"هەمیشە سەردەمانێک هەیە لەمێژوودا شاعیرەکان لەپاڵ ستەمکارەکاندا حوکم دەکەن" میران کۆندێرا ڕۆماننووسی گەورەی چیکی
من ناوم (ئارام نوری) یە و یەکێکم له و گەنجانەی کەلار کە چەند وێنە و قەسیدەیەکی جەمال غەمبارمان سوتاند، به و هۆیەوە لەلایەن هەندێک لەکەناڵەکانی ڕاگەیاند و بەشداربووانی تۆڕی کۆمەڵایەتی فەیسبوکەوە هێرشمان کرایە سەر. پێمخۆشە لەرێگەی ئەم ڕوونکردنەوەیەوە هۆکاری سوتاندنی قەسیدەکانی جەمال غەمبار ڕوونبکەمەوە و ئەوەش بخەمەڕوو لە سوتاندنی کتێبەکاندا تەنها نەبووم، بەڵکو کۆمەڵێک گەنجی ڕۆشنبیر و ئەدەب دۆستم لەگەڵ بوو کە هەریەکێک له و گەنجانە خاوەنی بیر و باوەڕ و ئایدیای جیاوازین و تەنها قەبوڵکردنی بیرورای جیاواز و خۆشەویستیمان بۆ ئەدەب و شیعر و کتێبە فیکریەکان کۆی کردووینەتەوە، جەمال غەمباریش وەکو شاعیرێک پێشتر خۆشەویست بوو لامان و ئامادەی هەموو قوربانی دانێک بووین لەپێناو ئەوەی دەستمان بگات بەیەکێک لە کتێب و قەسیدەکانی.
ئەوەی ئێمەی لە جەمال غەمبار نیگەران کرد خۆکاندیدکردنی نەبوو بۆ لایەنێکی سیاسی و ئێمە ڕێز لەبیر و باوەری جیاواز دەگرین و پێَمان وایە کۆمەڵگە بێ بوونی بیروباوەری جیاواز قەتیس دەبێت و هەنگاو بەره و پێشەوە نانێت، بەڵکو قسە دژ بەیەکەکانی ئەو شاعیرە نیگەرانی کردین و پێمانوابوو لە ڕێگەی سوتاندنی هەندێک لە قەسیدەکانیەوە دەتوانین پەیامی نارەزایەتی بدەین بەگوێیدا. ڕەنگە خەڵکی داوای بەڵگەمان لێبکات لەبارەی ناراستگۆیی ئەو شاعیرەوە بۆیە پێمخۆشبوو بەڵگەیەکی حاشا هەڵنەگر بهێنمەوە و شاهیدیشم بۆ پشتراستکردنەوەی بەڵگەکەم هەیە و وەکو تەحەدایەکیش ناوی شاهیدەکە دەهێنم.
بەڵگەکەش ئەوەیە چەند مانگێک لەمەوبەر جەمال غەمباری شاعیر لە هۆڵی بۆنەکانی کەلار داوەتی ڕێکخراوێکی کۆمەڵی مەدەنی دەبێت و دوای تەواو بوونی کۆڕە شیعریەکەی، درەنگانێکی ئێوارە جەمال غەمبار و ژمارەیەک لە گەنجانی ئەدەب دۆست لە جێگەیەکی تایبەتی میوان دەبن و تا کاتژمێر یەکی شه و له و جێگەیە دەمێننەوە، دواتر کاتێک دانیشتنەکەیان تەواو دەبێت و بڵاوەی لێدەکەن لەوکاتەدا گەنجێکی ئەدەب دۆست و خوێنەر بەناوی (س) دەچێتە بەردەم جەمال غەمبار و پێیدەڵێت"تۆ لە سەر تەختەی شانۆ خۆت دەکەیت بەگریان و فرمێسکی تیمساحی دەرێژیت، بەڵام لە واقیعدا هێندە هەست ناسک نیت"، ئەڵبەت ئەوەی گەنجەکە بە جەمال غەمباری وتبوو بۆچوونی یەکێکە لە شاعیرە دیارەکانی کورد لەسەر جەمال غەمبار و پێشتر شاعیرەکە لای ئەو گەنجە باسیکردبوو، بەڵام گەنجەکە ئەو بۆچوونەی ڕاشکاوانە به و نیوە شەوە دا بەگوێی غەمباردا.
لەوکاتەدا دڵشاد ئەنوەری ڕۆژنامەنوس لە ڕۆژنامەی هاوڵاتی و ژمارەیەک گەنج لەگەڵ جەمال غەمبار دەبن و گەنجەکان ویستوویانە پەلاماری (س) بدەن بەڵام ئەو ڕۆژنامەنوسە نەیهێشتووە، بەڵام جەمال غەمبار خۆی پێنەگیراوە و پەلاماری گەنجەکەی داوە و پێیوتووە" بەم نیوە شەوە تۆ یەکێتی و پارتی ناردووتیان ڕێگە لە من بگری یان ئیسلامیەکان" و دابەزیوەتە سەر پارتی و یەکێتی و ئیسلامیەکاندا و خۆی وەکو کەسێکی ئەنتی دەسەڵات نیشانی گەنجەکانی هاوەڵیداوە. بۆیە ئێمە کاتێک هەڵوێستمان بەرانبەر جەمال غەمبار وەرگرت و قەسیدەکانیمان سوتاند ویستمان لەم ڕێگەیەوە داوای لێبکەین ڕاستگۆبێت لەگەڵمان چونکە ئێمە ڕاستگۆیانە خوێنەری قەسیدەکانی ئەو بووین و خۆشمان ویستووە، بەداخەوە ئەو ڕاستگۆ نەبوو لەگەڵمان و لای ئێمە هێرشی کردە سەر دەسەڵات و لەولاشەوە چووە ژێر باڵی دەسەڵات و خۆی کاندید کرد.
ئارام نوری
- 19-07-2013
ئەڤ بابەت ب زمانا (کوردیی ناوەڕاست - Central Kurdish) هاتیە نڤیساندن، کلیک ل ئایکۆنا
![](https://www.kurdipedia.org/images/flags/ku.png)
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەتە 11,506 جار هاتیە دیتن
ڕایا خو دەربارەی ڤی بابەی بنڤێسە!