باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و سی و چوارەمە
محەمەڎ تەشریفش بەرد پەی یانەو وەرەقەو بن نوفلی، ئەچاگە بارو وېش پەیش بەیان کەرد، دمای گۊشگېرتەی یەرېجار پەنش وات: مژدەت چەنەبۊ، بې شەک ئانە پېخامەن کە پەی تۊ نازڵ بیەن:
حەزرەت، تەشریفش، لای وەرەقە بەرد
واقیعاتی وېش، یەکیەک، بەیان کەرد
وەرەقە، سێ نۊبەت، پەیا پەی جە نۊ
وات: ئەی محەمەد، موژدە بۊ، وە تۊ
بە ڕاستی من، جە ڕای سەروەریت
گەواهی مدەون، بە پېغەمەریت
بە قدوومی تۊ، عیسا، بەنی مریەم
بەشارەتش دان، بەبې زیاڎ و کەم
واتشان شەخسێ، بەتحا، مەقامش
جە ئاسمانان، ئەحمەدەن، نامش
چوون کە جە ئینجیل، وەسفش عەیانەن
ئانە پېغەمبەر، ئاخر زەمانەن
یەقین جوبرەئیل، جە سەدرەی مەنزڵ
تەشریفش وە لای تۊ بېیەن نازڵ
وەرەقە ئاخېز کەرد، مدرا، وە پاوە
فەرقی موبارەک، حەزرەت، بۊساوە
واتش: نزیکەن، وە چاری ناچار
ماموور بی پەی جەنگ، مەعرەکەی کوففار
ئەی کاشکی جەو دەم من جە حەیات بام
دایېم، جە حوزوور، خاک و پات، مەبام
قەومی قوڕەیش، تۊ، بەرکەران جەی زەید
سیوای زاتی حەقق، نەداری ئومېد
حەزرەت فەرماوا: یانێ ڕوئیەتەن
قەومان، بەرکەران، من جە ئەی وەتەن
وەرەقە، وات: بەڵ، مەر بە تەناوەت
کەس نېیەن چەنیت، نەبۊش، عەداوەت
ڕەزاشان، نېیەن، کەس، بە تەرغیبت
مەکېشان زوان، گرد پەی تەکزیبت.[1]