ماسییەک لە شووشەیەکدا
بە دەم شین و گرینەوە سەری بە دیواری بلوورین دادەدا
بە خۆی دەگوت:
من کوڕی دەریای هەراوم
لە دەریادا لەگەڵ سەدەف و مرواری هاونشین و تێکەڵاوم
حەیفە دیلی گۆزەئاوم
حەیفە گیری تەشتەگۆلم!
من پەروەردەی لانکی خۆڕاژەی شەپۆلم
قەت باکم بە خەتەر نییە
مەلەی ئاوی کڕ و زەلکاو هونەر نییە
بەوەی نێ ورد و بێ سەنگم
لە جێی خۆیدا من هومێدی تۆڕەوانم
من جێی تەماعی نەهەنگم
ڕزگارم کەن با تۆڕەوان بە شەرتی ژین و مەرگم تۆڕەکەی باوێ
بەڵام ژینی مەیتەئاوی گۆمەشووشەی تەسک و بێ شەپۆلم ناوێ. [1]
هۆنەر: #ناسر ئاغابرا-ژاکاو#
پەرتووکی: #کەژاوەی دڵ#
ڕۆژی: #1993-04-01#
شوێن: #بەردەڕەشان#