېیایچ بە ئەنواعو تیژیو تامیشا هەن، کە ئینا دلۍ قوتوە زەریفانە کە فرە ئۆ بۊیاخو قۆندرا مشۊ، بە دوۍ پەنجۍ میقداریو، قەڎو ئانەیە بلۊ چېرو لچی سەرینی وەش کەرا، ئیتر پەی ماوەو نزیکە سەعاتێ شیرەو نیکۆتینەکەیش قووت مڎا.
منیچ دماو ئانەیە ئیسراحەتم کەردو ئامانێ وېمەرە، ئیتر جلۍ ئوتو کەرېنۍو ئینېشا، پاڵێکېم کە تاران ئەسێبینۍ فرە زەریفۍ بېنۍ، بەڵام کوچېو کاڵۍ بیېبېنێ، وەشی وەشی لوانۍ بۊیاخم ئەساو ئامانێ. تەماشەو قوتۋېم کەرد دیم پېسەو هینەو لا وېما قفڵش نیا، بە ناخونۍ وەش کریاوەو دیم بۊوەکېچش وېش نېیەنە، فرە تیژەنەو نەژناسېنېچشۆ، مەوادەکێچش زبر بۍ، بەڵام حەر ساوام پاڵاکەیەرە کەچی نەگېرېش وۍ و ڕېزېرە وار، تاکو کوڕېوی لوبنانی کە زووتەر ئامابۍ، ماچۊ کورە ئانە تەماکوی تشېیان، بۊیاخ نیا!
حەر چېگە پەرس وجوابی شاملشا چەنی کەردیمۍ، دماو پەنج مانگا ئیقامەی سیاسیشا دایېمۍ پەنە. کە ڕوەما نېیا وەهار و هامنی، ئەشیێ هوتیلەکۍ هاڵیە کریێ پەی سیاحەتی. بە ئارەزوو وېت هەر شارۍوەت گەرەک بیێ کیانېنېت. سوید وڵاتېوی درېژا (درېژیش 1662 کم وە پانترین یاگیچش 499 کم) خەریتەکەش تەقریبەن پېسەنە چېرو پاڵای چەپی. تاریخو (25-05-1985) منو مامۊ نوشیروان بەشو جنوبیما هۊرچنی کە کەرۊ لاو پاژنەکەیش، شارېو بە نامی (کریستیانستاد) ی، ۋەرو ئانەیە چن ئاشنێوما چاگە بېنۍ، واگەما بە مناسب زانا.
فاروق سان ئەحمەد.[1]