شێوازوو دڵبینای زاڕۆڵەی بە ئەڎایشەوە
ئایا جە گەورەساڵینە سەرو پەیوەڼیە سۊزدارەکاشەوە شۊنەما مەنیەورە؟
بەپاو نەزەرەو جان‌بالبی (1950ز) شێوازوو دڵبینای زاڕۆڵەی بە ئەڎایشوە سەرو پەیوەڼی عاتێفی زاڕۆڵەکەیرە جە گەورەساڵینە شۊنەمایە یەکلاوەکەرە مەنیەۆرە. بالبی چی بارەوە یەرێ شێوازێ دڵبینای دیاری مەکەرۊ؛ شێوازی ئەمن (safe style) چی شێوازەنە تاک بە ڕېکی پەیوەڼیەکاش مەوەرۆ ڕاوە. بەڵام جە شێوازی دڵەڕاوکەینە (anxious style) تاک تاکو دمایین ڕۊوەکاو ژیوایش جە پەیوەڼیە سۊزداریەکاشەنە تووشوو دڵەتەپێ و بۍ متمانەیی مەو. دمایین شێوازی ناڕیک ئانەن تاک تووشوو وێ‌دوورگرتەی (avoidant style) مەو، پەوکای پەی دەربڕییەی وەشەویسی نمەتاو فرە نزیکوو کەسی بۊوە.
دماتەر سایکولۆژیستەکا شێوازی چوارەمشا بە نامۍ شێوازی شڵێویا (confused) دیاری کەرد.
بە پېچەوانەو ئانەیە بالبی باسش مەکەرۊ، مایکڵ‌لویس بەڕاوەبەروو ڕېکخراوەو گەشەو زاڕۆڵەی جە زانستگاو ڕاتگرزی ماچۊ ئەڎا بە تاقی تەنیا وەش‌کەروو ئی شێوازە پەیوەڼیانە نېیەنە، بەڵکوو کەسانیەتەر کە زاڕۆڵە تەکوو ئاڎیشایچ پەیوەڼیش هەن شۊنەما مەگېرۆ. لێکوڵینەوەکا چی بارەوە نیشانە مەڎا بەینوو شێوازوو دەربڕییەی زاڕۆڵەی بە ئەڎایوە جە گەورەساڵینە پەیوەڼیە کەمش هەن.
ئێنسانەکا تەنیا یەک شێوازی دڵبینایشا نېیەن، بەڵکوم سەرو تەیفیە جە دڵبینای وېشا مەویناوە.
ئەر بەپاو نەزەرەو بالبی ویر و هۆرست و نیشت کەرمۍ و مۆتڵەق سەرەنجش بڎەیمێ تووشوو دوێ گرفتە گەورا مەویمێ؛ یۆشا ئانەن حەر هەڵیە پەروەردەی چی بارەوە مەوزمێ سەرو شانوو ئەڎای، ئینەیچ یاگێ داخ و شەرمین.
دووهەم، ئەر پەیوەڼی عاتفیما هەڵەداربۊ، ویانێما هەنە دەسوە پەی ئێسڵاح کەردەو وېما تەقالا نەکەرمۍ.
سەرەڕاو ئی نەقدانە نمەتاومۍ واچمێ گردو نەزەرەکێ بالبی ڕاسە نېیەنە، بەڵام بەپاو پەیجۊرکەریەکاو فیت‌هیلی (2023ز) تەنیا مەتاومۍ واچمێ شێوازوو دڵبینای زاڕۆڵەی بە ئەڎای سەرو پەیوەڼی گەورەساڵیشەرە شۊنەمای یەکلاوەکەرەش نېیەنە.
گرینگ ئانەن؛ تێئورییەکا پېسەو چېویە هەتاهەتای و مۆتڵەق تەماشا نەکەرمۍ، چوون پېچەوانەکەش خەسارش وەفراوانتەرەن پەیما.
فەرحان سوبحانی، ماستەر جە بواروو پەروەردەینە.[1]