باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و یەرەمە
سەدایێ ئاما جە لاو زاتو حەققیۆ، فەرماواش: تەرسیت نەبۊ، ڕەسوولی نازدار سەلامش کەرد، دمای گفوگۊی، پەنجا ڕکاتۍ نما فەرزەکریا سەروو ئوممەتەکەیش، ئیتر چەنی جوبرەئیلی ڕاو گېڵایۆشان گېرتەوەر.
لەرزا جە هەیبەت چوون توولی ساوا
بە قاپی قەوسەین ئەو ئەدناه یاوا
ئاما سەدایێ زەحمەت نەبۊ لېت
وانە تەحییەت پاکی خوڎای وېت
ڕەسوول وە ڕوخسەت دانای توانا
التحیات لله وانا
جە نۊ فەرما پېش بینای بانی سەر
سلام علیک یا خیر البشر
سەلامی حەزرەت عیززەت ستانا
و علی عباددالله وانا
شاهیڎی داشان بە خوڎای ئەکبەر
هەم بە ڕیسالەت پاکی پېغەمەر
جەو دما حەزرەت مەتلەب بەس بەس
یەکایەک عەرز کەرد بەزاتی ئەقدەس
گفتوگۊی عەزیم جە دەرگای غەففار
شنەفتش جواب لوتفی بۍ شومار
جە بابی ئوممەت حەزرەت هەم عەرز کەرد
حەقق پەنجا ڕکعەت نماز لېش فەرز کەرد
بە چن عاتیفەت عەتای ڕەببانی
موخلەع بە لوتف زاتی سوبحانی
ڕوخسەت تەڵەب کەرد جە دانای جەلیل
موراجەعەت کەرد بە لای جوبرەئیل
ڕوحەلئەمین شیی وە ئیستیقباڵش
سەڵەوات دا بە ڕووی جەلای جەماڵش
دەستی حەزرەت گرت وە عەزمی گوڵگەشت
بەردش وە سەیران گوڵباخچەی بەهەشت
حوریان ئامان گرد وە پېشوازش
جان و دڵ کەردەن وە پایەندازش
توحفەی لەزایېز فاخیرەی بەهەشت
یەکسەر دیی وە چەم ئەوزاعی هەر هەشت
غەرەز سەیرش کەرد هەرتاکە تاوا
دوزەخ بە نەزەر شەریفش یاوا
ئەهلی دوزەخی گرووی بەڎبەختان
تەبەعەی شەیتان ئایېرین وەختان
ئەحواڵی یەکیەک بە نەزەر ئاوەرد
پەی گوناهباران کېشا ئاهی سەرد.[1]