ڤیان محەمەد تاهر
ئەز ل ژڤانێ ئیمزایەکا شین
بووم
ل سەر لاپەڕێ ژیانێ
دێمێ دادیێ
ب دیمەنێ خوەزایی
بنەخشینیت و
ئەز ببمە پێلستانکەکا ئاشق
د ناڤ دا بهەلپەڕم..
ب ڕەنگێ پەڕێن خوە
لێڤێن وژدانێ سۆر بکەم
ب تلێن یاسایەکا قەدەغە
ل سەر بنڤیسم
حەز دکەم نێرگزەکا سروشت
هۆڤ بم
هەر تشتی ل دەردۆرا خوە
ژ وەرارکرنێ براوەستینم و
د ناڤ خوناڤا خوە دا غەوارە کەم
تەڤ گیاندارا
د ڕەنگێ زەر وەر دا کەم
زەری بکەمە ڕەنگێ ماچێن عەسەلی
زەری بکەمە دەنگێ ئەڤینێن ئەزەلی
ب زەری سۆری فڕکەم
هناڤێن خوە ژ جوانیێ پڕ بکەم
ڕەنگێ عەشقێ و خوینێ
ژ ئێک ڤاڤێر بکەم
خوینێ زەر بکەم
عەشقێ سۆر بکەم
ل سەر بنڤیسم
حەز دکەم
دار زەیتوونەکا هەردەمی بم
دەمارێن من ئاخێ کەسک بکەن
زکێ وەرزێ ڕەونەق کوژ
شەق بکەم
کاتێن من تێدا ئاڤز ببن و
پاییزێن کەسک ژێ ببن.[1]