#بېسارانی#
زڵېخام ماران، زڵېخام ماران
دۇ عەقرەب چەنی دۇ دەستەی ماران
چین چین سەف نە دەور کەعبە وناران
بەردەنش نە بەند ڕای ڕاوېیاران
جە کەعبە تا فەرق ئەسودولحەجەر
دەوری دایرە جای زەمزەم یەکسەر
بە دەستۇری جان دەستاخی خایېن
عەقرەب وەسەردا جەی گەردەن تایېن
پەی قەتڵ و تاراج حاجی یانی ساف
کەردەنش نە بەند ڕای کەعبە تەواف
وەختەن قېیامەت پەی خەڵق ئەو پا بۊ
ڕۊی ئاخر زەمان دەوری دنیا بۊ
ئەر یە نیشانە و عەلامەت نەبۊ
ڕۊزی ڕەستاخېز، قېیامەت نەبۊ؟
کۍ دېیەن تەواف کەعبە باتېڵ بۊ
زەهرەن نە کوففار زەمزەم قاتېڵ بۊ
[1]