ملمۍ خزمەتو نەسە مەنیجی

ئی جارە ملمێ خزمەتو (نەسە مەنیجی) ، نەسە کوڕو حەمەکەریمی کوڕو خاڵە کەوەین، کە عەسڵنە خەڵکو سلێنێ بېیېنۍ، حەمەکەریم برێوەشبۊ بەنامۍ شەعبانی، حەمەکەریم مێ دەرەومەڕێ، شەعبانیچ ملۆ زەڵم، دماو مدەتێ، حەمەکەریم! کۆچ کەرۊ ملۆ دەگاو گوڵپی، حەمەکەریم عەمرەو خوڎای کەرۊنەو ژەنەکێچش کە نامېش مەنیجێنە ئاشێخێ مڎاش شو چوون ژەنێ سالارەو جوان عومرەبۆ، بەسۆفیێ وېشا کە ئێرانی بۆ، جە حەمەکەریمی یەرێ کناچۍو کوڕێشبا، بەنامۍ نەسەی! کە بە نەسە مەنیج مەشهورا.
زاڕۆڵێ! هیشتا فامشا نەکەرڎەن، ئەڎاش شوکەرۊ، شێخیچ سەرپەرشتیشا کەرۊنەو وەختێ فرەش پەنەمشۊ قڕو قاتیو گرانی گنۆرە، نەبېیەی زۊر مارۆ پەی خەڵکی، کەس جایش مەمەنۆ لاوکەسیوە، کوڕ ئاکوڕەنە تەقەلا بڎۆ پەی وېشو ژەمێ نان پېڎاکەرۊ، خەڵکو دەگێ کۆباوەو قەرارمڎا سەعبێ بەکاروان بلا پەودیمرەو هەر نۊعێشا کەرڎەن جارێ کوچێ گەنمێ بارا تاخوڎا دەروێ خەیریشا وەنە کەرۊوە.
ۋېرەگا چایخانەنە جاڕشادا کێ مێ بەکاروان پەی گەنما؟ با سەعبێ زوو وېش حازرکەرۊ، گەردەنو وېشو ئۆباڵیش بەملو وېش، کەس زەمانەتی کەسی نیا، لوای بەدەسو وېمانە وەلێ ئامایۆ نا.
نەسەیچ تازە سمېڵېش بۊزێ بېیېنۍ، هەڕەتو گەنجیشا، ماچۊ بەواڵا: منیچ چەنی کاروانی ملو هاگاتا وېتابۆ، کێ ماچۊ ویس شەوېم پەنەمەشۆ، هەرچن واڵێ لاڵیێوە فایڎەش نەبی، سەعبێ مەڵڵا بانگدای کاروان جما، دەگا پاشەوۍ زڕیا، هەرېشا وستێ ڕا، (نەسە) باڵ تەکن، هەریچش نەبۍ.
بەچن شەوۍو چن ڕوێ یاۋېرە بیجاڕ، ۋېرەگا دێرێ لوێ دلێ دەگێوە بەنامۍ گەڕوسی، دەگاکێ هەردوی شاعیرا نەجەفخان و جەوادخانی گەڕوسی، بنېشا مزگینە وستە، کەوتێ یانەولای پەی نانی، پەی ژەمەو ۋېرەگای، نەسە نەلا، ڕوەش نەبۍ، هەرچن لاڵیاوە وەنەشا بەشش بڎا بۍ فایدەبی، واتشا چی ئاڼە نێزەکت قنجا، چی ویت مەلی گېڵی دەگارە خۊ ئېمە ڕەنجبەرێ تۊ نېیەنمێ، نەسە! لوا گېڵا دەگارە پەی نانی، لوا وەربەرېوە، چڕیش یانەکە، ژەنێ زیارە ژەنەو چیشی، خانومانە، سالارە، ژەنێ واتش خەیرا، واتش مەتی گېیان وەنەما قۆمیان وڵاتو وېمانە قڕوقاتین، گرانین، هیچ دەس مەگنۆ، ئەر هەنە نانێم دەپەنە ڕەفێقەکێم ئینێ مزگینە، ژەنێچ واق مڎیۊش پۊرە، هیچ قسێ مەکەرۊ، دمایی ماچۊ نامېت چېشا؟ چکۆوە ئامانی؟
نەسەیچ ماچۊ نامۍ منت پەی چېش، کەی وەختو ئانەین، تۊ من مەشناسی، ئەر حەزیچ کەری زانی، من نامېم نەسەن، ئاڎیچە گەشیۆوەو ماچۊ یەرێ واڵێچت هەنێ پی ناماوە، نەسەیچ ماچۊ تۊ چەنی زانی؟ تۊ کېنی؟ ژەنێچ ماچۊ من ئەڎاو تۆنا، مەنیجەنا.
باوشیشا کەردە یۆترینیرە ئەممان باوشی، یۆترینشا وەرنەڎا تاکو تاسێ دڵیشا مەڕیا.
ڕەفێقەکێ نەسەی کەکیشا کریێنە، واتشا ئاهەتیمە نەبی بێوە، ورزدێ! بابلمێ وێزمېشۊ، چیوېش سەرمێو ڕوەما نېیەنە بلمێ، دماوئانەی کەلوێ، مڎیا ئینا یانېوەنەو نیشتەنرە، مەشێ مەبۊ مێمانەش، وېش میراو وېش مەڵان، ئیتر ڕەفێقەکېش یاونێشنە، کە ئینە ئەڎاشنەو ئانەیچ پیاکەشا بەنامۍ (وەیسە گەڕوسی)وە، دوێ ڕوێ مەنێوەو کۊڵو بارشا کەردو وەڵێ ئانەی کاروان جمۊرە، نەسەی واتش ئەڎا، تۊ ژەنەو شوینی، من مەکریۆ ئیسە بەروتۆ، بەس وازت چەنە نمارو، جارێ بابلوە سەردەمو واڵەکامۆ، ئەڎێش حەتا حەزکەری چیوی عالش پەی پیتۆ، هەربەنەکایچ وات هەرچیێ ماری بارە، ئېمە پەیت ورگېرمێ، وزمێش ناو بارو هەرەکاما، حەنەری مەکەرمۍ، تۊ ڕەفێقمانی و ئەڎایچت ئەلحەق خزمەتێ عالش کەردیمێ، کاروان کەوت ڕا.
کاروان بڕش داوە، دەگا! ژڵێویا، لوێ پێوایشاوە، نەسە بێجگە تۆشەبەرێ شانەشنەبۍ هیچی تەرش نەبۍ پەنەو واڵێ ئامێ پێوایشۆ، دماو خێرئامایو ئی لاو ئۆ لا ماچ کەردەیش، واتشا براڵە ئجۆ هاڵی ئامانیوە، واتش نا گچڵەم ئاردەنو هەر نېیا چیوو و من نەبۊ ناوبارەشنە، من حەر گەنمێم ناردێنێ، باواچوتاپەنە، ئەڎایچم وێستێنەمۆ، بابلمێ یانە، گچڵەتا پەی باس کەرونەو کەرمېش زەماوڼە، ئا شەوە وەشیێنە وەنەوزیشا نەکەردە.
سەعبێ زوو هیشتای مانیایش نەسەیابێ، قولێش ور کەردېو ئنەو خولێ لوا خزمەتو شێخی، حاڵو مەسەلەش گرد پەی گېڵناوە، واتش شێخ گېیان، وېیەردەی وەڵین با وېیەردەبۆ چن ساڵێ بۍ ئەڎاو تاتەبېیېنمۍ، ئیسە سۆراغو ئەڎێم کەردەنمو لوانا یانەشا، جەمەنتێقەو بیجارینەو دەگاو گەروسی، شێخیچ وات هەرچیێم کەردەن وەرو خاترەو خوڎای بېیەن، منیچ دایېم دەسم پۆتاوەبېیەن چ بە ئاشکرا چ بە پەنهانی، تاکو سەوای پێرێ خەبەر کیانو، یانەو ئەڎێت بەیاوە پیدیمرەو بەیۆترینی شاڎێ بیدێ، ئیتر شێخی پیاش کیاست، ئاردەشاوە چەنی پیاکەیشو، چابیێ تاکو وەیسە گەڕوسی مەردو ئیتر کۆچشاکەردۆ پەی دەرەومەڕێ.
ئانا بارش کەرد لواوە داڵانی
هەروېم بەسەرگەرد وردەخاڵانی
ئانا بارش کەرد، لواوە وەرقەڵا
پېسە ڕېحانەی بەرشدان گەڵا
(مەنیجێ) .
عەفان دەرەمەڕی.[1]