بەپێی ڕاپۆرتێکی ڕێکخراوی هیومان ڕایتس وۆچ، عێراق قەرزاری 29 دەوڵەتە و بڕی قەرزەکانیشی بە 104 ملیار دۆلار خەمڵاندووە.
ڕێکخراوی هیومان ڕایتس وۆچ، ڕاپۆرتێکی لە بارەی دۆخی عێڕاق لە ماوەی 14 ساڵدا بڵاوکردووەتەوە و لە بەشێکی ڕاپۆرتەکەدا ئاماژەیان بەوەکردوە لە دوای ڕوخانی ڕژێمی سەدام حسین سێ ملیۆن و 400 هەزار هاووڵاتی عێراقی ئاوارەی 64 وڵات بوون و چوار ملیۆن و 100 هەزار کەسی دیکەش ئاوارەی ناوخۆی عێراق بوون.
بەپێی ڕاپۆرتەکەی ڕێکخراوی مافی مرۆڤی جیهانی، ئێستا عێراق قەرزاری 29 دەوڵەتە و کۆی قەرزەکان 124 ملیار دۆلار دەخەمڵێنرێت و سەرباری فڕۆشتنی نەوت له و ماوەیەدا بە بڕی یەک ترلیۆن دۆلار، بەڵام تاوەکو ئێستا عێراق لە دۆخێکی خراپدایە.
رێکخراوی هیومان ڕایتس وۆچ، ئاشکراشیکردوە، لە 35%ی عێراقییەکان لەژێر هێڵی هەژارین و ڕێژەی بێکاریش لە 31%ی تێپەڕاندووە و لە 9%ی ئه و کەسانەی کاردەکەن منداڵن و تەمەنیان لە 15 ساڵ کەمترە، جگە لەوەش پێنج ملیۆن و 600 هەزار منداڵی بێباوک هەن، لەگەڵ بوونی دوو ملیۆن بێوەژن.
ڕاپۆرتەکە دەڵێت لە ماوەی 14 ساڵدا زیاتر لە 39 جۆری نەخۆشی و پەتا بڵاوبووەتەوە کە دیارترینیان کۆلێرا و ئیفلیجی منداڵ و هەوکردنی جگەر بوون.
ڕێکخراوی هیومان ڕایتس وۆچ، ئاشکراشیکردووە کە بەهۆی کەمئاوی زەوی چێندراو لە 48 ملیۆن دۆنمەوە بۆ 12 میلۆن دۆنم کەمیکردووە.[1]
#14-08-2018#