زەرێ و فەخری ڕازی
بەشەی حۆتەمە
ئاڎە ئێتر گەورێ بېیێبێ و منیچ پانزە ساڵېم بې و زانێنا ئێتر نمەبۊ من بلوو نزیکشەرە.
ماماگەورێچ هەشتا و شش ساڵېش بې ئاکاتیە زەرێ کونکوورش دا و دوکتراو زانشگاو شیرازی قەبووڵە بېیە. ساڵەو چل و چواری بې، ئا ساڵە جە یەزدەنە تاقە دوێ نەفەرێ دوکترا قەبووڵێ بېیێبېنې.
عەباس ژەنیش ئاوردێبێ و دوێ زاڕوڵێش بېنې، عەلی ڕەزا قسە زلیچ حەڤڎە ساڵېش بې و ئاڎیچ گەرەکش بې ژەنی دەس گېرۆ. واڵە میکلەکێچش تازە زەماوڼەش کەرڎېبێ.
ئەڎاش واتش: من نمەتاو خەرجی تۊ بڎەو. عەباسیچ کەردشوە جواب ئاخر تۊ دەرست پەی چېشین، گەرەکتەن چېش کەری و بە چېشی بېیاوی؟ کناچېشا نەواتەن وانای.!
ئەو براکەیچش واتەبێ من وەرگېریش کەروو و نمازوو بلۆ وانای.
ماما زێنەبەیچ هۊر ئاما پەیشا و واتش: شمەی ناپیا ئینە چن ساڵېن پی شێوە وەرگیری ژەن و کناچەی کەرڎې و نمازدێ هیچ کناچێوە سەرە بەربارۆ. ئارۊلای نمازوو، حەتا کەی؟! ئیسە ئێزنوو کناچا دریان بلا وەنەی بە دڵنیاییەوە ماچوو وێچم گەرەکمەن پی سن و ساڵموە ملو وانای تا زانشگایچ. دوعای خەیریچم هەنێ پەی ئا کەسیە ئی فتوایشە داینە و ڕاو ئېمەیچش زانشگانە کەرڎېنەوە.
هەقیچتا نېیەن سەرو زەرێوە تا ئا یاگێ دەسەڵاتم بۊ وېم خەرجیش مڎەو و نمازوو محتاجەو هیچ کامیتا بۊ.
چا هیر و ویرانە ماما زێنەبە چن ڕوێ گمە بېیە. گرڎ کەس پەشۆکیابێ و شۊنیشەرە گېڵێنێ. سڵتانە فرە ناڕەحەتە بې، منیچ چا بەینە هەواڵوو گم بېیەو ماما زێنەبېم کەرد بەهانې تا بلوو و چەمێوەیچم گنۊ زەرێ. سەرەنجوو زەرێم دا هیچ دڵەڕاوکێ و ناڕەحەتیوەم نەوێنێنا جە ڕۊخسارشەنە.
عازا ۋیروو منش واناوە و واتش: حسەین گېیان چوون تۊ هەمیشە ڕازدار بېیەنی ماچووت لاوە. ماما زێنەبە لواینا پەی ئەردەکانی تا پەڵېو مڵک ورەشۆ و پووڵەکەیش بارۆوە پەی خەرجی من.
شۊنی پەنج ڕوارە ماما زێنەبە دیاریش داوە. ماماگەورێ لاو کەسیوە ڕاسەش نەواتێبێ، واتەبېش لواینا تەوافوو ئیمام زاڎەی.
حەر ئامێبێوە پەنامەکی نەمابېش هەشتا و هەشت هەزارێ پووڵی و بې‌دەنگېو خانابېش مشتەو زەرێرە. ئینە زەرێ وېش پەنەش واتانی. هەشتا و هەشت هەزارێ ئا زەمانەیە ساڵەو چل و چواری فرە فرە بېیەن. زەرێ پووڵەش بەرد و لوا پەی شیرازی.
ئەوەڵ ساڵەو زانشگایش پەنج دانە نامېش نویستې پەیم و کیانەیش. ئیسەیچ هەڵای نامەکام مەنێنێ. نەورێزیچ ئاما ماماگەورێ وېش لوا پەی شیرازی ئێتر ئاڎە ناماوە. هامنێچ فەقەت دە ڕوێ ئاماوە. چەمەم پەنە کەوتە، نەختێو کەوتێمێ قسێرە و چکیە جە وېش و هەرماناش پەیش واتانی، واتش: حسەین گېیان شیرازەنە دەسیە یانێ فرێم ساناینێ یەرەسەڎ و پەنجا گەزێ زەمینەکەشانەن، قیمەتوو چل و دوێ هەزارا بېنې. دوێ هۆوڎێش هەنێ دەسو وېموە و دوێ تەریچشا داینێم هامپلەیەکام و کرهام پەنە مڎا. بە ئەو پووڵەکەیچ یەرێ دووکانێم سانای و ئاڎیشایچم داینێ کرها. وەزعەم وەش هەنە و ئېم ساڵیچ پلەو ئەوەڵوو زانشگایم بە دەس ئاوردەن. زانشگایچ بوورسم مڎەو. تا من لوانی زانشگا زەرێ یەرە ساڵەو پزشکیش تەمامنا بې.
ماماگەورێچش دلې نەوەڎ ساڵەیینە عەمرەو خوڎایش کەرڎە. (نوور و ڕەحمەت بوارۆ قەبرەش). زەرێ ئاماوە پەی یەزدی. منیچ زانشگاو مەشەدی قەبووڵ بېیەبېنې و مەشییایا بار و بنەم پېچایاوە و لوایانێ.
زەرێ پەنە واتانی حسەین ماماگەورێم مانگێو وەڵێ مەرگیش زەنگش پەی دانی و واتش ڕوڵە سنۆقڵێوەم وستەن دلې وڵەو بادگیرەکەو سەرو بانی حەر کات ڕات کەوتە ویرت نەشۆوە هێنوو تۊن باریشەرە و بەریش پەی وېت.
شەریفی_ بېساران.[1]