من خاسی ئینگلیز ناچێ لە بیرم
کە پێمی ناسی باوک و باپیرم
هەر کەسێ سپڵە و حقووق نەزانە
نابێ بە بەشەر، هەرچەن ئینسانە
با بڵێن ئینگلیز ئایینی جوێیە
بەڵام کردەوە و دادی بەجێیە
هەر ئەو بوو کە وا بە دەستوبردی
بۆ فێر کردنی زمانی کوردی
ئەو فێری کردین کوردی بنووسین
هەواڵی قەومی و میللی بپرسین
هەر کەسێ ئیشی چاکی بۆ کردی
تۆیش چاکی بڵێ گەر کوڕی مەردی
لە خەوی غەفڵەت ئەو ڕایپەڕاندین
ئەم گەنمە ئەیخۆین ئەو بۆی داچاندین
ئێستەش بە کوردی تەفسیری قورئان
کفرە لای گەلێ نەفام و نەزان
بەڵام بە تورکی یا نە بە فارسی
گەشکەدار ئەبن بۆیان بنووسی
وا عەرەبیمان کۆڵەکەی دینە
تورکی و فارسی بۆچ وا شیرینە؟
ضرب المثلێک هەبوو لەناومان
ئەمانخوێندەوە ڕوون ئەبوو چاومان
عەرەبی گەوهەر، تورکی زۆر هونەر
فارسی شەکەر، کوردی تڕی کەر
ژیشک بێچووی خۆی لا شل و نەرمە
کە چی بێچووی من مشاری سەرمە
ئەو تێی گەیاندین هۆشیاری کردین
ئەم نەزانینەی لەسەر لابردین
هەر کەسێ کەسە حەرفێکی بەسە
گەورەمە هەرکەس کە فریادڕەسە
دوژمنیش پەیکوڵ دەربێنێ لە پێم
گەر خاسی نەڵێم ئەبێ چی بڵێم
چونکە خوا ڕاستە، ڕاستی خۆش ئەوێ
هەر کەس ڕاست بڕوا ڕاستیشی تووش دێ
من کە بە ڕەنجی شانی خۆم ئەژیم
بۆچ ڕیا ئەکەم سا بە تەمای چیم
خۆ من مەئموور نیم بۆ ڕوتبە و نیشان
بە درۆ خەڵقی بەرمە ئاسمان
بەڕاستی ژینیش هیممەتی نواند
بەتەنیا کوردی داچەند و ڕواند [1]
#موفتی پێنجوێنی#
#دیوانی موفتی پێنجوێنی 2#