مارەکردن لە ئەدەبی زارەکی و کولتووری ناوچەی موکریاندا
لەیلا نوورانی
=KTML_Bold=مارە=KTML_End=
پەیمانی ژنومێردایەتی کە بە پێی شەرع و قانوون دەبەسترێ.
=KTML_Bold=مارەیی=KTML_End=
پارە، زێڕ، مڵک یا شتێکی لەم بابەتە کە لە کاتی بەستنی پەیوەندیی ژنومێردایەتیدا، مێرد دەیدا بە ژن یا دەستەبەر دەبێت لە داهاتوودا بیداتێ.
بێ جیاز و مارەیی دەیدا بە شوو
لەو هەموو کوردانە داخوازی نەبوو
(حاجی قادر)
=KTML_Bold=ئاوی مارەیی پێ کەوتن=KTML_End=
بۆ ئافرەت کە دوای مارە کران، گەشانەوە و ڕواڵەتێکی جوانتر پەیدا بکا.
=KTML_Bold=مارەی کەسێک بڕین=KTML_End=
مارە کردنی ئافرەتێک لە پیاوێک.
گۆیا لە شەڕەفکەند مام فەرەج ناوێکی کەڵاشکەر، ویستوویە لای مەلا ژن مارەکا. مەلا وتویە: هەرچی وتم وەدووم کەوە:
دەی فەرەج بڵێ:
-دەی فەرەج بڵێ!
-جارێ دەنگ مەکە.
-جارێ دەنگ مەکە!
-بە خوا سەگبابێکی کەرە!
-بە خوا سەگبابێکی کەرە!
مەلا لینگەکەڵاشێکی لە دمی دەدا،
فەرەجیش لینگە کەڵاشێک بە دەم و فڵچی مەلادا دەکێشێ.
مەلا هەڵدێتە سووچێکی مزگەوت و دەڵێت: لێت مارەکرا. لێی دەپرسن: مام فەرەج مارەت بڕی؟
-کوڕە خۆ مارەبڕین نیوەشەڕێکە من نەمزانیبوو
(هەژار، چێشتی مجێور)
=KTML_Bold=مارە کران=KTML_End=
(بۆ ئافرەت) بوون بە هاوسەری کەسێک بەهۆی بەسترانی پەیمانی ژنومێردایەتی.
=KTML_Bold=مارەکراوی کەسێک بوون=KTML_End=
دەزگیرانی کەسێک بوون.
مامەڕەش لە ڕانی خۆی دا و وتی: ڕۆڵە ئەو کچە مارەکراوی خۆتە، ئەمن داخێکم لە دڵی دای. شۆڕ مەحموود وتی: مامە بۆ لە ڕانی خۆت دا چ حەسرەتێکت لە دڵی دایە؟
(لوتفی: بەیتی شۆڕمەحموود و مەرزینگان )
=KTML_Bold=مارەکردنەوەی کەسێک=KTML_End=
1. سەرلەنوێ مارە کردنی ژنێک، لەلایەن پیاوێکەوە کە پێشتر مێردی ئەو ژنە بووە و تەڵاقی داوە.
2. مارە کردنی ژنێک کە مێردەکەی مردووە یا تەڵاق دراوە.
پاش مردنی شێخولئیسلام ژنەکەی ئەوی مارە کردبووەوە و کچێکی لێ هەبوو کە بەجوانەمەرگی مرد.
=KTML_Bold=مارەبڕ=KTML_End=
1. ئەوەی ئافرەتێک لە پیاوێک مارە دەکا.
2. کچێکە بە منداڵی مارەکرابێت و ئێستا بە بووک نەچووبێ.
=KTML_Bold=مارەبڕانە=KTML_End=
دراوێکە دەدرێ بەو کەسەی مارەدەبڕێ. = هەقدەستی مارەبڕ.
=KTML_Bold=مارەبڕانەی دایکێتی=KTML_End=
بە گاڵتە یا بە تووڕەیی لە وەسفی کەسێک دەوترێت کە بۆ شتێک یا کارێک خۆی پێ لە هەموو خوازیارەکانی دیکەی شت یا کەسێک لە پێشتر و هەقدارتر بێ.
=KTML_Bold=مارەبەجاش=KTML_End=
مارەکردنی ژنێک کە سێ تەڵاقە کراوە، یا سێ جار لە سەریەک لە مێردێکەوە تەڵاق دراوە. لە کەسێکی غەیری ئەو مێردە، بۆ ئەوەی ئەو کەسە دوای بەدەست گرتنی، تەڵاقی بداتەوە و لە ئەنجامدا مێردی پێشووی لە باری شەرعییەوە ئیجازەی هەبێت مارەی بکاتەوە.
=KTML_Bold=بەمارەوتەڵاق=KTML_End=
ئەو ژنەی کە بەبێ تەڵاقدران، دوور لە مێردەکەی دەژی.
ڕەشەڕیحانە لە من دێنەدەرێ بە گوڵەمێلاقە
بەڵام ئەتۆ نازانی هەتا دێیەوە لە گەرمێنێ، یارویارکۆڵەی تۆ لە ماڵی دە بابان هەر بەمارەوتەڵاقە .
=KTML_Bold=باوەڕ لەسەر مارەکردن=KTML_End=
باب حەقی هەیە بە بێ وەکیل و ڕازیبوونی کچ هەتا سێ کچان مارە بکە.
لە جەنگەی مارەکردندا ئەگە یەکێک بەنی بادا/ گرێ دا زاوا دەبەسترێ.
لە جەنگەی مارەکردندا ئەگە یەکێک دەسحێبی بگێڕێت زاوا دەبەسترێ.
خەنە مارەیی ئایشێ و فاتمان بووە.[1]
*سەرچاوە: پایانیانی، کانی مرادان