قوماش 144
نووسینی: #ئوسامە جەمیل#

پێراومان لەپێ کردەوەو چووینە ژۆرێ و جانتام دانا، هەندی دەمێ دەستنوێژەکم شووشت و نوێژی هێوارێم کرد، عەبۆ جامە ئاوەکی فێنکی جەڕەی لۆ هینام و خواردمەوە، تامی ئەو ئاوەی بە سانایی لە بیرم ناچتەوە، شلێر خۆی هەرکردو دەستی بە حازرکردنی نانی کرد، عەبۆش کۆمەرە دارەکی خڕکردەوەو ئاگری تێبەردا، هەر ئاگر خۆشبوو کتریەکی پڕی ئاوی هاویشتە سەر ئاگری، ئەوجە هاتەوە بالیفەکی گەورەی هاویشتە پشتم و گۆتی: لاق ڕاکێشەو پشت بدە بالیفی، ئەتوو ئەوڕۆ زۆر هیلاکبووی، گۆتم: ئەتوو لەوەی گەڕێ، مەیتی ئەو پیرەمێردەی هەر لەوێ دەکەوی؟ گۆتی: نا، پاش نوێژی عیشایێ، جاحێری گوندی دەچن دەیهیننەوەو ئەوشۆ دەیشۆن و کفنی دەکەن، سبەینێش لەگەر گەرد و گوری بەیانی دەیشارنەوە، مامەستا ئەو پیرەمێردە ئێکەکبوو لە پیاوە ئاقرو دنیا دیدەکانی ئەو گوندەی، هەموو پرس و ڕامان بەویبوو، ئێستا ئەویشمان ڕۆیی، حەیف و مخابن پیاوی ئاقرو دانا لەناو میللەتی گەمژە جێی نابیتەوە! بەینەکی باش دامام و تێر تێر خەمم لۆ ئەو پیرەمێردەی خوارد کە ئەوها بە سانایی بووە قوربانی دوو لەشکری کوردکوژی نەخیندەوار!
وەختەکی شلێر خان یەک سنی گەورەی هیناو داینا، گۆتی: مامەستا دەبی ببوری لەو دەمودەستەی هەر ئەوەمان هەیە کەلۆم دانای، گۆتم: گفت و لفتی توو هەموو دنیای دەینی، بریا هەموومان وەکی توو ئەوها زارخۆشباین، تەماشا سنیم کرد پڕی خواردن بوو، ماست، پەنیر، ژاژی، تەماتەو ئاروو، گیز و موڕەبا، سەوزەو بیبەر و پیاز، پێنج شەش هێلکەی کوردی کورایی و قاپەک هێلکەو ڕوونی دەرەجە یەک! لە هەمووی خۆشتر ئەو نانە نەرم و جوانەی خۆمانە بوو، لە بنی درم مەمنونی ئەو مارە خانەدانەی بووم و تێرتێر دوعای خێرم لۆکردن، عەبۆ قیت بۆوەو کتری و چایەپەستی هینا، چایەکی ئێکڕەنگی لۆ تێکردم و لەپێشی دانام، نانەکی لەپێش دانام و فەرمووی لێکردم، ناوی خوامان لێهیناو دەستمان پێکرد، چونکە زۆر ماندی بووم بەتەواوی برسیم ببوو، دەستم بە نان خواردنێ کرد، بەران شەرمم کرد زۆری بخۆم، گۆتم با لەیەکەم ڕۆژی نەرێن: پەکوو ئەو مامەستایە لۆ هەندە زۆر خۆرە، عەبۆ گۆتی: مامەستا ئەو گیزە ئی خۆمانە و زۆر بەتامە، موڕەبایەکەش شلێر بەدەستی خۆی دروستیکردیە، ئەوەی دەیبینی و لۆمان دانای هەمووی خۆمانەیە، گۆتم: خوا بەرەکەتی تێبکاو بەزیادبی، عەبۆ کە دیتی چایەکەم تەواوکرد، فەوری چایەکیدی تێکردەوە، شلێر خان گۆتی: پەلەی لێمەکە لەچایەی وا شیرم لەسەر ئاگری دانایە، هەونکە لۆ مامەستای دەینم!
نانەکەمان خواردو یەک دوو دیشلەمەشم لەسەر کرد، هاتمەوە سەرەخۆو پشیەکی باشم دا، گۆتمە عەبۆ کاریتەی: کاک عەبدوڵلا ئەو گوندە چەند مارە؟ گۆتی: ئەتوو هەر بە عەبۆ گازمکەو ئەمن وا ناسرایمە، ئەو گوندە دەوری پەنجا ماری دەبی، گۆتم: خۆ لەگەر ئێکدی تەبانە؟ گۆتی: ئەگەر لێمانگەڕێن تەباینە، گۆتم: کێ لێتان ناگەڕێ؟ گۆتی: لە بێبەختی خۆمان ئەو گوندە دوو زەلامی تێدایەو هەر دووکیان خۆیان بە گەورەی گوندی دەزانن، بەخۆشت دەزانی دوو سەرکە بەران لەمەنجەرەکی ناکورێن، لەبەر هەندێ تەئکیدم ئەتووش لە بەینی ئەو دووەی تووشی کێشە دەبی!

هەتا هیلاکبووم پرسیارم لە عەبۆی کرد دەربارەی گوندی و خەرکی گوندی، گۆتی: سێ جاری ڕێک گوندەکەیمە تێکدرایەو سووتایە، دوعای بکە ئەوجارەش تێکنەچی و نەسووتێتەوە، ئەو دوو سەرکە بەرانە خراپ ملیان لەبەر ملی ئێکدی نایە، هەتا ئێستا شەش کەس لەگوندیمە بەو شەڕی براکوژییەی کوژرایە، ئاخیریان ئەو پیرەمێردەبوو کە ئەوڕۆ کوژرا، ئەمن مارم هیناوە گوندی هەتا خۆش بژیم و خەموخەفەتی دنیایێ لەبیرکەم، نەمزانی ئەو دوو حزبە دیسان دەست پێدەکەنەوە، گۆتم: ئیشاڵلا خوای مەزن بەهاناتان دێ و لەو وەزعەی قورتار دەبن!
دوو سعاتەک تێپەڕیبوو لەسەر نان خواردنەکەی، وەختەکی ئێکەک لەدەرێ هاواریکرد: عەبۆ، کورە عەبۆی کاریتەی، هەتا دەرێ وەرە! عەبۆ قیتبۆوەو دەستی دا لایتی و چووە دەرێ، بەینەکی پێچوو و هاتەوە، لایتەکەی داناو دانیشتەوە، شلێر خانی خێزانی گۆتی: ئەوە کێبوو عەبۆکە؟ ئەویش گۆتی: مەجیدی گولیزارێ بوو، گۆتی: بابڕۆین مەیتەکەی بینینەوە، گۆتم: ئەنگۆ بڕۆن ئەمن ناتانم بێم، مامەستا مێوانی منە، گۆتم: غەدرت کرد، هەستە با پێکەوە بچین، گۆتی: ئەوان ڕۆیشتن، زۆربوون، پێویستی نەدەکرد، دوایێ ئەتوو مێوانی منی و هیلاک و ماندی، پێویست ناکا، ئیشاڵلا سبەینێ پاشی نوێژێ پێکەوە دەچینە مزگەفتێ و لەوێش دەڕۆینە سەرقەبران، گۆتم: خوا لێی خۆشبی و جێگای بەهەشتبی.
درەنگ داهات و نوێژی عیشایێم کردو لێم پارداوە، ئەمن ترسی ئەوەم هەبوو، پێشکە لێنەگەڕێ بنووم و خەوەکەم لێ حەرامکا، عەبۆ گۆتی: بە ئیسرەحات بنوو، پێشکەمان نییە، ئیدی درم بەو قسەی خۆشبوو، چونکە زۆر ماندیبووم، هەر سەرم هاویشتە سەر بالیفی و خەوم لێکەت.
وەختەکی لەگەر قووقەی کەرەبابی بەخەبەر هاتم، سەرم برند کرد، دیتم، عەبۆ دانیشتیەو چایەشی هاویشتیتە سەر ئاگری، بەیانی باشم لێکردو هەستام نوێژێ بکەم، لەگەرم هاتە دەرێ و لایتەکەی دامە دەستی، گۆتی: ئێرێهێ جێی دەستنوێژ هەرگرتنێیە، مەترسێ لە حەپەی سەی، ئەو پڕناداتە مێوانان، مەمنونی بووم و دەستم دا مەسینەکی پڕی ئاو، چووم دەستنوێژکەم گرت و هاتمەوە، هەتا نوێژی سبەینێم کرد شلێر خان یەک سنیە نانی داناو هەموو چشتی لەسەربوو، لەهەمووی خۆشتر ئەستورکە بەڕوونی کردبوو، ئەو ئەستوورکەی ئاگری لە هەناوی پیاوی بەردەدا!
نانمان خواردو جلکم لەبەر کردو لەگەر عەبۆی چووینە لای مزگەفتێ، سەلاممان کردو دەوری هەشت نۆ زەلام لەوێبوون، عەبۆ ئەمنی بە هەمووان ناساند، مەلای گوندی لەدووری ڕاوەستابوو، جاحێرەکی ڕدێن ڕەشی قەترانیبوو، لۆلای من هات و بەخێراتنی کردم، وەرام داوەو بەتووندی دەستیم کووشی، هەندەی نەبرد مەیتەکەیان بردە ناو حەرەمی مزگەفتێ، چووینە ژۆرێ و ڕێزبووین، مامەستا بەپێشکەت و ئەمەش لەدوو وی نوێژمان لەسەر کرد، مامەستا زۆری دوعا لۆکردو گۆتی: بەڕاستی پیاوەکی دینداربوو، زۆر خزمەتی مزگەفتێی دەکرد، ئەهلی جومعەو جەماعەت بوو، یاڕەبی خوایە هەقی بکەیی و لێی خۆشبی!
مەیتەکەیان هاویشتە ناو دارەبازی و(دارە مەیت) بەڕێکەتین لۆ سەر قەبران، وەکی گەیشتینەوێ، پێنج شەشەک لەوێبوون، دیاربوو قەبریان حازرکردبوو، مەیتەکەیان شۆڕکردەوەو خۆریان بەسەر داکرد، مامەستا وەعزەکی داو دوعای خێری لۆکرد، ئیدی هێدی هێدی گەڕاینەوە گوندی، گۆتمە عەبۆی تازیەی لۆ دانانێن، گۆتی: نەخێر، چونکە زۆرجار دەیگۆ ئەگەر مردم تازیەم لۆ دامەنێن.

گەیشتینەوە بندیواری مزگەفتێ، مامەستا گۆتیە من: دیارە تازە هاتیە ئەو گوندەی؟ گۆتم: بەرێ، هاتیمە موباشەرەی بکەم، بەران ئەوە دەرێن مدیر خێزانی بردیتە ئێرانێ لۆ چارەسەری، گۆتی: خوا کەریمە، ئیشاڵلا ئەویش بەدەردەکەوتەوە، یەک دوو ڕۆژان سەبر بگرە دێتەوە، گۆتم: دەنا خەرکی گوندی دەرێن لەوانەیە دەپازدە ڕۆژی پێبچی! گۆتی: ئەمن هەر باوەڕناکەم ئاودیوو بیتە ئێرانێش، گۆتم: لۆ؟ گۆتی: نابینی یەکێتی و پارتی کوو سەنگەریان لێکدی گرتیە، لەهەموو لایەکی شەڕە تەقەو کوشتن و بڕینە، ئێران کوو حدودی دەکاتەوە بە ئاسانی! ئەو قسەی مامەستای لۆمن موهیمبوو، لەو وەزعەی ئاسان نییە ئێران حدودی بەڕووی خەرکی بکاتەوە، لۆیێ ورەم بەرزبۆوەو بڕیارمدا جارێ لەگوندی بمینێم هەتا مدیر سەروسەودایەکی دەبی، بەینەکی باش لەگەر خەرکی گوندی گفتوگۆم کردو پاشان لەگەر عەبۆکەی گەڕامەوە ماریان، ئەلهەقی زۆربەی خەرکی گوندی بە مەلای مزگەفتێشەوە تەکلیفیان کرد نیوڕانێ بچمەوە ماریان، بەران عەبۆکە ڕێینەدام گۆتم: ئیللاو بیللا دەچینەوە ماری خۆمان!
هەر دانیشتین و شلێرخان دوو چایەی دەرەجە ئێکی لۆ هیناین، گۆتیە عەبۆکەش وەرە ئەو گیزو مێوژەش ببە، با مامەستا بڕەکی بخوا، هێدی هێدی گیزو مێوژمان دەخواردو گۆتمە عەبۆکەی کلیلی دەرکەی مەکتەبێ دەبی لەکن کێبی؟ گۆتی: وەڵلا لەکن فەتۆیە، گۆتم: فەتۆ کێیە؟ گۆتی: فەڕاشی مەتکەبێیە، گۆتم: دەبی کلیلمان نەداتێ بچینە ژۆرێ؟ گۆتی: چایەکەی بخۆوە دەچین دەیبینین، هەندی دەمێ چایەکەم خواردەوەو لەگەر عەبۆکەی خشین لۆلای ماری فەتۆی، عەبۆ لە دەرکەی ماریان هاواریکرد: فەتۆ کورە فەتۆ! فەتۆ لەژۆرێڕا هاواریکرد: کێیە ئەوە فەرموو وەرە ژۆرێ! عەبۆکە پێشکەت و ئەمنیش کەتمەدووی، گەیشتینە بنەبانێ و سەلاممانکرد، فەتۆ بەپیرمان وەهات و چاک و چۆنیمان کرد، گۆتم: کاک فەتاح کوی؟ گۆتی: بەمن مەرێ فەتاح، برێ فەتۆ! گۆتم: ئاخر ناوت فەتاحەو فەتاح خۆشترە لە فەتۆی، گۆتی: لەکنەمن فەتۆ خۆشترەو تەواو! گۆتم: باشە کاکە، داوای لێبوردن دەکەم، فەتۆ وەلەو فەڕاشبوو، بەران زۆر بەپۆز بوو، بەپتی تۆزی لەخۆی دەکردەوە، ڕدێنی پۆلیسانی تراشیبوو، لەدوریڕا بریقەی دەداوە، سمێری یەکپارچە لەبۆیاخی هەرینابوو، چونکە سمێری زۆر گەورەبوو، بەتۆخیش ڕەشی کردبۆوە، لەدوریڕا دەتگۆ پشیلەیەو چوویتە بن سێری نانی! عەبۆکە گۆتی: فەتۆ هەستە وەگەرمان کەوەو دەرکەی مەتکەبێ لۆ مامەستای بکەوە، فەتۆ گۆتی: مامەستا کێیە؟ عەبۆکە گۆتی: ئەوەیەو تازە نەقر بووە لۆ مەتکەبی گوندی، فەتۆ گۆتی: لەگەر ڕێزم لۆ قسەکەی توو عەبۆ، بەران هەتا مدیر نێتەوە دەرکەی لۆ عەبدولبێشەریکی ناکەمەوە، ئەوە ئەمری مدیریە و لە قسەی دەرناچم و بەخێربێن سەرچاوم! ئەو بەخێربێن سەرچاومەی فەتۆی دەرکردنەکی موحتەرەمانەبوو لۆمە، لۆیێ گۆتمە عەبۆکەی هەستە بابڕۆین، چاوەڕێ دەکەین هەتا مدیر دێتەوە، ئیدی هەستاین و هاتینە دەرێ، لەدەرێ گۆتمە عەبۆی: ئەرێ ئەوە فەتۆ لۆ وەها بە دەعیەبوو دەعیە! گۆتی: خۆی بەتڕە ئاغەک تێدەگا، گۆتم: لۆ؟ گۆتی: ئاخر ئامۆزای ئێک لەو دوو گەورەی گوندیە کە ملیان لەبەر ملی ئێکنایە!

هەرکووی هەبوو سێ چار ڕۆژم بەڕێکرد، بوومە بارگرانی بەسەر ماری عەبۆکەو شلێر خانی، ئەوەندەی پێیانکرا خزمەتیان کردم، ڕۆژەکی لەگەر عەبۆکەی لەناو باخچەی پیاسەمان دەکرد، مێردمندارەک هات و گۆتی: عەبۆکە، مام فەتۆ گۆتی: با عەبۆکە بەخۆو بە مێوانەوە بێنە مەتکەبێ، ئیشم پێیانە! عەبۆکە تەماشایەکی کردم و گۆتی: ئەمن ئەتوو بناسم هەتا سەری لەگەر فەتۆی ئیدارەی ناکەی، ئەو خۆی پێ لەتوو موهیمترەو لەدووت دەنێری، گۆتم: با ئەمن جارێ موباشەرەکەی بکەم و دەست بەکاربم، ئەوجە لەهەقی دێم، وەڵلا دەبی دەردەکی بدەمێ بە پارووی برێ پەپۆکە! گۆتی: جارێ با بچین بزانین چیدەوێ، گۆتم: بابڕۆین!
شۆڕبووینەوە لۆلای مەکتەبێ، وەکی گەیشتینەوێ دیتمان دەرکەی مەکتەبێ کرایتەوە، چووینە ژۆرێ، دیتم فەتۆ کۆمەرە کتابەکی لەدەستەو دەباتە ژۆرەکی، سەلاممان لێکردو بەسەری لموزی وەرامی داوە، گۆتی: ڕاوەستن، هەتا دێمەوە، گێم نەدایێ و ڕاست چوومە ژۆرێ، دیتم کابرایەک لە پشت مێزەکی دانیشتیەو عەینەگی قەپ و قۆپ و خواری لەچاویە، سەلامم لێکرد، تەماشای کردم و یەکسەر هەستاوە، دۆقەکی گەرمی لەگەر کردم و گۆتی: یاخوا بەخێربێی مامەستا، ئەمن حەسەنەفەندی مدیرم، گۆتم: جەنابت مدیری یان فەتۆ؟ حەسەنەفەندی سۆر هەرگەڕاو چدەنگی نەکرد، گۆتی: دەدانیشەدا، با دوو قسان بکەین، دانیشتم و کتابەکەم لە گیرفانم دەریناو دامێ، بەینەکی تەماشای کردو گۆتی: یاخوا بەخێربێی سەرچاوان، دیارە مامەستای مێژووی؟ گۆتم: بەرێ، گۆتی: وەڵلا دەبی لێرە زۆربەی دەرسەکان برێیەوە، هەیەو نییە بەس ئەمن و ئەتوو، گۆتم: کێشە نییە ئیشاڵلا پێکدێین! وەختەکی فەتۆ بە ڕووگرژی هاتە ژۆرێ، گۆتی: ئەدی نەمگۆ مەچوونە ژۆرێ هەتا دێم، حەسەنەفەندی بڕەک گرژییەوە، ئەمنیش لۆئەوەی پۆتی بشکێنم و چیدی فەلسەفەم لەسەر لێنەدا، گۆتم: بڕۆ پەرداغە ئاوەکم لۆبینە! فەتۆ لەجێی خۆی تەزی و تووند تەماشای کردم، چاوی لەناو چاوم نابوو، گۆتم: ئەگەر گێت گرانە، وەکی چوویە هەولێرێ بڕۆ سەرەکی لە دختۆری گێی بدە، گۆتی: گێم چ عەیبی نییە، گۆتم: مادام وایە بڕۆ ئاوەکەی بینە! حەسەنەفەندی لۆ ئەوەی وەزعەکەی هێور کاتەوە، گۆتی: فەتۆ، بڕۆ هەندە ئاومان لۆبینە! فەتۆ بە توڕەیی چووە دەرێ.
حەسەنەفەندی خەریکی نووسینی موباشەرەکەم بوو، گۆتم: ئەرێ مامەستا خێزانەکەت کووە؟ گۆتی: وەڵلاهی باش نییە، بە حسابان بیبەمە ئێرانێ، ئەویش لەبەر ئەو شەڕوشۆڕەی حدود قەپاتبوو، بەناچاری گەڕاینەوە، لەو یەک دوو ڕۆژەی دەیبەمەوە هەولێرێ، بەشکوو لایەک بەلایەکی ببی، گۆتم: خوا شفای بداو دوعای خێری لۆدەکەم، گۆتی: زۆر مەمنونم، خێری تێدابوو حدود قەپاتبوو، ئەگەرنا، بەلای کەمی دەبا دوو حەفتەی چاوەڕێکەی! وەختەکی فەتۆ هاتە ژۆرێ و دۆلکەو پەرداغەکی لەسەر مێزی داناو لێیدا چووە دەرێ، حەسەنەفەندی سەری هیناپێش و گۆتیە من: خۆ مەینە ڕێز فەتۆی، با تووشی کێشە نەبی، گۆتم: ئەمن تووشی کێشە نەبم؟ گۆتی: بەرێ، گۆتم: لۆ؟ گۆتی: پشتی قەییمەو دەرەقەتی نایێی! گۆتم: بژی فەتۆ! عەبۆکە گۆتی: مامەستا پیاوەکی تێگەیشتییەو دەزانی خۆی لەگەر وەزعەکەی بگونجێنی!
حەسەنەفەندی موباشەرەکی نووسی و کتابەکەی داوە دەستم و گۆتی: ڕەبی پیرۆزتبی، ئەو کتابەی ببەوە تەربیەیی و ئەوان ناوت داخیلی حساباتی دەکەن، لەگەر دەستپێکردنەوەی مەکتەبێش وەرەوە دەوامێ، هەتا دێیەوە ئەمەش جێ و ڕێت لۆ تەرتیب دەکەین، گۆتم: زۆر مەمنون و مارت ئاوابی، ئەوجە ئەمن دەڕۆم، قۆری گرتم و گۆتی: نیوڕانێ لە خزمەت دادەبین و نایێلم بڕۆی، گۆتم: زۆر مەمنونم، مارت ئاوابی، ئەتوو بەخۆت خێزانت نەخۆشە، دەبی بڕۆم، چەند زوو بگەمەوە هەولێرێ لۆمن درانگە!
باشبوو حەسەنەفەندی ئیزنی دام و لەگەر عەبۆکەی خواحافیزیمان لێکردو هاتینەدەرێ، فەتۆ لەحەوشەی مەکتەبێ ڕاوەستابوو، ئاگری لەنیوچەوانی دەباری، تەماشایەکم کردو کتابەکەم برند کردو گۆتم: بەدوعا فەتۆ!

فەتۆ لموزی بڕەک برندکردو نویکردەوەو نوزەکی لێوەهات، چووینە دەرێ و گۆتمە عەبۆکەی: ئەوە فەتۆ چیگۆ؟ گۆتی: وابزانم گۆتی: هەر دەتبینمەوە، گۆتم: بەس دەوام ببتەوەو بێمەوە، دەبی لەسەر یەک پەنجەی بسوڕێنم، عەبۆکە گۆتی: وەڵلاهی مامەستا ئەگەر بەگێی براگچکەی خۆت دەکەی وازی لێدەینی، هیچت لەگەر فەتۆی پێناکرێ، دەردی مامەستا حەسەنی گۆتی: پشتی قەیمەو دەرەقەتی نایێی، گۆتم: جارێ بابچینەوە مارێ و کەلوپەلی بپێچمەوەو بگەڕێمەوە هەولێرێ، خوا کەریمە لۆ وەختی دەوامێ و شەڕە قۆچی من و فەتۆی، عەبۆکە گۆتی: قاتی نارێی ئێستا دەڕۆم؟ گۆتم: بەرێوەڵلا، لە ئێستا زووتر نییە، دەقەک زووتر بگەمەوە مارێ لۆمن باشترە، گۆتی: وەڵلا مامەستا ئێستا دنیاش خرابی ناتانی بڕۆی، نە نەفەر هەیە لۆ شاری و نە تەرەنتەر هەیە بتگەینی و نە دەبەش هەیە لە ڕوباری بتپەڕێنتەوە، هەر کەسەک لەگوندیمە بیەوێ بچتە شاری، دەبی لەگەر نوێژی بەیانی بەڕێکەوی، دەوجە ئەوشۆ پاردەوەو سبەینێ زوو هەرتدەستێنم و بەخۆم لەگەرت دێم هەتا سواری تەرەنتەری دەبی! گۆتم: یەعنی هیچ مەجالی تێدانییە؟ گۆتی: ناوەڵلا.
لەگەر عەبۆکەی شۆڕبوومەوە لۆ ماریان، نوێژی نیوڕانێمان کردو لێیدانیشتین، وەختەکی شلێرخان نانی هینا، دیتم یەک کەرەبابی دەرەجە ئێکی بە ئاوی خۆی لێنایە، هەرچی سەوزە بوو لەگەری دانابوو، نانی تیری و ماستاوی سارد کراشەی دەکرد، گۆتم: وەڵلاهی زۆرم ئەزیەت دای شلێرخان، بەڕاستی پێویستی بەو ماندیبوونەی نەدەکرد، شلێرخان گۆتی: ئەیڕۆ مامەستا ئەوە قسەیە دەیکەی، مێوان خۆشەویستی خوایەو بەرەکەتی خۆی لەگەخۆیدایە، گۆتم: زۆر مەمنون و مارتان ئاوابی، عەبۆکە نانەکی لەپێش دانام و ناوی خوای لێهیناو فەرمووی لەمن کرد، ئیدی ئەمنیش دەستم بە کەرەباب خواردنێ کرد.
عەسرەکەی گۆتمە عەبۆکەی هەندە گیز لەکێ پەیداکەین و بیکڕین؟ عەبۆکە خۆی توڕەکردو گۆتی: ئەوە قسەیە ئەتوو دەیکەی، ئەمن بەخۆم بەدەستی خۆم گیزت لۆ دادەنێم، گۆتم: ئەوی ڕاستیبی لۆخۆم نییە، لۆ مەسوولی سەیتەرەکەی ئەودیووی جسرەکەیە، گۆتی: بێ گیز نێیەوە، دەترسێم بچمەوە گیزم پێنەبی تووشی کێشەم بکا، گۆتی: خەمت نەبی ئەمن تەرتیبی دەکەم!
شەو داهات و پاش گفتوگۆو قسەی خۆش لێمان پارداوە، وەختەکی عەبۆکە گازی کردم، هەستام دەسنوێژم شووشت و نوێژی بەیانیم کرد، شلێرخان نانی بەیانی حازرکردبوو، نانمان خواردو خۆم پێچاوەو دەستمدا جانتای، خواحافیزم لە شلێرخانی کردو زۆر زۆر مەمنونی بووم، بەڕاستی ژنەکی خانەدان بوو، عەبۆکەی مێردیشی پارچە زێڕەکبوو لەو گۆڕەی! عەبۆکە فەردەکی هاویشتە سەرشانی و ئەمنیش جانتام بەملی وەکردو چووینە دەرێ، لایتی پێکردو گۆتی: فەرموو بابڕۆین، ئیدی کەتمە دوو عەبۆکەیی و چووینە دەرێ، ڕێ و ڕێ ڕۆیشتین و هێدی هێدی نەفەرمان وەگەر دەکەت، ماوەکی باش بەپێیان ڕۆیشتین و لەگوندی دەرچووین، وەختەکی گەیشتینە ئەو جێیەی تەرەنتەری لێبوو، عەبۆکە فەردە گیزەکەی هاویشتە ناو بۆدی تەرەنتەری و گۆتی: دەوجە خوات لەگەربی مامەستا، دۆقەم لەگەر کردو باوەشم پێکردو سێ چار ماچم لێکردو زۆر زۆر مەمنونی بووم، سواری تەرەنتەری بووم و خەرکەکەش ئەوەی دەهاتە شاری سواربوو، سایەق تەرەنتەر سلفی لێداو گێڕی گۆڕی و بەڕێکەت، هەتا عەبۆکەم لێبزربوو دەستم برند کردبوو خواحافیزیم لێی دەکرد!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!