ئەم جۆرە دزییە ناو بنێین چی؟ ئێوەی بەرێز دەتوانن بڕیار بدەن
خیانەتی زانستی لەنووسەر عەبدوڵڵا کەریم کراوە
بەداخەوە ئەمە دووهەمین جارە لەلایەن نوسەرێکی یەکێتییەوە، خیانەتی زانستی لەبەرهەم و ڕەنجی نوسەرانی ماندوونەناسی ئەم نیشتیمانەوە دەکرێت.
نەوزاد عوسمان عەبدولڕەحمان ناسراوبە (نەوزادی موهەندیس) ،لەئێستادا لەسەر لیستی یەکێتی نیشتیمانی کوردستان خۆی کاندید کردووە بۆ پەرلەمانی کوردستان. نەوزاد موهەندیس نوسەر و ڕۆژنامەنوس و کادیری پێشکەوتووی یەکێتی نیشتیمانی کوردستانە، لەئیستادا خاوەن (6) پەرتووکی چاپکراوە.
کاندید(نەوزاد موهەندیس) لەیەکێک لەپەرتووکەکانیدا بەناونیشانی (کڕۆنۆلۆژیای خەبات و تێکۆشانی یەکێتی نیشتیمانی کوردستان) ،لە لاپەڕە (161بۆ 184)ی پەرتووکەکەیدا باس لە(تراژیدیای پڕۆسەی کیمیاباران و ئەنفالی کورد و کوردستان) دەکات، لەکاتێکدا تەواوی ئەو نوسینە هی خۆی نییە، بەڵکو لە لاپەڕەکانی (4 بۆ 27)ی پەرتووکی( ڕەشەبای ژەهر و ئەنفال)ی (عەبدوڵا کەریم محمود) ،دەقا و دەق دەری هێناوە و بردوویەتی ،بەبێ ئەوەی ئاماژە بەوە بکات، کە لەپەرتووکی (ڕەشەبای ژەهر و ئەنفال) وەریگرتووە و نووسینی خۆی نییە!.
ئەمەش وا لەخوێنەر دەکات وا تێبگات ،کە تەواوی ئەو نووسینەی (تراژیدیای پڕۆسەی کیمیاباران و ئەنفالی کورد و کوردستان)هی( نەوزاد موهەندیس) خۆیەتی، لەکاتێکدا هی خۆی نییەوە و بردوویەتی و نووسینی عەبدوڵا کەریمە.
ئەگەر بڕیارە نووسینی نوسەرێک وەک خۆی دەق و دەق بنوسرێتەوە ،ئەوا دەبێت ئاماژە بەوە بکرێت، کە ئەو نووسینە هی نوسەر خۆی نییە، بەڵکو دەبێت ناوی ئەو نوسەرە و ناوی ئەو پەرتووکە و ژمارەی ئەو پەڕانەی کە وەریگرتووە بنوسێت، وە لەکۆتایدا سوپاسی بکات، تا خوێنەر بزانێت کە ئەو نووسینە هی چی نوسەر و چی پەرتووکێکە، تاوەکوم خوێنەر وا تێنەگات هەمان نووسینی نوسەر خۆیەتی..
بەداخەوە لەبری ئەوەی ڕێز لەماندووبوون و بەرهەم و ڕەنجی نوسەر (عەبدوڵا کەریم) بگرێت، کە چارەکە سەددەیەکە، لەهەوڵی نووسین و کۆکردنەوەی دیکۆمێنت و بەڵگەیە لەسەر تراژیدیا ئەنفاڵ و کیمیاباران کورد، بەڵام بەداخەوە لەلایەن نوسەر و کاندید (نوزادی موهەندیس )وە بەشێکی نووسینەکانی لەسەر پڕۆسەی ئەنفال و کیمیاباران بەبێ پرس و ئاماژە بردووە، ئەمەش گەورەترین خیانەت و بێڕێزییە بەرامبەر بە نوسەر و ڕۆژنامەنووس(عەبدوڵا کەریم).
چی کارەساتێکی گەورەیە بۆ کەسێک خۆی بەنوسەر بزانێت، لەکاتێکدا نووسینی کەسانێکی ماندوونەناس بۆخۆی بردبێت.
هاوکات هەر لەهەمان پەرتووکی نوسەری کاندید (نەوزادی موهەندیسدا) (55)پەڕەی لەپەرتووکی( کارەساتی هەکاری) نەوشیروان مستەفا بردووە، ئەمەش بۆ دووهەمین جارە خیانەتی زانستی لەبەرهەمی نوسەرانی ماندوونەناس دەکات.
ئەم کارەی (نەوزاد موهەندیس) دژی یاسایە و بەپێی یاسای سەربەخۆی (حماية حق المؤلف)ی ژمارە (3) ساڵی (1971)،
هیچ کەسێک مافی ئەوەی نییە بەرهەمی دانەر و نوسەر بۆخۆی ببات و بەهی خۆی بزانێت، هەر بەپێی مادەکانی (45 و 46) ی یاساکە، سزای ماددەی و زیندانی ئەو کەسانە دەدرێت کە دزی نووسین لەنوسەرێک بکات، سزاکەش لە(3) مانگەوەیە دەست پێ دەکات بۆ (5) ساڵ زیندانی کردن.
نوسەر عەبدوڵا کەریم لەچەند دێڕێکدا.
نوسەر و شاعیر و ڕۆژنامەنوس (عەبدوڵا کەریم مەحمود) لەساڵی (1957)، لەگوندی (هەزارکانی رەبات) لەنزیک شاری سلێمانی لەدایکبووە.
نوسەر خاوەنی نزیک بە(10)پەرتووکی چاپکراوە ،لەدیارترین پەرتووکەکانی نوسەر (چارەنوسێکی نادیار و ڕەشەبای ژەهر و ئەنفالە).
نوسەر (عەبدوڵا کەریم محمود) لەساڵی (1992) بەشێوەیەکی چر و ورد و فراوان دەستی کردووە بۆ لێکۆڵینەوە و دیکۆمێنتکردن و نووسینەوەی مێژووی ئەنفال و کیمیابارانی کورد ، وەک خۆی دەڵێت: ( هێشتا گوندەکان ئاوەدان نەبوونەوە، دەچوومە گەرەکە میلییەکان بەدوای کەس و کاری ئەنفالەکاندا دەگەڕام و ڕیپۆرتاژم لەسەر دەکردن).
نوسەر عەبدوڵا کەریم یەکەم پەرتووکی لەسەر ئەنفال و کیمیاباران، لەساڵی (1993) بەناوی (چارەنوسێکی نادیار) چاپ و بڵاوکردەوە.
دووەم پەرتووکی لەسەر ئەنفال و کیمیاباران ،لەساڵی (2002) بەناوی (ڕەشەبای ژەهر و ئەنفال ) لەبەرگی یەکەمدا چاپ و بڵاوکردەوە.
پەرتووکی (ڕەشەبای ژەهر و ئەنفال ) لەساڵی (2004) خەڵاتی باشترین پەرتووکی ساڵی پێ بەخشراوە.
لەئیستادا بەرگی یەکەم و دووەمی پەرتووکی ( ڕەشەبای ژەهر و ئەنفال)، بەقەبارەی (828) لاپەڕە بەردەستە بۆخوێندنەوە. هاوکات نوسەر (عەبدوڵا کەریم) سەرقاڵی تەواوکردنی بەرگی سێهەم و چوارەم و پێنجەمی پەرتووکی (رەشەبای ژەهر و ئەنفالە).
سوپاسی تایبەت: بۆ هاوڕێی ئازیزم کاک(دەریا محمەد) یاساناس.
نوسین و لێکۆڵینەوەی: زانکۆ بورهان...
(23/ 9/ 2018)..[1]
=KTML_Bold=ئەم بابەتە بە ڕێنووسی سەرچاوەی ئاماژەپێکراو نووسراوە کوردیپێدیا بەهیچ شێوازێک دەستکاری نەکردووە=KTML_End=