غەواس بەحرەین دەریای عومانی
یەک ڕۊژ جە گردش زەمانە فانی
تەجربەم گرتەن پەی نوکتەزانی
ناگا چاوم کەفت وە دوو تیپ سوار
تیپی فەرەنگی و تیپی زەنگەوار
نە مابەینشان دوو تەن ڕیش سفێد
سەرتاپا عوریان بێ ماوا و بێ زەید
یەک قەتعە زەمین دەعوا کەردەبین
ئابڵەی زیادێ بەرهاوردەبین
لاشەشان چوون پۊست پەڵەنگ گوڵگوڵ بی
ڕەنگ گوڵ نە توهر دیدەی بولبول بی
دوو سەف سوار یەسار و یەمین
هانە خسوومەت پەی قەتعەی زەمین
چوون مرخ بەسمەل وېشان لەش مەکەرد
ئەوان فەتوا مەدان ئەیان بەش مەکەرد
هەرکەسێ ڕەخنە وەی مەعنا بەردەن
گۆیا سەی یاقۆ زەڕ خەرید کەردەن
جواب ڕەحیم خان بە موعەما:
سەیید و خەیاڵ
بەح بەح لەی فکرە کەردی وە خەیاڵ
غەواس بەحرەین دوڕ و دانە و لال
سەراف سوخەن خویردەماوی خاڵ
مەعلوومە حەرفت خۊش مەجازییە
تاس و تەختە نەرد نەبەرد بازییە
وە مەجڵساندا خانان مەنیشان
تووتیوار مەکەن لولوی دوڕفشان
وە بازیی نەردا هەرکەسێ شەشدەر
ببەندۊ وە کەس موو وە ساحێب سەر
موعەما لە سەییدەوە:
پەنج مەلا هەنن بێدەست و قەڵەم
وە سوبح تاکو ئێوار مەنیشن وە هەم
ئەو پەنجەی ئاسن ئەی پەنجەی سونبل
مەکێشن دیوار بێ ئاو و بێ گل
جواب ڕەحیم خان بە موعەما:
پەنج مەلات پەنج سێخ ئاسن بەدەنەن
فکر ڕەوییەی ڕەفتار زەنەن
ئەو سێخ جوراب دونیاش وە کامەن
ئەویش هامنشەست حوری حورفامەن
#سەید یاقۆی ماییدەشت# [1]