پەپوولەی خەیاڵ
پەپوولەی خەیاڵ سەرمەست و هێمن
دەپێوێ سینگی ئاسمانی بێ بن
دەفتەری ژینم پەڕ ئەداتەوە
لاپەڕەی لاویم بیر ئەخاتەوە
ئەم هۆنراوانە، تۆم دێنێتە بیر
پێکەنینی تاڵ دەتباتەو لە بیر:
لە خاکی لاشەم بەیانی بەهار
گوڵاڵە سوورەیەکی ئاورین ڕوخسار
بە جوانی گۆنات سەر دەرئەهێنێ
لە سەر مەزارم دێ خۆی بنوێنێ
ئەتۆش کە هاتووی لە بۆ گوڵچنین
جوان ڕادەبووری دەم بە پێکەنین
ئەو گوڵاڵە سوورە، دەچێنی لە ڕێت
ئاخۆ دەیزانی بۆنی کێی لێ دێت؟
ئەڵێی: چەن جوانە! چەن ڕەنگی گەشە
داخەکەم داخۆم بۆچ دڵی ڕەشە؟ !
بەڵێ ئەو ساتە بزانە گوڵم!
گوڵی بەهەشتی ئاواتی دڵم!
ئەو گوڵە خاکی دڵداری خۆتە
ئێستاش بە هیوای ڕوخساری خۆتە
بۆیە بەو چەشنە گەش و خۆشڕەنگە
بۆیە ئەوەندە مات و دڵتەنگە
بۆیە وەستاوە دڵتەنگ لە سەر ڕێت
دڵی داخورپێ دیسان لە بەر پێت
گیانە لەو گوڵەی چیت دێتە بەرچاو
لەو گوڵاڵە سوورە، گوڵی دڵ سووتاو
جوانی هەڵبگرە هەر چەن خۆت گوڵی
خۆشبۆتر لە بۆن یاس و سونبوڵی
خاکی دڵدارە ئەیهێنیتەوە
زامی دڵەکەی نەکولێنیتەوە
ئەم هۆنراوانە تۆم دێنێتە بیر
پێکەنینی تاڵ دەتباتەو لە بیر
پەپوولەی خەیاڵ ئەڕوا لە سەرخۆ
لە شوێن بیری تر ئاسۆ بە ئاسۆ
هەتاکوو خەو دێ، بیرم ئەمرێنێ
پەپوولەی خەیاڵ هەڵدەوەرێنێ
#شەریف حسێن پەناهی#
#ملوانکەی شین# [1]