قوماش 14
نووسینی: #ئوسامە جەمیل عەلی#

هەندەی نەبرد پلکە زەکیە و قادر قرپەستوور هاتنە ژۆرێ، زەکیە غاریدا داکم و باوەشی پێ کرد و پێنج شەش ماچی لێکرد و تێر تێر گریا، تەماشا قادریم کرد هەردوو چاوی بارانیان لێ دەباری، هاتە لای سەری بابم و نیووچەوانی ماچ کرد و گۆتی: یاڕەبی خوا شفات بدا و ئاخیر موسیبەتە، کوو دەزانم خوا بە هەقە ئەوها دەزانم چا دەبیەوە و بە پێی خۆت لەو خەستەخانەی دێیە دەرێ! زەکیە گۆتیە داکم: ئەرێ خوشکۆرە دە لۆم بگێڕەوە، ئەو بەرایە چبوو بە سەرەنگۆ هات؟ داکیشم قوڕگی ساف کرد و لە سەری هەتا بنی وەکی پیازی پاکی کردەوە و لە دەستی پلکە زەکیەی نا! پلکە زەکیە ئاوڕەکی لە من داوە و گۆتی: برێ ئەو هەرایە هەمووی لە نیوچەوانی تووبووە سەر لووس! شێرۆ گۆتی: زەکیە چاوپان وەختی هەندێ نیە، ئەو مەنجەرە دۆڵمەم بدێ، وازگم دۆر و زوڕنای دەگێڕی لە برسان! زەکیە گۆتی: لۆ تووم نەهینایە هەتا بکەویە سەرێ! شێرۆ گۆتی: ئێ ئێ، هەر دێیە عیادەی لۆ زەخت گرتنێ، ئەوجە خۆت دەبینیەوە! داکم لۆ ئەوەی ئەو هەراو هۆریایەی لە سەر سەری بابم لابا، مەنجەرەکەی لە زەکیەی وەرگرت و گۆتی: ها کوڕم شێرۆکە ئێک دوو سرقان باوێ زارت! شێرۆ گۆتی: ئەڵلاهو ئەکبەر دایە عاجی، ئەوە ڕۆژ لە کیلای هەراتیە، بەمن دەرێی شێرۆکە، قەت ئەتوو نی! قادر قرپەستوور گۆتی: شێرۆ، لەوچەی مەکە و نانەکەی بخۆ، ئێرە خەستەخانەیە، نەک سەفرە! شێرۆ گۆتی: ئەتوو عەقت نەبی، دختۆر شێرۆ بە خۆی ئیشی خۆی زۆر باش دەزانی!
شێرو لە بەینی دوو قەرەوێران دانیشت و کەتە سەر دۆڵمەی، ئەمنیش دەستم دا قاپەکی و دوو سێ دۆڵمەم لۆ داکم تێکرد و گۆتم: دایە پارووە نانەکی بخۆ با بێیەوە سەرەخۆ، داکم گۆتی: بە خوای ڕۆرە هیچم پێناخورێ، درم وەها نەگیرایە جارەکیدی بە ئاسانی ببتەوە، زەکیە و قادر سووندیان لە داکم خوارد دەبی بڕەکی بخۆی! ئیدی داکم بە نابەدری ئێک دوو دۆڵمەی هاویشتە زاری، وەختەکی ئێک دوو خزمی سایەقەکەی پەیابوون و دوو سێ عەللاگەیان لە دەستی بوو، سەلامیان کرد و ئەحواری بابمیان پرسی، ئەوجە گۆتیان: وەڵلا نانمان هینایە، گۆتمان ممکینە برسیتان بی، دە فەرموون پارە ناناکی بخۆن! گۆتم: برا وەڵلا ئەو ئەزیەتەی نەدەویست، ئەوە پلکە زەکیەی جیرانمان مەنجەرە دۆڵمەکی هینایە، کابرا گۆتی: ڕەبی عافیەتتان بی، وەڵلا ئەمەش چار پێنج نەفەر کەبابمان لۆ هیناینە، گۆتمان با برسیتان نەبی! شێرۆ گۆتی: ئای دەستتان نەڕزی، ئەو کەبابەی تەعویلی ئەو خەتەی کەن بزانین کووە؟ کابرا عەللاگەکی دا دەست شێرۆی، شێرۆ فەوری کردیەوە و کەبابەکی دەرینا و لە سلۆری ئاوای کرد، گۆتم: شێرۆ ئەوە خراپ نیە ئەوەندەی دەخۆی؟ گۆتی: لۆ خراپە؟ خواردن هەموو دەمێ باشە نەک خراپ، دوایێ دختۆر شێرۆ بەخۆی ئیشی خۆی زۆر باش دەزانی، با چشتەکی دیشت پێ برێم، کەباب بیژییە و جێی خۆی دەکاتەوە!
پلکە زەکیە و قادر قرپەستوور بەینەکی باش دانیشتن، دوایێ هەستان و گۆتیان: ئەمە دەڕۆین، جیران ئەوسەر و ئەوسەری کۆرانێ هەمووی سەلامیان هەبوو، خەمی هیچتان نەبی و ئەمە مارینگۆ وەکی چاوی خۆمان دەپارێزین! زەکیە گۆتی: لە بیرم نەبوو، ئەو پارچە قووماشەم هینایە، وەختی خۆی بابی ڕەعمەتیم لە عەجێ هینابووی، هەر هەرمگرتبوو، متفەڕکە و بەسەری دادەن، ئیشاڵلا دەبیتە شفا! ئەمن لەگەر وشەی قوماشی ڕاجفریم و تەماشا داکم کرد، داکم تەماشایەکی کردم و سەرەکی بادا، لەبەر دری زەکیەی قووماشەکی لێ وەرگرت و بە سەر بابمی دادا!
دوو حەفتەمان بەڕێکرد و بابم ڕۆژ لە ڕۆژ باشتر دەبوو، وەیلهاتبوو دامان دەنیشاند و هوردە هوردە نانی دەخوارد، ڕۆژەکی دختۆر هات و بە هوردی تەماشا بابمی کرد و گۆتیە من: دەتانن بیبەنەوە مارێ، بەران ئەو دەرزی و دەرمانانەی لۆ بکڕن و هەتا بیست ڕۆژیدی برینەکانی لۆ تەداوی بکەن، دختۆرەکە ئیمزای دەرچوونی لە فایلەکەی داو ڕۆیی، ئەو ڕۆژە لۆمە ڕۆژەکی زۆر خۆشبوو، چونکە لە بینە و بەردەی خەستەخانەی ڕزگارمان دەبوو، لۆ عیلاجەکەش خەممان نەبوو، چونکە شێرۆ لە کۆرانی خۆمانە و قسووریش ناکا، پێویستیش ناکا پێی برێم، چونکە ئەو ئیشی خۆی زۆر باش دەزانی!
کەل و پەلمان خڕکردەوە و ئەمن و داکم و بابم و دوو سێ کەسی سایەقەکەی لەگەر شێرۆی هێدی هێدی بەڕێکەتین و گەیشتینە حەوشەی تەواری، شێرۆ گۆتیە کابرای بڕۆ تڕومبێلەکەت بینە ئێرە! کابرا گۆتی: ئاخر ئیزنم نادەن، شێرۆ گۆتی: بڕۆ برێ دختۆر شێرۆ وەیگۆ، دەوجە بزانم گەواد هەیە ئەتوو بگێڕتەوە! کابرا بەینەکی تەماشا شێرۆی کرد، ئەوجە ڕۆیی، وەڵلاهی هەندەی نەبرد تڕومبێل گەیشتە پێشەمە! بابمان سوار کرد و ئەمن و داکیشم سوار بووین و زۆر مەمنونی دختۆر شێرۆی بووین و بەرەو مارێ بە ڕێکەتین! داکم لە ڕێی گۆتی: شێرۆ قوون کەتی لە قەدەرە خۆی نیە، وەڵلا بابم دەستی دەڕوا ئەوجە لۆ!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!