گالیب ئەنساری ئوگلۆ ئەندامێ پەرلەمانێ تورکیا ل سەر لیستا پارتا داد و گەشەپێدان (ئاکپارتی) ژ ئامەدێ د داخۆیانیەکی دا بۆ ڕۆژناما ئەڤرۆ ڕاگەھاند کو گەلێ کورد ل باشورێ کوردستانێ ب دەھان سالن خەباتەکا مەزن یا ئاشتیانە برێڤە دبەن بۆ بگەھنە مافێن خوە یێن نەتەوی و ئەڤرۆ ژی ڕەوشا جیھانێ، یا ڕۆژھەلاتێ ناڤین و نێڤدەولەتی گونجاییە چارەنڤیسێ خوە ب ڕیفراندومەکی دیار بکەن و گۆت: (ل ھەرێما باشورێ کوردستانێ ب پێشەنگیا بەرێز بارزانی خەباتەکا مەزن و سەرکەڤتی برێڤە دچیت و ئەز باوەر دکەم ھەم حوکمەتا تورکیا و ھەم ژی وەلاتێن ئوروپا دخوازن دەولەتەکا سەربخوە ببینن و ڕاگەھاندنا دەولەتا کوردی مافێ ھەری سروشتی یێ گەلێ کوردە).
ئەنساری ئوگلۆ ھەروەسا ڕاگەھاند ژی پەیوەندیێن وی یێن باش ل گەل بەرپرسێن کوردستانێ ھەنە و وی ھەردەم پشتەڤانی ل مافێن کوردان ل ھەر جھەکی کریە و گۆت: (ئەڤە نێزیکی 25 سالن گەلێ کورد ل ھەرێما کوردستانا عیراقێ خوە برێڤە دبەت و ب سیاسەت و کریارێن خوە یێن سەردەمیانە شیاینە سەرنجێ پرانیا وەلاتێن دیمۆکراتیک ڕاکێشن سەر خوە و ھەکە کورد ئەو ژیانە برایانە یا د ناڤبەرا ھەموو پێکھاتێن دا ب سەرکەڤتی بەردەوام بکەن و بشێن خەتابا خوە یا دبلۆماسی ب ڤی ڕەنگێ نھا برێڤە ببەن ئەز وەسا دبینم دێ پشتەڤانێن ئاڤاکرنا دەولەتا سەربخوە یا کوردستانێ ژی گەلەک زێدەتر ببن).
ل سەر بەرخوەدانا ھێزێن پێشمەرگە و شەرڤانێن کورد ل دژی تیرۆرستێن داغشێ ژی گالیب ئەنساری ئوگلۆ ڕاگەھاند کو نھا ھەموو جیھان قەبوول دکەت کو ھێزێن پێشمەرگە پێشڤەچوونا چەکدارێن داعشێ ڕاوەستاندینە و شیاینە دەڤەرێن خوە یێن ل ژێر دەستھەلاتا داعشێ ئازاد بکەن و گۆت: (بەرخوەدانا کوردان، ب تایبەت شەرێ دژوار یێن پێشمەرگان د قادا نێڤدەولەتی دا پشتەڤانیا ژ بۆ گەلێ کورد مەزنتر کریە و کوردان وەک پارێزڤانێن ژیانا دیمۆکراتیک و پێکڤەژیانا نەتەو و ئۆل و مەزھەبێن جودا دبینن و ناڤ و دەنگێ کوردان ل جیھانێ بەلاڤ بوویە و ئەڤرۆ پشتەڤانیا بۆ دەولەتەکا کوردی ژی گەلەک زێدە بوویە).
ل سەر قۆناغا ئاشتیێ ل باکورێ کوردستانێ و تورکیا ژی ئەنساری ئوگلۆ ڕاگەھاند کو باوەریا وی ب سەرکەڤتنا قۆناغا ئاشتیێ ھەیە و داخواز ژ حوکمەتا ھەرێما کوردستانێ ژی کر کو د دەمێ پێدڤی دا بۆ سەرکەڤتنا قۆناغێ ھەڤکاریا ھەردو ئالیان بکەت و گۆت: (رۆلێ ھەرێما کوردستانێ ب تایبەت بەرێز بارزانی د دەستپێکرن و بەردەوامیا قۆناغا ئاشتیێ دا ڕۆلەکا بەرچاڤ و دیارە و ھیڤیدارم بۆ سەرکەڤتنا قۆناغێ بەردەوامیێ بدەنە ھەڤکاریێن خوە).
سەبارەت ب ھەلبژارتنێن پەرلەمانێ تورکیا ژی ئەندامێ پەرلەمانێ تورکیا ڕاگەھاند ئەو وەسا دبینیت دێ (ئاکپارتی) دیسان وەک پارتا یەکەم دەرکەڤیت و حوکمەتێ دروست بکەت و گۆت: (د ناڤا وەلاتیان دا د ھندەک خالان دا ساربوونەک ھەیە، لێ وەلاتی ل گەل ڤێ یەکێ نە ئارامی و تەناھی بەردەوام بکەت و ل سەر پارتا دیمۆکراسیا گەلان ژی مرۆڤ نزانیت بەحسێ چ ئەنجامەکی بکەت، ژ بەر کو وەرگرتنا 11% ژی بۆ من نە تشتەکی سەیرە و مانا د بن بەندێ 10% ژی نە تشتەکی سەیرە، لێ وەسا دیارە ھەکە HDP خوە باش بدەتە ناسکرن و ژ سیاسەتا دژوار دوور بکەڤیت دەلیڤا دەربازکرنا وێ ژ بەندا 10% گەلەک زێدە بوویە).
ل سەر نە بەربژار بوونا خوە د ھەلبژاتنێن ھەفتێ حزیرانا ئەڤسالە دا ژی ئەنساری ئوگلۆ دیار کر ئەو بابەتەکا تایبەتە و ناخوازیت ل سەر وێ مژارێ چ داخۆیانیەکی بدەت و گۆت: (بەلکو ئەز د خۆلا بھێت یا پەرلەمانێ دا جھێ خوە نەگرم لێ بلا ھەرکەس بزانیت کو ئەز دێ د ھەموو قادێن ژیانێ دا بۆ چارەکرنا پرسا کوردی و بجە بوونا ئاشتیێ ل وەلات دا بەردەوامیێ بدەمە خەباتێن خوە و چ ژ دەستێ من بھێت بۆ سەرکەڤتنا قۆناغا ئاشتیێ دێ بکەم).[1]