SERXWEBÛNA #BAŞÛRÊ KURDISTANÊ# … DIJMINÊN GELÊ KURD KIRIN YEK
Berzanî Ferman
Li Başûrê Kurdistanê dema ku Gelê Kurd xwest bibe xwedî statû, her kesê û bi taybet dewletên Ereban nerazîbûn nîşan da.
Ev dewletên ku çavên wan bar nedibûn ku Kurd bibin xwedî dewlet, ketin nava hewldanên xirakirinê..
Pêşiyan digot: “Eger Kurdistanek ava bibe; dê Qiyamet rabe..”.
Li ber çavan bû ku çawa dewletên Ereban Qiyamet rakir.
Dewletên dagirkerên Kurdistanê dema bi peyva Referandomê bihîst, dîn û har bûn.
Û dest bi lihevkirin û peyaman kirin.
Dewletên ku bi sedên salan nakokiyên wan hebûn, di mijara doza Kurd de bûne yek…
Gelo me tu kes di komkujiyan re derbas kiriye?
Em nizanin ka ev dijbertî ji kû derê hatiye.
Her hal; kesên bi navê Kurdîtiyê jî bang dikirin, di wextê tengasiyê de pişta xwe da milet û peyman bi dijimin re danîn..
Belê careke din jî Mehabad, li Başûrê Kurdistanê dûbare bû. Lê bi rengekî din.
Ya balkêş ew e ku dewletên dagirkerên Kurdistanê hiştin ku gelê Başûr referandoma xwe li dar bixe.. Yanî diyar dikin ku ew dewletine demoqrat in.
Lê piştî ku bû roja encamdana Referandomê, wekî guran bi ser serê Kurdan de pijiqîn..
Hinekan gefa êrîşan jî xwar..
Serokê Herêma Kurdistanê Mes’ûd Barzanî di Referandoma Herêma Kurdistanê de, ji beriya her Kurdekî se’et derdora 6’ê sibehê çû ser sindoqan û deng da.
Piştre dewletên wekî Amerîka, Brîtanya, Fransa, Elmanya û Rûsyayê hişyarî dabû Hikûmeta Herêma Kurdistanê.
Di wê demê de endamê Komîteya Rêveber a PKK’ê Dûran Kalkan jî Hikûmeta Başûr hişyar kiribû.
Her wiha Fermandarê Biryargeha Navendî ya HPG’ê Murad Karaylan amaje bi yekîtiya neteweyî kiribû û gotibû: “Madem dijminên gelê Kurdistanê bûne yek, divê gelên Kurdistanê jî bibine yek û li ber xwe bidin..”.
Bê guman hişyariyên fermandarên me yên Kurd di cih de bûn. Ji ber ku eger yekîtiyeke neteweyî hebûya, ev felaket bi ser me de nedihat..
Li aliyê din jî, Serokwezîrê Iraqê Heyder Ebadî dest bi têkiliyan kir..
Yekem seredana wî ji Si’ûdiyê re bû, paşê çû Îran û Tirkiyê, herî dawiyê jî çû Fransayê.
Gelên Rojavayê Kurdistanê di nava civatên xwe de gotin:
Binerin Ebadî çû cem şahê Si’ûdiyê û jê re dibêje biner divê em li Kurdan bibin yek..Kurd dixwazin her 22 dewletên me, ji me bistînin..!
Gelek caran jî gotibû ku Kurdistan li herêmê, tê wateya Îsrayîla 2’yemîn.
Beriya van qas gotinan, Serokê Herêma Kurdistanê birêz Mes’ûd Barzanî seredana Erebistana Si’ûdî kiribû..
Li vir Şahê Erebistana Si’ûdî tekezî li ser serxwebûna Kurdistanê kiribû..
Lê piştî seredana Ebadî, ev sînaryo û daxuyaniyên dûrî rastiyê, li dij Referandomê sekinîn.
Piştî ku gelê Kurdistanê çû ser sindoqan û dengê xwe da, van dewletên navborî mîna peymana Lozanê biryar da ku eger Kurd bixwazin bibin xwedî dewlet, divê destpêkê li ser termên me bimeşin…
Ambargo û çember bi her awayî li derdora Kurdistanê bûne weke xelekekê.
Herî dawî, di 16’ê Cotmehê de mîlîsên Heşda Şabê bi fermana Îranê derbasî nava Kerkûkê bûn û xwestin şerê Kurd û Ereban ji nû ve vejîn bikin.
Lê Kurdên ku dikarîbûn bi salan şer bikin(Em ji bîr nekin ku Gerîla û Pêşmergeyên qehreman li wê derê bûn û dikarîbûn wekî her carê ji bo mafên xwe şer bikin), xwestin ku bi rêyên dîplomatîk rê li pêşiya vî Şerê Cîhanî yê 3’êyem ê di navbera Kurd û Ereban de, bigirin.
Paşê di 29’ê Cotmehê de Serokê Herêma Kurdistanê Mes’ûd Barzanî ji erkê xwe îstîfa kir.
Ev îstîfa, şoqek di nava gelê Kurd de çêkir.
Hin rastî heta niha nehatine zelalkirin ka ji bo çi Mes’ûd Barzanî îstîfa kir.
Gelo dewletên mezin jê re gotine îstîfa bike..?
Yan wî îstîfa kiriye?
An jî ji bo ku şerê Kurd û Ereban rûnede, îstîfa kiriye ?
Hîn jî ev pirs di meraqa gelê Kurd de ye..
Bê guman em behsa van rûdanan dikin, lê dîsanê em vedigerin perspektîfên Rêberê Gelê Kurd Ebdullah Ocelan û 5 prensîpên wî yên ji bo lidarxistina Yekîtiya Neteweyî.
Her 5 prensîpên ku rê li pêşiya dubarebûna sînaryoya Başûrê Kurdistanê li Rojhilat, Rojava û Bakurê Kurdistanê, digirin.
Çareseriya herî guncaw ji birînên gelê Kurd re, YEKÎTIYA NETEWEYÎ YE…
[1]