سەرەڕای ئەوەی سەرۆکی تورکیا داوای لە هاووڵاتیانی وڵاتەکەی کرد، کە ئه و ئاڵتوون و زێرەی هەیانە بیفرۆشن و بیکەن بە لیرە، بەڵام بەپێچەوانەوە ئه و داواکارییە شکستهێنا و هاووڵاتیان ڕویان کردووەته کڕینی ئاڵتوون.
بەپێی ئامارەکان گرێبەستە دواخراوەکانی ئاڵتوون لە بۆرسەی ئەستەنبوڵ بەرزبوونەوەی بەخۆیەوە بینی، ئەوەش بەهای لیرەی تورکی زیاتر دابەزاند، خواستی ڕۆژانەش لە کڕینی ئاڵتون دوو هێندە زیادیکردوە و 40 هەزار گرێبەستی فرۆشتن واژۆکراوە، لەکاتێکدا لە مانگی ئازاردا 17 هەزار گرێبەست بووە، هەر له و ماوەیەشدا بەهای ئۆنسەیەک ئاڵتوون بەرامبەر لیرە بەڕێژەی 30% بەرزبووتەوە.
جوناسن بتلەر، پسپۆری ستراتیژی کانزا دەگمەنەکان لە Mitsubishi Corp U.K. Plc ڕایگەیاند کارێکی لۆژیکی و ڕاستە لە تورکیا کە ئاڵتون بکڕیت و هەڵیبگریت، بەوپێیەی بەهای لیرە دابەزیوە.
بتلەر ڕونیکردووەتەوە وەک پەناگەیەکی ئارام لە دۆخی تورکیادا، کڕینی ئاڵتوون کارێکی باشە و ئەوەش کاریگەری لەسەر بازاڕ دەبێت، به و پێیەی خواست لەسەر خشڵ و زێرو لیرەی ئاڵتون زیاتر دەبێت.
ئه و زیادبوونەی مامەڵەی ئاڵتوون لەکاتێکدا کە ئاستی مامەڵەی کرٍین و فرۆشتنی زێر بەپێی پێوەرە نێودەوڵەتییەکان لە تورکیا، بەبەراورد بە ناوەندە سەرەکییەکانی نیویۆرک و لەندەن زۆر بچووکە.
لەدوای سەرهەڵدانی کێشە و ئاڵۆزی لە پەیوەندییەکانی نێوان واشنتۆن و ئەنکەرە، لە ساڵی 2016، ڕەجەب تەیب ئەردۆغان سەرۆکی ترکیا دوای لە هاوڵاتیانی وڵاتەکەی کرد کە ئاڵتوونەکانیان بکەن بە لیرە و هەفتەی ڕابردووش ئه و داواکارییەی دووبارە کردەوە.[1]
#19-08-2018#