مامۆستایانی خۆشەویست
دایک و باوک و قوتابیانی بەڕێز
دڵخۆشم بە شکاندنی بایکۆت و مانگرتنەکەتان و سوپاستان دەکەم کە وەک توێژێکی کارا و هۆشیاری کۆمەڵگەی کوردی لە پرسە سیاسییەکاندا ڕۆڵتان هەیە و نمونەیەکی جوانی پێشکەوتنی کۆمەڵگەی مەدەنینە لە پرسە کۆمەڵایەتی و سیاسییەکانی حوکمڕانیی هەرێمی کوردستاندا. جگە لەمەیش و بەدەر لە توێژەکانی دیکەی کۆمەڵگە، ئێمە مامۆستایان و ئاڵاهەڵگرانی کەرتی پەروەردە، ئەرک و بەرپرسیاریەتییەکی دیکەمان لە ئەستۆیە کە ئەویش شەکاوە هێشتنەوەی بەیداغی هۆشیاری و زانیاری و خوێندەوارییە لە وڵاتدا و هەر لە سۆنگەی فەلسەفەی پەروەردەی هاوچەرخ و مۆدێڕنەوەیە کە پێویستە نەوە و قوتابی و خوێندکارانمان لەسەر هەردوو بنەمای پەروەردەکردنی زانستی و هۆشیاری کۆمەڵایەتیانە پێ بگەیەنین تا لە داهاتوودا دەستیان هەبێت لە مۆدێڕنیزەکردنی وڵات و پەڕینەوە لە قۆناغی نەریتی کۆمەڵایەتی و سیاسییەوە بۆ قۆناغێکی نوێتر لە حوکمڕانی و ژیاری کە بە داخەوە جیهانی سێیەم لێی بێبەری بووە و دوو دەیەیە کورد خەریکی جێگرتن و پراکتیک کردنیەتی.
دڵخۆشم بەوەی مامۆستاکانمان هێندە هۆشیارن کە دەستیان لە بینای سیاسی وڵات هەیە و لە کاتی خۆیدا ناڕەزایەتی خۆیان دەردەبڕن و لە هەمان کاتیشدا و بە پێی زەروورەتی کۆمەڵایەتی کۆمەڵگە، دەست بە ئەرکی بنەڕەتی خۆیان و گوتنەوەی وانە و پێگەیاندنی قوتابی و خوێندکارەکانیان دەکەنەوە. پاش دەربڕینی ناڕەزایەتی و تێگەیشتن لە کڕۆکی کێشە دروستبووە سیاسیی و قەیرانە ئابوورییەکانی هەرێمی کوردستان، دووبارە بەر لە توێژ و چینەکانی دیکە، ئەوە مامۆستایانن کە بەرپرسیارانە و بۆ تێکنەچوونی ئاشتەوایی کۆمەڵایەتی و لەنگنەکردنی ڕێڕەوی زانست و هۆشیاری، مان و بایکۆتەکەیان دەشکێن و دەگەڕێنەوە قوتابخانەکانیان و دەبنەوە بە هەمان مامۆستا و باوانی ئەو منداڵە چاوگەشانەی کە باوکەکانیان لە بەرەکانی شەڕ دژی دڕندەترین ڕێکخراوی تیرۆریستی سینگیان کردووەتە قەڵغانی پاراستنی کوردستانی ئازیز و منداڵەکانیان لێرە بە ئێمە سپاردووە. ئێمەیش وەک وەزارەتی پەروەردە، وەک چۆن پێشتر داواکار و پاڵپشتی خواستە ڕەواکانی مامۆستایان و قوتابیانمان بووینە، ئێستایش بە شاهیدی هەموو لایەک، پێشمەرگەئاسا بە دوای مافی مامۆستایانەوە دەبین و شەو و ڕۆژ و خەمخۆرانە لە پێناو نەفەوتانی ماف و بەجێهێنانی خواستە ڕەوکانیان تێدەکۆشین و لەگەڵ حکومەت و وەزارەتە پەیوەندیدارەکان لەسەر خەت دەبین.
د. پشتیوان سادق
وەزیری پەروەردە
20-10-2015
ئەڤ بابەت ب زمانا (کوردیی ناوەڕاست) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەتە 5,079 جار هاتیە دیتن