ڕابیتەی ئەڵمانیی بۆ نەخۆشی منداڵان و هەرزەکاران هۆشداریداوەتە دایکان و باوکان بەوەی منداڵی ساوا بە هیچ شێوەیەک نەلەرزێننەوە، لەبەرئەوەی مەترسیی هەیە منداڵەکە تووشی کۆنیشانە (سیندرۆم)ی منداڵی لەرزۆک ببێت.
ڕابیتەکە دەڵێت: ماسوولکەی منداڵی ساوا لاوازە و توانای ئەوەی نییە سەری بەسەقامگیریی بهێڵێتەوە کە تاڕادەیەک گەورە و قوورسە، بەوپێیەش کاتێک بێ کۆنترۆڵکردن دێت و دەچێت، دەلەرزێتەوە.
ئەوەش هاتووە، ئەو پڕۆسەیە وادەکات مێشکی هەستیاری منداڵەکە لە کاسەسەریدا بلەرزێتەوە، ئەمەش زۆر مەترسیدارە و ڕەنگە شانەکانی مێشکی تووشی پێکان بکات و ڕووبەڕووی خوێنبەربوونی ناوەکیی ببێتەوە، ئەمەش سەردەکێشێت بۆ تووشبوون بەلەدەستدانی هەمیشەیی بەشێک لە مێشکی و هەندێکجار مردنیشی.
دەشڵێت: ئەگەر منداڵەکە بەهۆی ئەو ڕاژاندن و لەرزاندنەوەیەوە تووشی سیندرۆمی منداڵی لەرزۆک بوو، ئەوە توانای هۆشەکیی منداڵەکە بەهێواشی گەشە دەکات و درەنگ فێری شتەکان دەبێت. [1]